កាសែតបាងកកប៉ុស្តិ៍របស់ថៃជាភាសាអង់គ្លេសនៅថ្ងៃទី២២ ឧសភា បានចេញផ្សាយការស្ទង់មតិថ្មីមួយទាក់ទិននឹងការបោះឆ្នោតទូទៅរបស់ប្រទេសថៃ ដែលនឹងរៀបចំឡើងនៅថ្ងៃទី៣ កក្កដា ខាងមុខ ដោយតាមលទ្ធផល ពលរដ្ឋក្នុងចំនួនដ៏ច្រើននឹងបោះឆ្នោតឱ្យគណបក្សភឿថៃជាងគណបក្សប្រជាធិបតេយ្យ ។ ការស្ទង់មតិនេះដែលធ្វើឡើងចាប់ពីថ្ងៃទី១៩ ដល់ថ្ងៃទី២២ ឧសភា លើអ្នកដែលមានសិទ្ធិបោះឆ្នោតចំនួន៣.៥៨៤នាក់ នៅទូទាំងប្រទេសបង្ហាញថា ៤១,២២ភាគរយនិយាយថា ពួកគេនឹងបោះឆ្នោតឱ្យគណបក្សភឿថៃ ចំណែក៣៦,៨៨ភាគរយ និយាយថា ពួកគេនឹងបោះឆ្នោតឱ្យគណបក្សប្រជាធិបតេយ្យ៣,៨៨ភាគរយ បោះឆ្នោតឱ្យគណបក្ស Bhunjai thai និង៩,២៧ភាគរយទៀត នៅមិនទាន់សម្រេចចិត្តនៅឡើយ ។
អ្នកវិភាគពីស្ថានការណ៍នយោបាយក្នុងប្រទេសថៃនិយាយថា គណបក្សភឿថៃដែលមានលោកស្រីយីងឡាក់ ស៊ីណាវ៉ាត្រា ប្អូនស្រីពៅរបស់លោកថាក់ស៊ីន ជាបេក្ខនារីសម្រាប់តំណែងនាយករដ្ឋមន្ត្រីមានសង្ឃឹមឈ្នះឆ្នោតជាងគណបក្សប្រជាធិបតេយ្យ ដែលមានលោកអាប់ភីស៊ីត វ៉េចាជីវ៉ា ។ អ្នកវិភាគនោះនិយាយថា បើទោះបីជាលោកស្រីយីងឡាក់ ទើបចូល
ប្រឡូកក្នុងឆាកនយោបាយក៏ពិតមែន ប៉ុន្តែលោកស្រីហាក់ដូចជាមានប្រជាប្រិយភាព ហើយទទួលបានការគាំទ្រយ៉ាងច្រើននាពេលលោកស្រីចាប់ផ្តើមធ្វើយុទ្ធនាការឃោសនាបោះឆ្នោតកាលពីពេលថ្មីៗកន្លងមកនេះ ៕
ចែករំលែកព័តមាននេះ