នាយករដ្ឋមន្ត្រី ផ្តាំទៅសហជីព កុំយកកម្មករកម្មការិនី ទៅធ្វើជាការងារនយោបាយ
រាជធានីភ្នំពេញ ៖ ថ្លែងជាសាធារណៈ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងសារមួយ ទៅកាន់សហជីព ឲ្យដើរតួរនាទី…
រាជធានីភ្នំពេញ ៖ ថ្លែងជាសាធារណៈ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងសារមួយ ទៅកាន់សហជីព ឲ្យដើរតួរនាទី ត្រូវជំនាញវិជ្ជាជីវៈ ត្រូវជាតំណាងកម្មករ កម្មការរិនី សម្រាប់ដោះស្រាយបញ្ហា ការពារអត្ថប្រយោជន៍ កម្មករនិយោជិត តែកុំយកឈ្មោះជាសហជីព ទាញកម្មករកម្មការិនី ចូលទៅក្នុងនយោបាយ ព្រោះអត់ចំណេញទេ ។
ក្នុងឱកាស អញ្ជើញជួបសំណេះសំណាល ជាមួយកម្មករ និយោជិត ២ម៉ឺននាក់ នៅតាមបណ្តារោងចក្រ សហគ្រាស ដែលមានមូលដ្ឋាន ក្នុងខណ្ឌកំបូល រាជធានីភ្នំពេញ នាថ្ងៃទី២១ ខែវិច្ឆិកានេះ សម្តេចធិបតី ហ៊ុន ម៉ាណែត បានលើកឡើងយ៉ាងដូច្នេះថា ៖ “ក្នុងរយៈពេលមួយទស្សវត្សជាងនេះ ខ្ញុំឃើញថា ការដោះស្រាយបញ្ហារបស់យើង បងប្អូនដែលមានទំនាស់ គឺយើងប្រកាន់ នូវជំហរសុខដុមរមនា គោរពគ្នា ហើយដោះស្រាយ ដោយសន្តិវិធី ហើយសូមរួមនៅក្នុងការថែរក្សា នូវលំនឹង និងស្ថេរភាព និងបរិស្ថាននេះតទៅទៀត ធ្វើយ៉ាងណាឲ្យរោងចក្រសហគ្រាសយើង បរិស្ថានការងាររបស់យើង ទៅជាកន្លែងដែលសុខដុមរមនា មានអ្វីនិយាយគ្នា រវាងកម្មករ សហជីព” ។
សម្តេចធិបតី នាយករដ្ឋមន្ត្រី បានគូសបញ្ជាក់ថា ៖ “សូមបន្តចូលរួមជាមួយរាជរដ្ឋាភិបាល នៅក្នុងការថែរក្សាលំនឹង នៅក្នុងការអនុវត្តគោលការណ៍ផ្សេងៗ សហជីពវិជ្ជាជីវៈ សូមដើរតួរនាទីជំនាញ តាមអាជីពរបស់ខ្លួន ដើម្បីតំណាងកម្មករកម្មការិនី កុំយកឈ្មោះជាសហជីព តែប្រមូលបងប្អូន ទៅធ្វើការងារអ្វីផ្សេង ជាពិសេសការងារនយោបាយ វាអត់ចំណេញ មកធ្វើការងារតំណាងសិទ្ធិកម្មករ កម្មការិនី ដោះស្រាយបញ្ហារឿងកម្មករ កម្មការិនី កុំយកជ្រក ក្រោមរូបភាពនេះ ទៅយកបងប្អូនទៅធ្វើការងារអីផ្សេង ខុសវានាំឲ្យបញ្ហា” ។
ជាមួយគ្នានោះដែរ សម្តេចធិបតី បញ្ជាក់ទៀថា “បើចង់ធ្វើជាការងារតំណាងប្រធានបទអ្វី រៀបចំឲ្យចំទៅ បងចង់ធ្វើការងារសិទ្ធិមនុស្ស រៀបចំជា NGO ដើរតួរនាទីសម្រាប់ការងារសិទ្ធិមនុស្សឲ្យចំទៅ បើចង់ការពារបរិស្ថាន រៀបចំជាសង្គមស៊ីវិល ឬអង្គការបរិស្ថាន ឲ្យចំការពារទៅ យើងធ្វើការស្រួលនិយាយគ្នា ។
សម្តេចធិបតីបានបន្ថែមថា កុំជ្រកក្រោម រូបភាពយកដៃបងប្អូនកម្មករ កម្មការិនី អាជីព អង្គការវិជ្ជាជីវៈ យកទៅធ្វើអីផ្សេង ខុសជំនាញ សិទ្ធិសេរីភាព បងប្អូនសហជីពយើងរាប់ពាន់ ហើយខ្ញុំអរគុណណាស់ សហជីពរស់យើងទាំងអស់ ដែលធ្វើការងារបំពេញជាតំណាង របស់កម្មករ និយោជិតបានល្អ នៅក្នុងការដោះស្រាយ និងជាតំណាងក្នុងការចរចារ អត្ថប្រយោជន៍ផ្សេងៗ ឲ្យបងប្អូនយើងដោយសន្តិវិធីនេះ គឺជាអ្វី ដែលជាប្រពៃណី ដែលយើងត្រូវធ្វើ” ៕
ចែករំលែកព័តមាននេះ