មានហេតុការណ៍មួយបង្កឱ្យមានការភ្ញាក់ផ្អើលដល់ប្រជាពលរដ្ឋ ក្រោយពីអ្នកឆ្លុះសត្វបានប្រទះឃើញស្ត្រីចំណាស់វ័យប្រមាណជាង៦០ឆ្នាំម្នាក់ ដេកស្លា.ប់នៅក្នុងព្រៃអាកាស្យា។ ខណៈអ្នកខ្លះសង្ស័យថា
ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា មានហេតុការណ៍មួយបង្កឱ្យមានការភ្ញាក់ផ្អើលដល់ប្រជាពលរដ្ឋ ក្រោយពីអ្នកឆ្លុះសត្វបានប្រទះឃើញស្ត្រីចំណាស់វ័យប្រមាណជាង៦០ឆ្នាំម្នាក់ ដេកស្លា.ប់នៅក្នុងព្រៃអាកាស្យា។ ខណៈអ្នកខ្លះសង្ស័យថា អាចជាកូនយកម្តាយមកបោះបង់ចោល ទាំងម្តាយមានជំងឺប្រចាំកាយនិយាយមិនរួច ហើយណាមួយអាកាសធាតុត្រជាក់ខ្លាំង និងអត់អាហារផង ទើបជនរងគ្រោះមិនអាចទ្រាំទ្របានស្លា.ប់បែបនេះតែម្ដង។
ពាក់ព័ន្ធករណីប្រទះឃើញស.ពស្ត្រីដេកស្លា.ប់ខាងលើនេះ បានកើតឡើងកាលពីវេលាម៉ោង៨និង០០នាទីយប់ថ្ងៃទី២៧ ខែវិច្ឆិកា ២០២៣ នៅចំណុចចម្ការអាកាស្យា ជិតផ្លូវក្រវ៉ាត់ក្រុង ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត។
បើតាមសម្ដីពីប្រជាពលរដ្ឋបានប្រាប់ឲ្យដឹងថា «កាលពី១ខែមុន គេប្រទះឃើញមានមនុស្ស២នាក់ដឹកស្ត្រីរងគ្រោះវ័យចំណាស់ម្នាក់តាមរថយន្តយកមកទម្លាក់ចោលនៅភូមិបាវិតកណ្តាលនេះ។ ដោយដាក់ការសង្ស័យថា កូនដឹកម្តាយចាស់ជរា មានជំងឺប្រចាំកាយយកមកបោះបង់ចោល ហើយដាក់ឲ្យដេកតាមចិញ្ចើមផ្លូវ តែក្រោយមកសមត្ថកិច្ចបានដឹកយកទៅដាក់នៅវត្តពោធិ៍ថ្មី ក្រុងបាវិតវិញ»។
ប្រភពដដែលបន្តថា «បន្ទាប់មក ស្ត្រីរងគ្រោះមិនព្រមនៅក្នុងវត្តនោះទេ (ទំនងជាវង្វេងស្មារតី) ដោយចេះតែរំកិលខ្លួនចុះពីលើគ្រែ ដើម្បីចេញទៅក្រៅវត្ត ហើយស្ត្រីរងគ្រោះមានជំងឺប្រចាំកាយ និយាយមិនសូវរួច និយាយមិនច្បាស់។ ដោយអ្នកខ្លះនិយាយថា ស្ត្រីរងគ្រោះនិយាយភាសាវៀតណាម ដូច្នេះសង្ស័យថា ជាជនជាតិវៀតណាមមករស់នៅស្រុកខ្មែរ ក្រុងបាវិតនេះ ហើយត្រូវកូនដឹកយកមកបោះបង់ចោល»។
ប្រភពដដែលបន្តថា ពេលនោះ សមត្ថកិច្ចបានព្យាយាមសាកសួររកអត្តសញ្ញាណ ដើម្បីរកសាច់ញាតិឲ្យមកទទួលខុសត្រូវវិញ ក៏ប៉ុន្តែមិនអាចស្គាល់ឈ្មោះថា តើជាជនជាតិខ្មែរយើង ឬជាជនជាតិវៀតណាមនោះទេ? ក្រោយមកសមត្ថកិច្ចយកទៅដាក់នៅក្នុងវត្ត ដើម្បីឲ្យគណៈកម្មការវត្ត និងព្រះសង្ឃមើលថែ។ ប៉ុន្តែប៉ុន្មានថ្ងៃមុននេះ (មុនថ្ងៃកើតហេតុ) ស្ត្រីរងគ្រោះស្រាប់តែរំកិលបាត់ខ្លួនចេញពីក្នុងវត្តតែម្ដង រហូតមកដល់យប់ថ្ងៃទី២៧ ខែវិច្ឆិកា អ្នកដើរឆ្លុះសត្វក៏ប្រទះឃើញស.ពស្ត្រីរងគ្រោះស្លា.ប់នៅក្នុងព្រៃអាកាស្យាតែម្ដងទៅ បង្កឱ្យមានការភ្ញាក់ផ្អើលយ៉ាងខ្លាំង។
រីឯអ្នកខ្លះទៀត ក៏បានប្រាប់ដែរថា គេស្គាល់ស្ត្រីរងគ្រោះនោះ គឺមានកូនធ្វើជាជាងជួសជុលម៉ូតូ រស់នៅភូមិស្វាយរៀង សង្កាត់ស្វាយរៀង ក្រុងស្វាយរៀង ហើយត្រូវកូនយកម្តាយទៅបោះបង់ចោលនៅក្រុងបាវិត។
បើតាមលោកវរសេនីយ៍ អែម សុវណ្ណារិទ្ធិ អធិការនៃអធិការដ្ឋាននគបាលក្រុងបាវិត ប្រាប់បានឲ្យដឹងថា «លោកបានធ្វើការស្រាវជ្រាវស្វែងរកក្រុមគ្រួសារស្ត្រីរងគ្រោះ១ខែមកហើយ គឺគ្មានតម្រុយនោះទេ។ ចំពោះអ្នកនិយាយថា ស្គាល់ស្ត្រីរងគ្រោះជាម្តាយជាងជួសជុលម៉ូតូនៅខាងជើងផ្សារវាលយន្តនោះ គឺមិនពិតទេ គ្រាន់តែមុខស្រដៀងគ្នាតែប៉ុណ្ណោះ ដោយសារជាងជួសជុលម៉ូតូរូបនោះបានបដិសេធថា «គាត់មិនបានដឹកម្តាយយកទៅបោះបង់ចោលនោះទេ ម្តាយគាត់គឺនៅផ្ទះជាមួយកូនៗទេ ហើយក៏បានបង្ហោះរូបម្តាយនៅលើហ្វេសប៊ុកទៀតផង»។
លោកអធិការបន្តទៀតថា «ស្ត្រីរងគ្រោះគឺជាមនុស្សអនាថា ត្រូវគេបោះបង់ចោល១ខែមកហើយ។ លោកក៏បានអំពាវនាវដល់ក្រុមគ្រួសារ ឬសាច់ញាតិរបស់ស.ពស្ត្រីរងគ្រោះផងដែរ គឺស.ពស្ត្រីរងគ្រោះត្រូវបានសមត្ថកិច្ចដឹកយកទៅដម្កល់នៅវត្តទួលតាឡុក ស្ថិតភូមិបាវិតកណ្តាល សង្កាត់បាវិត ដូច្នេះសូមមកទាក់ទងសមត្ថកិច្ច ដើម្បីយកទៅធ្វើបុណ្យតាមប្រពៃណី។ ប្រសិនបើគ្មានក្រុមគ្រួសារ ឬសាច់ញាតិមកទទួលទេនោះ សមត្ថកិច្ចនឹងសុំដីវត្តទួលតាឡុក ដើម្បីបញ្ចុះស.ពនាព្រឹកថ្ងៃទី២៨ ខែវិច្ឆិកា ឆ្នាំ២០២៣នេះហើយ នៅក្នុងវត្តទួលតឡុក៕
ចែករំលែកព័តមាននេះ