ទីក្រុងបាងកក៖ មានករណីកូនកំលោះបាញ់សម្លាប់កូនក្រមុំ ម្ដាយក្មេក ប្អូនស្រីថ្លៃ ភ្ញៀវដែលទៅចូលរួមពិធីមង្គលការម្នាក់ និងបាញ់សម្លាប់ខ្លួនឯងតាមក្រោយ។ ហេតុការណ៍នេះកើតឡើងនៅប្រទេសថៃ។ សមត្ថកិច្ចកំណត់មុខសញ្ញាជនដៃដល់ឈ្មោះចតុរង្គ (Chaturong) ធ្លាប់ជាអតីតយុទ្ធជន…
ទីក្រុងបាងកក៖ មានករណីកូនកំលោះបាញ់សម្លាប់កូនក្រមុំ ម្ដាយក្មេក ប្អូនស្រីថ្លៃ ភ្ញៀវដែលទៅចូលរួមពិធីមង្គលការម្នាក់ និងបាញ់សម្លាប់ខ្លួនឯងតាមក្រោយ។ ហេតុការណ៍នេះកើតឡើងនៅប្រទេសថៃ។ សមត្ថកិច្ចកំណត់មុខសញ្ញាជនដៃដល់ឈ្មោះចតុរង្គ (Chaturong) ធ្លាប់ជាអតីតយុទ្ធជន និងជាអត្តពលិកកីឡាប៉ារ៉ាឡាំពិច។ ចតុរង្គមានវ័យ២៩ឆ្នាំ រីឯកូនក្រមុំឈ្មោះកញ្ចនា (Kanchana) អាយុ៤៤ឆ្នាំ រស់នៅជាមួយគ្នាបីឆ្នាំ មុននឹងសម្រេចចិត្តដឹកដៃគ្នាចូលរោងការកាលពីថ្ងៃសៅរ៍។
ភ្ញៀវដែលអញ្ជើញចូលរួមនៅក្នុងថ្ងៃមង្គលការសង្កេតឃើញភាពខុសប្រក្រតីមួយកើតឡើង។ កូនកំលោះហាក់ដូចជាមិនសប្បាយចិត្តទាល់តែសោះ។ គាត់ធ្វើមុខក្រម៉ូវចងចិញ្ចើមជាប់ជានិច្ច។ សមត្ថកិច្ចក៏និយាយដូចគ្នាថានៅថ្ងៃនោះ កូនកំលោះហាក់ដូចជាក្រពុលមុខយ៉ាងខ្លាំង។ ប៉ុន្តែគេមិនទាន់ដឹងថាតើគាត់មានរឿងធំដល់ថ្នាក់ណាទើបបានជាដាច់ចិត្តធ្វើដល់ថ្នាក់នេះ។ សមត្ថកិច្ចរកឃើញកាំភ្លើង និងគ្រាប់កាំភ្លើងចំនួន១១គ្រាប់ដែលគាត់បានទិញដោយស្របច្បាប់តាំងពីឆ្នាំ២០២២។
ចតុរង្គធ្លាប់ជាទាហានម៉ារីនថៃប្រចាំការនៅឯមូលដ្ឋានទ័ពជើងទឹកសត្ថាហ៊ីប (Sattahip) នៃខេត្តឈុនបុរី។ ប៉ុន្តែគួរឱ្យស្ដាយ នៅថ្ងៃមួយនោះគាត់ជួបនឹងគ្រោះអកុសលនៅពេលចុះបំពេញការងារ ត្រូវរថភ្លើងកិនដាច់ជើងម្ខាង ធ្វើឱ្យគាត់ធ្លាក់ខ្លួនពិការ។ គាត់ក៏ធ្លាប់បានកសាងស្នាដៃ១ចំនួនផងដែរ។ គាត់ធ្លាប់ប្រកួតកីឡាប៉ារ៉ាឡាំពិចលើកទី១១នៅប្រទេសឥណ្ឌូណេស៊ីកាលពីឆ្នាំ២០២២ និងធ្លាប់ឈ្នះមេដាយប្រាក់នៅក្នុងវិញ្ញាសាហែលទឹក។ គាត់ក៏ជាបេក្ខជនត្រូវចូលរួមប្រកួតកីឡាជនពិការលំដាប់ពិភពលោកឆ្នាំ២០២៣ដែលនឹងរៀបចំធ្វើឡើងចាប់ពីថ្ងៃទី១ដល់ថ្ងៃទី៩ ខែធ្នូ ឆ្នាំ២០២៣នៅខេត្តនគររាជសីមា។
អ្នកខ្លះនិយាយថាកូនកំលោះហាក់ដូចជាមានអ្វីលាក់ទុកនៅក្នុងចិត្ត ហើយចេះតែសង្ស័យចំពោះភរិយារបស់ខ្លួន។ សាក្សីខ្លះទៀតប្រាប់ថាកូនកំលោះឈ្មោះចតុរង្គដោយហេតុតែគាត់ជួបនឹងគ្រោះអកុសលធ្លាក់ខ្លួនពិការ ម៉្លោះហើយ គាត់មានអារម្មណ៍តូចចិត្ត និងខកចិត្តយ៉ាងខ្លាំង។ គាត់ចេះតែបារម្ភថាថ្ងៃណាមួយប្រពន្ធរបស់គាត់នឹងបែកបែរចិត្តទៅរកអ្នកថ្មី។
នៅថ្ងៃរៀបការ គេរៀបចំពិធីសំពះផ្ទឹម និងពិធីដទៃទៀតតាមប្រពៃណីនៅពេលព្រឹក។ បន្ទាប់មក នៅពេលរសៀលរហូតដល់យប់ជ្រៅមានពិធីជប់លៀង និងពិសាភោជនាហារ។ សាក្សីនិយាយថានៅពេលបាញ់ប្រហារនោះ កូនកំលោះស្ថិតនៅក្នុងស្ថានភាពស្រវឹង។ គេឃើញកូនកំលោះ កូនក្រមុំ ម្ដាយក្មេក និងប្អូនថ្លៃស្រី រួមជាមួយភ្ញៀវដទៃទៀតអង្គុយញ៉ាំអាហារ និងទទួលទានគ្រឿងស្រវឹងជុំគ្នា។ កំពុងសប្បាយសុខៗស្រាប់តែកូនកំលោះ និងកូនក្រមុំចាប់ផ្ដើមទាស់ពាក្យសម្ដីគ្នា។
មិនយូរប៉ុន្មាន ចតុរង្គដើរសំដៅទៅរកឡានរបស់គាត់ដែលចតទុកចោល។ ពេលត្រឡប់ទៅវិញ គាត់កាន់កាំភ្លើងខ្លី១ដើមនៅក្នុងដៃ។ គាត់ចាប់ផ្ដើមរើម្ហូបអាហារនៅលើតុបោះចោល ធ្វើឱ្យកូនក្រមុំ រួមទាំងសាច់ញាតិ និងភ្ញៀវដែលអង្គុយនៅក្បែរនោះដោយសារមើលឃើញស្ថានភាពមិនស្រួលក៏ចាប់ផ្ដើមជម្លៀសខ្លួនថយឱ្យឆ្ងាយ។ ចតុរង្គក៏លើកកាំភ្លើងខ្លីបាញ់កូនក្រមុំជាច្រើនគ្រាប់។ បន្ទាប់មក បាញ់ម្ដាយក្មេក ប្អូនស្រីថ្លៃ និងបាញ់ក្បាលខ្លួនឯងមួយគ្រាប់ស្លាប់ភ្លាមៗនៅនឹងកន្លែងកើតហេតុ។
សាក្សីនិយាយថាចតុរង្គគ្មានចេតនាបាញ់ភ្ញៀវ២នាក់ទៀតបណ្ដាលឱ្យស្លាប់ម្នាក់ និងរបួសធ្ងន់ម្នាក់នោះទេ។ ប៉ុន្តែដោយសារគាត់បាញ់ជាច្រើនគ្រាប់ ធ្វើឱ្យគ្រាប់កាំភ្លើងខ្លះប្លាតត្រូវពួកគេ។ ហេតុការណ៍នេះកើតឡើងបន្ទាប់ពីរដ្ឋមន្ត្រីក្រសួងមហាផ្ទៃទើបតែចុះហត្ថលេខាលើបទបញ្ជាថ្មីមួយដើម្បីព្យួរទុករាល់ការផ្ដល់សិទ្ធិប្រើប្រាស់កាំភ្លើងគ្រប់ប្រភេទរយៈពេលមួយឆ្នាំ។ សមត្ថកិច្ចបន្តស៊ើបអង្កេតសំណុំរឿងនេះដើម្បីចង់ដឹងអំពីមូលហេតុដែលនាំឱ្យគាត់បាញ់សម្លាប់មនុស្សឆៅៗបែបនេះ៕
ប្រភព៖ Bangkok Post, The Independent និងThe Nation
https://www.independent.co.uk/asia/southeast-asia/thailand-wedding-shooting-paralympian-b2454560.html
https://www.bangkokpost.com/thailand/general/2692584/5-killed-1-wounded-by-bridegroom-at-korat-wedding-party
https://www.nationthailand.com/thailand/general/40033229
ចែករំលែកព័តមាននេះ