អ្នកទទួលខុសត្រូវជាន់ខ្ពស់ប៉ាឡេស្ទីនម្នាក់អះអាងកាលពីថ្ងៃទី២១ ឧសភា ថា អាជ្ញាធរប៉ាឡេស្ទីននឹងស្នើសុំការទទួលស្គាល់ជារដ្ឋសមាជិកមួយរបស់អ.ស.បនាខែកញ្ញាខាងមុខនេះ។
លោកណាប៊ីល ចាអាស់ ទីប្រឹក្សារបស់លោកប្រធានាធិបតីម៉ាមូដ អាប់បាស់ ក្នុងពេលដំណាលគ្នាក៏ស្នើផងដែរដល់សហរដ្ឋអាមេរិកដែលទទូចឱ្យមានដំណោះស្រាយចរចាមួយរវាងអីុស្រាអែល និងប៉ាឡេស្ទីនឱ្យប្រកាន់យកជំហរដូចបណ្តាប្រទេសដែលបានទទួលស្គាល់រដ្ឋប៉ាឡេស្ទីនមួយរួចហើយ។
អ្នកទទួលខុសត្រូវប៉ាឡេស្ទីនម្នាក់ទៀតលោកណាប៊ីល អាប៊ូអែរដាយណា បញ្ជាក់ថា ការផ្តួចផ្តើមគំនិតជាឯកតោភាគីនេះនៅមុខមហាសន្និបាតអ.ស.បអាចផ្អាកប្រសិនបើរដ្ឋអីុស្រាអែលយល់ព្រមងាកទៅរកការពន្យារពេលសាងសង់លំនៅឋានរបស់ពួកជ្វីហ្វនៅស៊ីសហ្ស៊កដានី។ អ្នកទទួលខុសត្រូវរូបនេះបន្តថា ជំហររបស់យើងគឺទុកឱកាសមួយដល់អីុស្រាអែលរហូតដល់ខែកញ្ញាងាកមករកតុចរចាដោយឈរលើមូលដ្ឋាននៃការបញ្ឈប់សកម្មភាពសាងសង់លំនៅឋាន។
ប្រធានាធិបតីអាមេរិក លោកបារ៉ាក់ អូបាម៉ា កាលពីថ្ងៃទី១៩ ឧសភាកន្លងមកនេះបានលើកឡើងពីគំនិតបង្កើតរដ្ឋបា៉ឡេស្ទីនមួយដោយយកព្រំដែនឆ្នាំ១៩៦៧ គឺមុនសង្គ្រាម៦ថ្ងៃ និងការដណ្តើមយកតំបន់សីុសហ្ស៊កដានី ជ្រោយហ្គាហ្សា និងហ្សេរុយសាឡឹមខាងកើត ដោយអីុស្រាអែល ក៏ប៉ុន្តែលោកបានស្នើដល់ពួកប៉ាឡេស្ទីនកុំឱ្យធ្វើឱ្យអីុស្រាអែលស្ថិតនៅឯកោក្នុងអ.ស.ប៕
ចែករំលែកព័តមាននេះ