បណ្តារដ្ឋនៅឈូងសមុទ្រពែរ្ស៍កាលពីថ្ងៃទី២២ ឧសភា កន្លងមក បានសម្រេចផ្អាកវិញនូវកិច្ចខិតខំប្រឹងប្រែងធ្វើឱ្យប្រធានាធិបតីយេម៉ែនដែលកំពុងមានបញ្ហាលោកអាលីអាប់ឌុលឡាហ៍ សាឡេហ៍ លាលែងចេញពីតំណែង ក្រោយពីលោកសាឡេហ៍ នៅតែបដិសេធមិនព្រមចុះហត្ថលេខាលើកិច្ចព្រមព្រៀងផ្ទេរអំណាចដែលសម្របសម្រួលបានដោយក្រុមប្រឹក្សាកិច្ចសហប្រតិបត្តិការឈូងសមុទ្រ ហើយថែមទាំងព្រមានថា នឹងកើតមានសង្គ្រោះស៊ីវិលក្នុងប្រទេស។
ការសម្រេចចិត្តផ្អាកកិច្ចខិតខំប្រឹងប្រែងនោះធ្វើឡើងក្រោយពីមានកិច្ចប្រជុំបន្ទាន់មួយរបស់រដ្ឋមន្ត្រីការបរទេសនៃប្រទេសជាសមាជិក GCC ដែលរៀបចំឡើងកាលពីល្ងាចថ្ងៃទី២២ ឧសភា នៅក្នុងទីក្រុងរីយ៉ាដ រាជធានីអារ៉ាប៊ី សាអូឌីត ។ ក្នុងសេចក្តីថ្លែងការណ៍មួយដែលចេញផ្សាយដោយទីភ្នាក់ងារព័ត៌មានអារ៉ាប៊ី សាអូឌីត រដ្ឋមន្ត្រីការបរទេសទាំងនោះថ្លែងថា ពួកគេបានបោះបង់ចោលវិញនូវកិច្ចព្រមព្រៀងផ្ទេរអំណាចសម្រាប់ប្រទេសយេម៉ែនដោយសារការមិនឯកភាពគ្នារវាងភាគីបដិបក្សទាំងពីរ ។
កាលពីថ្ងៃទី២១ ឧសភា កន្លងមក ក្រុមប្រឆាំងយេម៉ែនបានចុះហត្ថលេខាលើកិច្ចព្រមព្រៀងនោះ ប៉ុន្តែលោកសាឡេហ៍ ថ្លែងថា លោកនឹងមិនធ្វើតាមក្រុមប្រឆាំងឡើយ លុះត្រាតែក្រុមនោះយល់ព្រមចុះហត្ថលេខាលើកិច្ចព្រមព្រៀងនេះម្តងទៀត នៅក្នុងពិធីដែលរៀបចំឡើងជាសាធារណៈ នៅវិមានប្រធានាធិបតីដែលព័ទ្ធជុំវិញទៅដោយហ្វូងបាតុករប្រឆាំងរដ្ឋាភិបាល ។
ក្នុងសុន្ទរកថាចាក់ផ្សាយតាមទូរទស្សន៍កាលពីល្ងាចថ្ងៃទី២២ ឧសភា លោកសាឡេហ៍ បានព្រមានថា ប្រទេសនឹងកើតមានសង្គ្រាមស៊ីវិលប្រសិនបើមេដឹកនាំក្រុមប្រឆាំងនៅតែបដិសេធមិនយល់ព្រមចំពោះលក្ខខណ្ឌរបស់លោក ។ លោកសាឡេហ៍ ដែលគ្រប់គ្រងប្រទេសយេម៉ែនអស់រយៈពេលជាង៣ទសវត្សមកហើយ នោះថ្លែងថា ប្រសិនបើពួកគេ (ក្រុមប្រឆាំង) មិនចង់ឱ្យប្រទេសធ្លាក់ចូលក្នុងសង្គ្រាមស៊ីវិលពួកគេត្រូវតែទទួលខុសត្រូវចំពោះការបង្ហូរឈាមដែលបណ្តាលឱ្យស្លាប់មនុស្សជាច្រើននាក់។
ទីភ្នាក់ងារព័ត៌មានផ្លូវការយេម៉ែន Saba រាយការណ៍ថា លោកសាឡេហ៍ បានបដិសេធមិនព្រមចុះហត្ថលេខាលើកិច្ចព្រមព្រៀងផ្ទេរអំណាចនោះក្រោយពីក្រុមប្រឆាំងបដិសេធមិនទៅវិមានប្រធានាធិបតីដើម្បីចុះហត្ថលេខាលើកិច្ចព្រមព្រៀងនោះជាមួយលោក ។
លោកសាឡេហ៍ ថ្លែងថា «ខ្ញុំនឹងចុះហត្ថលេខាលើកិច្ចព្រមព្រៀងនោះ ប្រសិនបើតំណាងរបស់ក្រុមប្រឆាំងមកកាន់វិមានប្រធានាធិបតី ដើម្បីចុះហត្ថលេខាជាមួយខ្ញុំក្នុងពេលតែមួយ ព្រោះក្រុមប្រឆាំងនឹងជាដៃគូរបស់យើង»៕
ចែករំលែកព័តមាននេះ