ធនាគារកណ្តាលប្រទេសតួកគី ដំឡើងអត្រាការប្រាក់ ៤០% យ៉ាងភ្ញាក់ផ្អើល
តួកគី ៖ ធនាគារកណ្តាលរបស់ប្រទេសតួកគី បានដំឡើងអត្រាការប្រាក់របស់ខ្លួនយ៉ាងភ្ញាក់ផ្អើល
តួកគី ៖ ធនាគារកណ្តាលរបស់ប្រទេសតួកគី បានដំឡើងអត្រាការប្រាក់របស់ខ្លួនយ៉ាងភ្ញាក់ផ្អើលរហូតដល់ ៤០% ដែលជាផ្នែកនៃយុទ្ធនាការរួមគ្នា ដើម្បីដោះស្រាយអតិផរណាដែលកំពុងកើនឡើងនៅក្នុងប្រទេសនេះ។ នេះបើយោងតាមប្រភពពី BBC ចេញផ្សាយកាលពីថ្ងៃទី២៣ ខែវិច្ឆិកា កន្លងទៅ។
ការដំឡើងអត្រាការប្រាក់ពីមុនចំនួន ៣៥% គឺជាតួលេខធំជាងការរំពឹងទុករួចទៅហើយ ប៉ុន្តែទោះយ៉ាងណា ធនាគារកណ្តាលប្រទេសតួកគីបានណែនាំថា អត្រាការប្រាក់កំពុងខិតជិតដល់កម្រិតដែលត្រូវការចាំបាច់ ដើម្បីចាប់ផ្តើមកាត់បន្ថយលើវិបត្តិអតិផរណា ហើយអ្នកជំនាញបានព្យាករណ៍ថា នឹងកើនឡើងបន្ថែមទៀត និងខ្ពស់បំផុតនៅក្នុងខែឧសភាឆ្នាំក្រោយប្រហែល ៧០-៧៥% ខណៈដែលធនាគារកណ្តាលនៅទូទាំងពិភពលោក បានដំឡើងអត្រាការប្រាក់ក្នុងការប៉ុនប៉ងដើម្បីទប់ស្កាត់បញ្ហាអតិផរណា។
លោកប្រធានាធិបតីតួកគី Recep Tayyip Erdogan បានទប់ទល់នឹងទម្លាប់នៃវិបត្តិសេដ្ឋកិច្ចពីមុន ដោយលើកហេតុផលថា អត្រាការប្រាក់ខ្ពស់ជាងនឹងធ្វើឱ្យតម្លៃកើនឡើង ប៉ុន្តែទោះជាយ៉ាងណា ចាប់តាំងពីការបោះឆ្នោតឡើងវិញកាលពីខែឧសភា ជំហររបស់លោកបានផ្លាស់ប្តូរទាំងស្រុង។
ធនាគារកណ្តាលតួកគី ក្រោមការដឹកនាំរបស់លោកស្រី Hafize Gaye Erkan ទេសាភិបាលថ្មី បានអះអាងថា «ល្បឿននៃការរឹតបន្តឹងរូបិយវត្ថុនឹងថយចុះ ហើយការរឹតបន្តឹងនឹងត្រូវបានបញ្ចប់ក្នុងរយៈពេលដ៏ខ្លី។ អត្រាការប្រាក់នឹងស្ថិតក្នុងកម្រិតខ្ពស់ ដរាបណាចាំបាច់ដើម្បីធានាបាននូវស្ថិរភាពតម្លៃប្រកបដោយនិរន្តរភាព»។
សេដ្ឋកិច្ចរបស់ប្រទេសតួកគី បានកើនឡើងយ៉ាងខ្លាំងនៅក្នុងឆ្នាំដំបូងនៃការដឹកនាំរបស់លោកប្រធានាធិបតី Recep Tayyip Erdogan ប៉ុន្តែនៅក្នុងប៉ុន្មានឆ្នាំថ្មីៗនេះ សេដ្ឋកិច្ចប្រទេសស្ថិតនៅចំណុចប្រសព្វនៃអឺរ៉ុបអាគ្នេយ៍ និងអាស៊ីខាងលិចមួយនេះ បានរង្គោះរង្គើតាមរយៈព្រឹត្តិការណ៍ជាច្រើនកើតឡើងពេលថ្មីៗនេះ៕
ចែករំលែកព័តមាននេះ