រាជធានីភ្នំពេញ ៖ ក្នុងដំណើរបំពេញទស្សនកិច្ចផ្លូវការ និងមិត្តភាព នៅប្រទេសឡាវ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា…
រាជធានីភ្នំពេញ ៖ ក្នុងដំណើរបំពេញទស្សនកិច្ចផ្លូវការ និងមិត្តភាព នៅប្រទេសឡាវ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានទទួលជួបសំណេះសំណាល សួរសុខទុក្ខជាមួយនិស្សិត និងមន្ត្រីការទូតកម្ពុជា ដែលកំពុងសិក្សា និងបំពេញបេសកកម្មការងារនៅក្នុងប្រទេសឡាវ ក្នុងនោះសម្តេចបានជំរុញឲ្យនិស្សិតខ្មែរ សិក្សានៅប្រទេសឡាវ ខិតខំរៀនសូត្រ កសាងសមត្ថភាព សីលធម៌ និងមានវិជ្ជាជីវៈ ច្បាស់លាស់ដើម្បីបម្រើប្រទេសជាតិ ។
ពិធីសំណេះសំណាលនេះ បានធ្វើឡើងនៅក្នុងសណ្ឋាគារ ដែលសម្តេចស្នាក់នៅក្នុងទីក្រុងវៀងចន្ទន៍ កាលពីថ្ងៃទី៣ ខែធ្នូ ឆ្នាំ២០២៣ សម្តេចរដ្ឋសភាធិបតី បានពាំនាំការផ្តាំផ្ញើសាកសួរសុខទុក្ខពីថ្នាក់ដឹកនាំគ្រប់ជាន់ថ្នាក់ ជូននិស្សិត និងមន្ត្រីការទូតទាំងអស់ដែលមានវត្តមាននាឱកាសនោះ ។
សម្តេចរដ្ឋសភាធិបតី បានផ្តាំផ្ញើ និងលើកទឹកចិត្តជំរុញក្មួយៗនិស្សិតទាំងអស់ខិត ខំសិក្សារៀនសូត្រ ប្រកាន់ខ្ជាប់ នូវសីលធម៌ ចូលរួមចំណែកកសាងពង្រឹងចំណង មិត្តភាពជាមួយប្រជាជនឡាវ ដែលជាមិត្ត ជាបងប្អូនមានទំនាក់ទំនងជាប្រពៃណី ជាមួយកម្ពុជាតាំងពីរយូរលង់មកហើយ ។
សម្តេចបានលើកឡើងថា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បានផ្តល់អាទិភាពលើការកសាងធនធានមនុស្ស ដើម្បីពន្លឿនការអភិវឌ្ឍប្រទេសជាតិ។ ដូច្នេះ សមត្ថភាព និងសីលធម៌របស់យុវជនជាធនធានសំខាន់ប្រកបដោយគុណភាព ក្នុងការចូលរួម អភិវឌ្ឍន៍សង្គមជាតិយើង ។
សម្តេចរដ្ឋសភាធិបតី ឃួន សុដារី បានជម្រាបក្មួយៗ និស្សិតពីកម្មវិធីនយោបាយរបស់រាជរដ្ឋាភិបាល អាណត្តិទី៧ ដែលផ្តោតសំខាន់លើការថែរក្សាការពារសុខសន្តិភាព និងការលើកកម្ពស់ជីវភាពលរដ្ឋប្រកបចីរភាព ។
សម្តេច បានគូសបញ្ជាក់ថា ៖ «សន្តិភាពមានសារៈសំខាន់ណាស់ ដូច្នេះយុវជនជំនាន់ ក្រោយមានកាតព្វកិច្ចចូលរួមថែរក្សាការពារ កុំចាំដល់ពេលបាត់បង់សន្តិភាព ទើបស្វែងរកនោះមិនមែនជាការងាយស្រួលឡើយ។ សន្តិភាពនៅកម្ពុជា ទទួលបានដោយលំបាក បានមកពីការលះបង់ធ្វើពលិកម្មរបស់ឥស្សរជនជំនាន់មុន មានសម្តេចតេជោ ហ៊ុន សែន មួយរូបបានដាក់ចេញនូវនយោបាយឈ្នះឈ្នះ បញ្ចប់សង្គ្រាមទាំងស្រុងពី ទឹកដីរបស់កម្ពុជា» ។
តាមរបាយការណ៍របស់ ឯកឧត្តម ហ៊ុលក្រង ផាណង ឯកអគ្គរាជទូតកម្ពុជា ប្រចាំប្រទេសឡាវ និស្សិតកម្ពុជាកំពុងសិក្សានៅឡាវមានចំនួន៦៧នាក់ ក្នុងនោះ៣០នាក់ជាស្ត្រី។ សិក្ខាកាមយោធាផ្លាស់ប្តូរមានចំនួន២៥នាក់ បួននាក់ជាស្ត្រី ចំណែកសិក្ខាកាមនគរបាលមានចំនួន៤នាក់ម្នាក់ជាស្ត្រី។ និស្សិតកម្ពុជា សិក្សានៅប្រទេសឡាវ សិក្សាលើជំនាញជាច្រើន ដូចជាអក្សរ សាស្ត្រឡាវ កុំព្យូទ័រ ស្ថាបត្យកម្ម ភាសាអង់គ្លេសជាដើម ។
សម្តេចមហារដ្ឋសភាធិការធិបតី បានមានប្រសាសន៍ថា សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តែងតែគិតគូរ និងយកចិត្តទុកដាក់ចំពោះនិស្សិតនិង ពលរដ្ឋខ្មែរ ដែលសិក្សា និងធ្វើការនៅក្រៅប្រទេសជាប្រចាំ ៕
ចែករំលែកព័តមាននេះ