ព្រះធម្មវន វាសី ចន្ទ មុនី បាននិមន្តប្រោះព្រំនៅភូមិគ្រឹះ អ្នកឧកញ៉ា សុខ គង់ ហើយព្រះអង្គមានសទ្ធាជ្រះថ្លាបានវេរបច្ច័យសរុបជាង១ម៉ឺនដុល្លារ ចូលរួមកសាងព្រះពុទ្ធបដិមាកម្ពស់១០៨ម៉ែត្រលើភ្នំបូកគោ
រាជធានីភ្នំពេញ ៖ ព្រះធម្មវន វាសី ចន្ទ មុនី បាននិមន្តប្រោះព្រំនៅភូមិគ្រឹះ អ្នកឧកញ៉ា សុខ គង់ ហើយព្រះអង្គមានសទ្ធាជ្រះថ្លាបានវេរបច្ច័យសរុបជាង១ម៉ឺនដុល្លារ ចូលរួមកសាងព្រះពុទ្ធបដិមាកម្ពស់១០៨ម៉ែត្រលើភ្នំបូកគោ។
កាលថ្ងៃទី២៥ ខែវិច្ឆិកា ឆ្នាំ២០២៣នេះ ព្រះធម្មវន វាសី ចន្ទ មុនី បាននិមន្តប្រោះព្រំនៅភូមិគ្រឹះអ្នកឧកញ៉ា សុខ គង់ បន្ទាប់មកនិមន្តទតការដ្ឋានសាងសង់ព្រះពុទ្ធបដិមាកម្ពស់១០៨ម៉ែត្រនៅលើភ្នំបូកគោ និងព្រះអង្គបានប្រោះព្រំពុទ្ធបរិស័ទមកពីទីជិតឆ្ងាយយ៉ាងច្រើនកុះករដែលបានឡើងមកជួបព្រះអង្គនៅលើភ្នំបូកគោ ក្នុងនោះព្រះអង្គមានសទ្ធាជ្រះថ្លាបានវេរបច្ច័យសរុបចំនួន១៤,៥០០ដុល្លារអាមេរិក និង៣លានរៀល ដើម្បីចូលរួមកសាងព្រះពុទ្ធបដិមា កម្ពស់១០៨ម៉ែត្រលើភ្នំបូកគោ។
ប្រជាពលរដ្ឋខ្មែរដឹងហើយថា ព្រះធម្មវន វាសី ចន្ទ មុនី មានភាពល្បីល្បាញខ្លាំង គេកត់សម្គាស់ឃើញថា វត្តមានរបស់ព្រះអង្គបាននិមន្តទៅទីណាតែងតែមានប្រជាពុទ្ធបរិស័ទជាច្រើននាក់រង់ចាំ ដើម្បីទទួលស្វាគមន៍ព្រះអង្គ។ មិនតែប៉ុណ្ណោះ ព្រះធម្មវន វាសី ចន្ទ មានទឹកផ្ទៃល្អតែងតែចែករំលែកទានដល់អ្នកខ្វះខាតជារឿយៗ ហើយព្រះអង្គបានចូលរួមចំណែកសប្បុរស និងជួយសង្គមផងដែរ ដូចជា ៖ កាកបាទក្រហមកម្ពុជា មន្ទីរគន្ធបុប្ឆា និងមន្ទីរកុមារអង្គរជាដើម។
យោងតាមការចុះផ្សាយកាលថ្ងៃទី៤ ខែមករា ឆ្នាំ២០២៣ បានឲ្យដឹងថា ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ព្រះពុទ្ធបដិមាលើកំពូលភ្នំបូកគោ នឹងក្លាយជាមជ្ឈមណ្ឌលទេសចរណ៍សាសនាដ៏ធំនៅកម្ពុជា និងពិភពលោក នឹងអាចទាក់ទាញភ្ញៀវទេសចររាប់ម៉ឺននាក់ ទៅកម្សាន្តក្រោយសាងសង់រួច។
ឯកឧត្តម ជា សុផារ៉ា បានមានប្រសាសន៍ថា ទន្ទឹមនឹងការអភិវឌ្ឍន៍លើភ្នំបូកគោ ក្រុមហ៊ុនសុខា បានយកចិត្តទុកដាក់លើវិស័យជំនឿសាសនា ដែលជាវប្បធម៌ទំនៀមទម្លាប់ប្រពៃណីដ៏ផូរផង់របស់ប្រជាពលរដ្ឋខ្មែរជាយូរលង់ណាស់មកហើយ ។ ការផ្តួចផ្តើមសាងសង់ព្រះពុទ្ធបដិមាដ៏ធំមួយអង្គ នៅលើខ្នងភ្នំបូកគោនេះ ដើម្បីជាទីសក្ការៈសម្រាប់ពុទ្ធសាសនិក ប្រតិបត្តិធម៌ ឧទ្ទិសសុំសេចក្តីសុខ សន្តិភាព សេចក្តីចម្រើនរុងរឿង។
ឯកឧត្តម បានបញ្ជាក់ថា ព្រះពុទ្ធបដិមា ដែលសាងសង់នេះ មានកម្ពស់ខ្ពស់ជាងគេក្នុងព្រះរាជាណាចក្រកម្ពុជា ហើយស្ថិតនៅក្នុងចំណោមព្រះពុទ្ធបដិមាដ៏ខ្ពស់ៗនៅលើពិភពលោកផងដែរ។ ខ្ញុំសូមថ្លែងអំណរគុណដល់សុខាអូតែល ដែលបានរួមចំណែកយ៉ាងសកម្មនៅក្នុងការអភិវឌ្ឍន៍តំបន់រមណីយដ្ឋានបូកគោ និងបានផ្តួចផ្តើមសាងសង់ព្រះពុទ្ធបដិមានេះឡើង ដែលនឹងក្លាយទៅជាមជ្ឈមណ្ឌលទេសចរណ៍ព្រះពុទ្ធសាសនាដ៏ធំមួយនៅព្រះរាជាណាចក្រកម្ពុជា និងពិភពលោក ។
អ្នកឧកញ៉ាបណ្ឌិត សុខ គង់ មានចក្ខុវិស័យ និងសទ្ធាជ្រះថ្លាយ៉ាងមុតមាំក្នុងការកសាងព្រះពុទ្ធបដិមាកម្ពស់១០៨ម៉ែត្រ ហើយព្រះពុទ្ធបដិមាអង្គនេះ នឹងគង់នៅជាសម្បត្តិវប្បធម៌ជាតិ ត.ជំនាន់សម្រាប់ជាទីសក្ការ:ដ៏ឧត្តុងឧត្តមរបស់ពុទ្ធសាសនិកជនទាំងអស់គ្នា និងទុកជាស្នាដៃនៃកេរ្តិ៍មរកតដល់កូនចៅជំនាន់ក្រោយ៕
ចែករំលែកព័តមាននេះ