ខេត្តស្ទឹងត្រែង ៖ រដ្ឋបាលជលផល និងកម្លាំងកងរាជអាវុធហត្ថ នាព្រឹកថ្ងៃទី១ ធ្នូ ២០២៣ នេះ បានបញ្ជូនជនសង្ស័យចំនួន៨នាក់ទៅកាន់តុលាការ ជាមួយសំណុំរឿងបទល្មើសនាសាទប្រព្រឹត្តនៅក្នុងតំបន់ហាមឃាត់អាងទំនប់វារីអគ្គិសនីសេសានក្រោម២ ។
នាយខណ្ឌជលផលស្តីទី លោក ដេត ចំណាន បានបញ្ជាក់នាព្រឹកថ្ងៃទី១ ខែធ្នូ ឆ្នាំ២០២៣ នេះថា ជំនាញបានបញ្ជូនក្រុមអ្នកនេសាទដែលតែងតែសហការឃុបឃិតគ្នាជាមួយនឹងប្រជាសហគមន៍លួចធ្វើនេសាទខុសច្បាប់នៅក្នុងអន្លង់អភិរក្សត្រីមេពូជក្នុងអាងទំនប់វារីអគ្គិសនីសេសានក្រោមពីនៅក្នុងភូមិសាស្ត្រ ឃុំក្បាលរមាស ស្រុកសេសាន ។
លោកបន្ថែមទៀតថា កម្លាំងគណៈបញ្ជាការឯកភាពស្រុកសេសាន ក្រោមការដឹកនាំបញ្ជាពីព្រះរាជអាជ្ញាសាលាដំបូងខេត្តកម្លាំងកងរាជអាវុធហត្ថបានចុះស្រាវជ្រាវធ្វើការឃាត់ខ្លួនបានចំនួន៩នាក់ ក្នុងនោះ មានក្មេងប្រុសម្នាក់អាយុ១៣ឆ្នាំបានឱ្យទៅផ្ទះវិញ ក្រៅពីនោះកសាងសំណុំរឿងបញ្ជូនទៅតុលាការទាំងអស់។
សូមបញ្ជាក់ថា ការឃាត់ខ្លួនជនសង្ស័យខាងលើ បានធ្វើឡើងកាលពីថ្ងៃទី២៧-២៨ខែវិច្ឆិកា កន្លងមកថ្មីៗនេះ ជាមួយនិងវត្ថុតាង រួមមានទូកឈើចំនួន៣គ្រឿង-ទូកស្មាច់១គ្រឿង-ម៉ាស៊ីន២៥សេះ២គ្រឿង២០សេះ២គ្រឿង-សន្ទូចរនង៣០០០ពាន់ផ្លែ-មងបណ្តែត២៥០០ម៉ែត្រស្មើ២៧ត្បូង-រួមនិងត្រីចម្រុះចំនួន៣៤គីឡូក្រាមផងដែរ ។
ប្រជាពលរដ្ឋនៅក្នុងឃុំក្បាលរមាសសង្ឃឹមថា តុលាការនិងចាត់វិធានការតាមច្បាប់ចំពោះជនខិលខូចទាំងនេះ និងស្រាវជ្រាវអ្នកពាក់ព័ន្ធបន្ថែមទៀត ទៅតាមនិតិវិធីប្រកបដោយប្រសិទ្ធភាព ៕
ចែករំលែកព័តមាននេះ