ខេត្តកំពង់ឆ្នាំង ៖ ក្រៅពីមានជំនឿយ៉ាងមុតមាំថា ព្រះអង្គធម្មវនវាសី ចន្ទ័ មុនី គង់នៅវត្តចន្ទប្បជោត្តនារាម ហៅវត្តតាសុត ក្នុងភូមិភូមិប៉ាតឡាង ឃុំក្រាំងលាវ…
ខេត្តកំពង់ឆ្នាំង ៖ ក្រៅពីមានជំនឿយ៉ាងមុតមាំថា ព្រះអង្គធម្មវនវាសី ចន្ទ័ មុនី គង់នៅវត្តចន្ទប្បជោត្តនារាម ហៅវត្តតាសុត ក្នុងភូមិភូមិប៉ាតឡាង ឃុំក្រាំងលាវ ស្រុករលាប្អៀរ ថាមានបារមីពូកែស័ក្តិសិទ្ធិធ្វើឱ្យប្រជាពលរដ្ឋភ្លូកទឹកភ្លូកដី ដើម្បីទៅជួបព្រះអង្គរួចមក ស្រាប់តែប៉ុន្មានថ្ងៃនេះ ក៏មានប្រជាពលរដ្ឋមានជំនឿបាននាំគ្នាបោចស្មៅនៅមុខបរិវេណមុខអាស្រមរបស់ព្រះអង្គដោយជឿជាក់ថា «ជាឱសថព្យាបាលជំងឺយ៉ាងស័ក្តិសិទ្ធិ» ។
លោក ហែម ទីន អាយុ៦០ឆ្នាំ ជាមេភូមិប៉ាតឡាង ឃុំក្រាំងលាវ បានប្រាប់តាមទូរសព្ទ័ កាលពីរសៀលថ្ងៃទី២១ ខែវិច្ឆិកា នេះថា រហូតមកដល់ពេលនេះ ក៏នៅតែមានប្រជាពលរដ្ឋនាំគ្នាបោចស្មៅនៅមុខបរិវេណអាស្រមលោកនៅឡើយ ប៉ុន្តែគ្រាន់តែស្បើយជាងប៉ុន្មានបន្តិច ។ លោកមេភូមិប៉ាតឡាងបានបញ្ជាក់ថា ប្រហែល២ថ្ងៃមុន គាត់បានឃើញប្រជាពលរដ្ឋយ៉ាងច្រើននាំគ្នាដកស្មៅនៅមុខអាស្រម ព្រះអង្គ ចន្ទ័ មុនី គាត់ក៏ដើរទៅសួរ ត្រូវបានបងប្អូនប្រជាពលរដ្ឋទាំងនោះប្រាប់ថា (ដកធ្វើថ្នាំ ដើមអីក៏ដោយនៅមុខអាស្រមព្រះអង្គ គឺជាដើមថ្នាំទាំងអស់) ។
លោកមិនដឹងថា បងប្អូនប្រជាពលរដ្ឋបានព័ត៌មាននេះពីណាទេ? តាមគាត់សម្គាល់ដើម្បីរុក្ខជាតិដែលពួកគាត់បោចយកទៅ គឺមានដើមស្មៅគ្រប់ប្រភេទ ដើមបន្លាប្រក្រាបជាដើមឱ្យតែដើមរុក្ខជាតិតូចៗដុះប្រឡោះដើមផ្កាម្លិះ (សួនផ្កាម្លេះលោកដាំ) គឺដកយកទាំងអស់ ដែលមកដល់ថ្ងៃនេះ រិចអស់ដើមស្មៅទៅហើយ (ដូចឃើញក្នុងរូបភាព) ។
ចំពោះការអះអាងរបស់បងប្អូនប្រជាពលរដ្ឋថា យកទៅធ្វើថ្នាំ ពូកែឬមិនពូកែ លោកមិនដឹងទេ ព្រោះមិនទាន់មាននរណាមកអះអាងថា ជាពីជំងឺអ្វីដែរ ។ មិនត្រឹមតែដើមស្មៅទេ ដែលបងប្អូនមានជំនឿថា ជាឱសថព្យាបាល សូម្បីផ្កាឈូក ផ្កាម្លិះដែលយកថ្វាយព្រះ ក៏ពួកគាត់នាំគ្នាយកទៅដែរ ថាយកទៅដាំទឹកផឹកព្យាបាលរោគ ។
លោកមេភូមិប៉ាតឡាងបានបញ្ជាក់ថា ថ្ងៃនេះ (២១ វិច្ឆិកា) ព្រះអង្គមិនគង់នៅទេ ឮថា ទៅខេត្តកំពង់ស្ពឺនិងកំពត ប៉ុន្តែនៅតែមានពុទ្ធបរិស័ទនៅក្នុងបរិវេណវត្តនៅឡើយ ។ បច្ចុប្បន្ន មានបង្គន់អនាម័យចល័តត្រឹមត្រូវ គឺបើទោះបីប្រជាពលរដ្ឋមកច្រើនក៏មិនជាអីប៉ុន្មានដែរ ដោយសារការរៀបចំរបស់អាជ្ញាធរក៏ដូចជា គណៈកម្មាការវត្ត ដែលសូម្បីតែអង្គកឋិនកាលពីថ្មីៗនេះ មានមនុស្សដល់ទៅជាង៤ម៉ឺននាក់ណែនណាន់តាន់តាប់ក៏មិនជាបញ្ហាប៉ុន្មានដែរ ។
ដោយឡែក នៅជុំបរិវេណវត្តបានក្លាយជាទីផ្សារមួយទៅហើយ ព្រោះមានអាជីវករចូលលក់ដូរគ្រប់ប្រភេទ រាប់តាំងពីត្រីងៀត ត្រីឆ្អើរ គ្រឿងបរិភោគ ម្ហូបអាហារ ភេសជ្ជៈជាដើម ដែលបានក្លាយជាប្រភពចំណូល ប្រចាំថ្ងៃរបស់អាជីវករទៅវិញ ។ សូម្បីអ្នកផ្សារខ្លះដែលលក់មិនដាច់ក៏យករបស់ខ្លួនទៅដាក់តាំងលក់នៅវត្តនោះដែរ ។
ចែករំលែកព័តមាននេះ