រាជធានីភ្នំពេញ ៖ នៅឆ្នាំ២០២៣នេះ ជនមានពិការភាពចូលបម្រើការងារ តាមស្ថាប័នរដ្ឋ និងវិស័យឯកជន ទូទាំងប្រទេសសរុបជាង ៧ពាន់នាក់ នេះបើតាមឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ ។
ឯកឧត្តម ជា សុមេធី ថ្លែងឱ្យដឹងដូចនេះ ក្នុងឱកាសទិវាជនមានពិការភាពកម្ពុជា លើកទី២៥ និងអន្តរជាតិ លើកទី៤១ នាថ្ងៃទី៤ ខែធ្នូ ឆ្នាំ២០២៣ ក្នុងសាលមហោស្រពកោះពេជ្រ បានឱ្យដឹងថា ជនមានពិការភាពចូលបម្រើការងារ ក្នុងក្រសួង-ស្ថាប័នរដ្ឋ ចំនួន៣៩ មានជនមានពិការភាពចូលបម្រើការងារចំនួន ៣,៧៧៦នាក់ ក្នុងនោះស្ត្រីចំនួន ៨៦៩នាក់ ជនមានពិការភាពកម្រិតធ្ងន់ចំនួន ២,៣៥១នាក់ ស្មើ ២,០៥% ក្នុងឆ្នាំ២០២៣ ។
ឯកឧត្តម ជា សុមេធី បានឱ្យដឹងបន្ថែមថា ដោយឡែកវិស័យឯកជន រួមមាន ៖ ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ និងរោងចក្រសរុបចំនួន២៤១ ជនមានពិការភាពបានចូលបម្រើការងារចំនួន ៣,៧៥៩នាក់ ស្ត្រីចំនួន ៣,៦៣១នាក់ ។
ក្នុងឱកាសប្រារព្ធទិវាជនមានពិការភាពកម្ពុជា លើកទី២៥ និងអន្តរជាតិ លើកទី៤១នេះ ឯកឧត្តម ជា សុមេធី បានគូសបញ្ជាក់ថា ឆ្នាំ២០២៣នេះ បានប្រារព្ធឡើងក្រោមប្រធានបទ “ដំណោះស្រាយប្រកបដោយនវានុវត្តន៍ ដើម្បីសង្គមមួយមានផាសុកវត្ថុ និងសមធម៌” ក្នុងគោលបំណងបង្កើនការយល់ដឹងអំពីពិការភាព ដើម្បីលើកស្ទួយការអនុវត្តកាតព្វកិច្ចនានា ឈានទៅសម្រេចនូវការអនុវត្តអភិក្រម “ធ្វើឱ្យសិទ្ធិក្លាយជាការពិត” ដើម្បីផ្លាស់ប្តូរផ្នត់គំនិតការប្រើប្រាស់ពាក្យសំដី ប្រមាថមាក់ងាយ សើចចំអកឡកឡាយ ដែលនាំឱ្យប៉ះពាល់ដល់សិទ្ធិ និងសេចក្តីថ្លៃថ្នូរ ហើយអាចបាត់បង់ឱកាស ចូលរួមយ៉ាងពេញលេញរបស់ជនមានពិការភាព ។
គួរឱ្យដឹងដែរថា រាជរដ្ឋាភិបាលកម្ពុជា បានកំណត់យកវិស័យពិការភាពជាការងារអាទិភាព ដោយបានផ្តល់សច្ចាប័ន លើអនុសញ្ញា ស្តីពីសិទ្ធិជនពិការ និងលិខិតូបករណ៍អន្តរជាតិផ្សេងៗ បានកសាង និងដាក់ឱ្យអនុវត្តច្បាប់ គោលនយោបាយ និងលិខិតបទដ្ឋានគតិយុត្តជាតិ ពង្រឹងការផ្តល់សេវាផ្សេងៗ ដូចដែលមានចែងក្នុងកម្មវិធីនយោបាយ ផែនការយុទ្ធសាស្ត្របញ្ចាកោណ ដំណាក់កាលទី១ ក្របខណ្ឌគោលនយោបាយជាតិ គាំពារសង្គម ២០១៦-២០២៥ និងការធ្វើបរិយាបន្ន ជួយជនមានពិការភាពទៅក្នុងគ្រប់វិស័យ ៕
ចែករំលែកព័តមាននេះ