ខេត្តកំពត ៖ យុវជន៣នាក់បាននាំគ្នាធ្វើសកម្មភាពប្រើអំពើហិ.ង្សាទៅលើយុវជនជាសិស្សសាលាអនុវិទ្យាល័យកំពតក្រុងម្នាក់ ដោយយកមួកសុវត្ថិភាពទៅវា.យក្បាល និងដៃជាច្រើនមួក បណ្តាលឲ្យយុវជនរងគ្រោះរងរបួសជាច្រើនកន្លែង នៅត្រង់ចំណុចមុខសាលាអនុវិទ្យាល័យមិត្តភាពកម្ពុជា-ជប៉ុនកំពតក្រុង ស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត។
តាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា នៅវេលាម៉ោងប្រហែលជា៨និង៣០នាទីព្រឹក ថ្ងៃទី០១ ខែធ្នូ ឆ្នាំ២០២៣ មានយុវជនចំនួន៣នាក់បានប្រើអំពើហិ.ង្សា ដោយយកមួកសុវត្ថិភាពវា.យក្បាល និងដៃជាច្រើនមួកទៅលើយុវជនជាសិស្សសាលាម្នាក់ បណ្តាលឲ្យរងរបួសពកក្បាល របួសកែងដៃខាងស្តាំ និងរបួសម្រាមដៃ។
ប្រភពដដែលបានបន្តថា ក្រោយពីធ្វើសកម្មភាពរួច យុវជនបង្កម្នាក់រត់គេចខ្លួនបាត់ស្រមោល រីឯ២នាក់ទៀតមិនទាន់រត់ចេញពីកន្លែងកើតហេតុទេ ក៏ត្រូវប្រជាពលរដ្ឋនៅក្បែរកន្លែងកើតហេតុរាយការណ៍ជូនសមត្ថកិច្ចឲ្យជួយអន្តរាគមន៍។ ភ្លាមៗនោះ កម្លាំងសមត្ថកិច្ចមកដល់កន្លែងកើតហេតុ រួចឃាត់ខ្លួនយុវជនបង្កទាំង២នាក់នោះនាំមកកាន់ស្នងការដ្ឋាននគរបាលខេត្ត ដើម្បីធ្វើការសាកសួរតែម្ដង។
សមត្ថកិច្ចការិយាល័យព្រហ្មទណ្ឌកំរិតស្រាលនៃស្នងការនគរបាលខេត្ត បានប្រាប់ឲ្យដឹងដែរថា ក្រុមយុវជនបង្កដែលធ្វើសកម្មភាពវា.យទៅលើជនរងគ្រោះជាសិស្សសាលានោះ មានគ្នា៣នាក់ ក្នុងនោះទី១- ឈ្មោះ ង៉ូវ សម្បត្តិ ភេទប្រុស អាយុ១៥ឆ្នាំ ទី២- ឈ្មោះ ហាក់ វិសាល ភេទប្រុស អាយុ១៥ឆ្នាំ ទាំង២នាក់ មានទីលំនៅក្នុងភូមិកំពង់បាយខាងជើង សង្កាត់កំពង់បាយ ក្រុងកំពត។ រីឯបក្សពួកម្នាក់ទៀតមានឈ្មោះ ម៉ូវ ភេទប្រុស អាយុប្រហែល១៥ឆ្នាំ (មិនស្គាល់ទីលំនៅ) បានរត់គេចខ្លួនបាត់ស្រមោលក្រោយបង្កហិ.ង្សារួច។
សមត្ថកិច្ចបានបន្តថា បើតាមចម្លើយសារភាពរបស់យុវជនទាំង២នាក់ដែលចាប់ខ្លួនខាងលើនេះ បានសារភាពប្រាប់ឱ្យដឹងថា «ឈ្មោះ ម៉ូវ ដែលរត់គេចខ្លួននោះ ជាជនដៃដល់ ដោយយកមួកសុវត្ថិភាពវា.យទៅលើជនរងគ្រោះ រួចរត់គេចខ្លួនតែម្តង។ រីឯខ្លួនទាំង២នាក់វិញ គ្រាន់តែរួមដំណើរជាមួយមិត្តភក្តិឈ្មោះម៉ូវ ដែលជាជនដៃដល់ទេ ហើយក៏ត្រូវសមត្ថកិច្ចឃាត់ខ្លួនតែម្តងទៅ»។
សមត្ថកិច្ចបានបន្តទៀតថា ជនរងគ្រោះក្នុងករណីហិ.ង្សាខាងលើមានឈ្មោះ ម៉ៅ រិទ្ធីយុទ្ធ ភេទប្រុស អាយុ១៦ឆ្នាំ ជាសិស្សសាលាអនុវិទ្យាល័យកំពតក្រុង មានទីលំនៅភូមិ១ឧសភា សង្កាត់កំពង់កណ្តាល ក្រុងកំពត ។ ចំណែកវត្ថុតាងដែលសមត្ថកិច្ចរឹបអូសមកជាមួយមានមួកសុវត្ថិភាពមួយ និងមនុស្សចំនួន២នាក់។
គួរបញ្ជាក់ថា យុវជនទាំង២នាក់ខាងលើនេះ បន្ទាប់ពីសារភាពប្រាប់សមត្ថកិច្ចរួចហើយ ក៏ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្ត នៅរសៀលថ្ងៃទី០២ ខែធ្នូ ឆ្នាំ២០២៣ ដើម្បីចាត់ការតាមនីតិវិធី។ រីឯយុវជនម្នាក់ទៀតដែលរត់គេចខ្លួននោះ សមត្ថកិច្ចកំពុងតែធ្វើការស្រាវជ្រាវ ដើម្បីឃាត់ខ្លួនយកមកផ្តន្ទាទោសទៅតាមច្បាប់ហើយ។
ចែករំលែកព័តមាននេះ