ទីក្រុងប៉េកាំង៖ ប្រទេសចិនបានបញ្ចេញប្រតិកម្មតបទៅនឹងចំណាត់ការរបស់អាមេរិកដែលរឹបអូសកប៉ាល់ដឹកប្រេងដែលបើកចេញ-ចូលដែនសមុទ្រប្រទេសវេណេហ្ស៊ូអេឡា។ ពោលគឺចាប់នាវាដែលបំពានការដាក់ទណ្ឌកម្មរបស់អាមេរិក។ ចិនយល់ថាទង្វើរបស់អាមេរិកជាការរំលោភយ៉ាងធ្ងន់ធ្ងរទៅលើច្បាប់អន្តរជាតិ។ ម៉្យាងទៀត ចិនសូមប្រឆំាងជំទាស់នឹងការដាក់ទណ្ឌកម្មជាឯកតោភាគី និងទាំងខុសច្បាប់។
អ្នកនាំពាក្យក្រសួងការបរទេសចិន លោកលីនចៀន (Lin Jian) ថ្លែងថាវេណេហ្ស៊ូអេឡាមានសិទ្ធិគ្រប់យ៉ាងដើម្បីបង្កើតទំនាក់ទំនងជាមួយប្រទេសដទៃទៀត។ ការថ្លែងដូច្នេះបន្ទាប់ពីមន្ត្រីរដ្ឋាភិបាលអាមេរិកអះអាងថារដ្ឋាភិបាលរបស់ខ្លួនបានស្ទាក់ចាប់កប៉ាល់ដឹកប្រេងឆៅមួយគ្រឿងនៅលើដែនសមុទ្រអន្តរជាតិជិតឆ្នេរសមុទ្រប្រទេសវេណេហ្ស៊ូអេឡា។
នេះជាការចាប់កប៉ាល់ជាលើកទី២នៅក្នុងសប្ដាហ៍នេះ និងជាលើកទីបីនៅក្នុងរយៈពេលមិនដល់២សប្ដាហ៍ផង។ ការចាប់កប៉ាល់ដឹកប្រេងកំពុងធ្វើឱ្យគេបារម្ភថាការផ្គត់ផ្គង់ប្រេងឆៅនៅលើទីផ្សារអន្តរជាតិអាចនឹងមានបញ្ហារអាក់រអួល។ ម៉្យាងទៀត គេសង្កេតឃើញថាក្រោយពេលចាប់កប៉ាល់ដឹកប្រេងម្ដងៗ ប្រេងឆៅចាប់ផ្ដើមឡើងថ្លៃ។
ក្រុមការងាររបស់អង់គ្លេសឈ្មោះវេងហ្កាត (Vanguard) ដែលធ្វើការលើផ្នែកគ្រប់គ្រងហានិភ័យដែនសមុទ្រ រួមជាមួយប្រភពពីភ្នាក់ងារសន្តិសុខដែនសមុទ្ររបស់អាមេរិកបានកំណត់មុខសញ្ញាថានាវាដឹកប្រេងមួយគ្រឿងនោះឈ្មោះបេឡាមួយ (Bella 1)។ នេះជាប្រភេទនាវាដឹកប្រេងខ្នាតយក្សដែលត្រូវក្រសួងរតនាគារអាមេរិកដាក់ទណ្ឌកម្ម។ ក្រសួងអះអាងថានាវានេះជាប់ពាក់ព័ន្ធនឹងប្រទេសអ៊ីរ៉ង់។
ប្រភពខ្លះបង្ហើបឱ្យដឹងថានៅពេលអាមេរិកបញ្ជូនកម្លាំងទៅចុះចាប់នាវាដឹកប្រេងឈ្មោះ Bella 1 នោះ នាវានេះនៅទទេ។ មានន័យថាមិនទាន់ដាក់ប្រេងនៅលើនោះទេ។ គេដឹងថាកាលពីឆ្នាំ២០២១ នាវានេះធ្លាប់ដឹកជញ្ជូនប្រេងឆៅពីប្រទេសវេណេហ្ស៊ូអេឡាទៅប្រទេសចិន។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ