ខេត្តកំពង់ឆ្នាំង ៖ ថ្លែងចេញពីទឹកដីខេត្តកំពង់ឆ្នាំង សម្តេចធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថាគោលនយោបាយរបស់រាជរដ្ឋាភិបាល អាណត្តិទី៧ថ្មីនេះ នឹងបន្តយកគោលនយោបាយរាជរដ្ឋាភិបាលចាស់…
ខេត្តកំពង់ឆ្នាំង ៖ ថ្លែងចេញពីទឹកដីខេត្តកំពង់ឆ្នាំង សម្តេចធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថាគោលនយោបាយរបស់រាជរដ្ឋាភិបាល អាណត្តិទី៧ថ្មីនេះ នឹងបន្តយកគោលនយោបាយរាជរដ្ឋាភិបាលចាស់ សម្រាប់ការអនុវត្តជាមួយបណ្តាប្រទេសជាមិត្តទាំងអស់ ។
ក្នុងសម្ភោធបើកឲ្យប្រើប្រាស់ជាផ្លូវការ “កំណាត់ផ្លូវជាតិលេខ៥ ចាប់ពីព្រែក ក្តាម ទៅដល់បាត់ដំបង ប្រវែងសរុប ២៤៦,១៥គីឡូម៉ែត្រ និងបើកការដ្ឋានសាងសង់កំណាត់ផ្លូវជាតិលេខ៥ ចាប់ពីសិរីសោភ័ណ្ឌ ទៅដល់ប៉ោយប៉ែត ប្រវែងសរុប ៣៥,១៤គីឡូម៉ែត្រ” នាព្រឹកថ្ងៃទី២២ ខែវិច្ឆិកា ឆ្នាំ២០២៣ សម្តេចធិបតី នាយករដ្ឋមន្ត្រី បានលើកឡើងថា នៅពេលជួបជាមួយថ្នាក់ដឹកនាំបណ្តាប្រទេសនានា គេសុទ្ធតែចង់ដឹងពីគោលជំហររបស់រាជរដ្ឋាភិបាល អាណត្តិទី៧ថ្មី ថាតើគោលនយោបាយការទូតការបរទេសយ៉ាងដូច្នេះ ?
ជាការឆ្លើយតប សម្តេចធិបតី បានបញ្ជាក់ថា ៖ «ខ្ញុំសូមប្រាប់ថា គោលនយោបាយការទូតរបស់រដ្ឋាភិបាលថ្មី អាណត្តិទី៧ គឺផ្អែកលើគោលនយោបាយនិរន្តភាព និងចេរន្តភាព មានន័យថា គឺបន្តនូវគោលនយោបាយ ដែលរាជរដ្ឋាភិបាលចាស់ (អាណត្តិទី៦) បានធ្វើពិសេសនោះ ការបង្កើត និងថែរក្សា នៃទំនាក់ទំនងជាមួយបណ្តាប្រទេសទាំងអស់ ដោយផ្អែកលើគោលការណ៍ ឯករាជ គោរពគ្នាទៅវិញទៅមកតាមច្បាប់អន្តរជាតិ» ។
ជាមួយគ្នានោះដែរ សម្តេចធិបតី បានឲ្យដឹងថា នៅឆ្នាំនេះ គឺជាខួបលើកទី៧០ នៃទំនាក់ទំនងការទូតរវាងកម្ពុជា- ជប៉ុន។ សម្តេច បន្តថា កាលពីម្សិលមិញ ក្នុងជំនួបជាមួយអតីតរាជទូតជប៉ុន និងជាអ្នកផ្តួចផ្តើមឲ្យមានការបាញ់កាំជ្រួច ដើម្បីអបអរសារទខូបលើកទី៧០ឆ្នាំ នៃទំនាក់ទំនងការទូតរវាងកម្ពុជា-ជប៉ុន ផងដែរ ។
សម្តេចធិបតី ក៏បានបន្តថា ប្រទេសជប៉ុន គឺជាប្រទេសមួយមានទំនាក់ទំនងជាមួយកម្ពុជាមុនគេ បើធៀបនឹងប្រទេសដ៏ទៃទៀត ព្រោះថា ប្រទេសកម្ពុជា បានទទួលឯករាជ្យ រយៈពេល៧០ឆ្នាំមកហើយ។ ហើយអ្វីដែលពិសេសនោះ គឺកម្ពុជាបានធ្វើទំនាក់ទំនងជាមួយគ្នារយៈពេល៧០ឆ្នាំមកហើយ ដែលចំណុចនេះ អាចនិយាយថា មានទំនាក់ទំនងមុនគេ ៕
ចែករំលែកព័តមាននេះ