WADA ពិន័យ OCA ៥០ម៉ឺនដុល្លារ រឿងទង់ជាតិកូរ៉េខាងជើងនៅកីឡាអាស៊ីលើកទី១៩
អន្តរជាតិ ៖ ទីភ្នាក់ងារប្រឆាំងសារធាតុញៀនពិភពលោក ហៅកាត់ថា WADA បានពិន័យក្រុមប្រឹក្សា
អន្តរជាតិ ៖ ទីភ្នាក់ងារប្រឆាំងសារធាតុញៀនពិភពលោក ហៅកាត់ថា WADA បានពិន័យក្រុមប្រឹក្សាអូឡាំពិកអាស៊ី ហៅកាត់ថា OCA ទឹកប្រាក់ ៥០ម៉ឺនដុល្លារអាមេរិក សម្រាប់ការអនុញ្ញាតប្រទេសកូរ៉េខាងជើងបង្ហាញទង់ជាតិក្នុងព្រឹត្តិការណ៍កីឡាអាស៊ីលើកទី១៩ នៅទីក្រុងហាងចូវ ប្រទេសចិន កាលពីខែកញ្ញាកន្លងទៅ ខណៈប្រទេសអាស៊ីខាងកើតមួយនេះ ជាប់បម្រាមចំពោះការមិនអនុលោមតាមច្បាប់ WADA។ នេះបើយោងតាមប្រភពពីទីភ្នាក់ងារសារព័ត៌មាន Reuters ចេញផ្សាយកាលពីថ្ងៃទី១៩ ខែវិច្ឆិកា កន្លងទៅ។
នៅក្នុងឆ្នាំ ២០២១ WADA បានហាមប្រាមទង់ជាតិកូរ៉េខាងជើង នៅក្នុងព្រឹត្តិការណ៍កីឡាសំខាន់ៗទាំងអស់ បន្ទាប់ពីព្រឹត្តិការណ៍កីឡាអូឡាំពិក និងប៉ារ៉ាឡាំពិក ក្រោយចាត់ទុកប្រទេសឯកោមួយនេះ បានបរាជ័យការអនុវត្តកម្មវិធីធ្វើតេស្តសារធាតុញៀនរបស់ខ្លួន។ ទោះយ៉ាងណាក៏ដោយ ទង់ជាតិកូរ៉េខាងជើងបានបង្ហាញយ៉ាងពេញលេញសម្រាប់ពិធីបើកព្រឹត្តិការណ៍កីឡាអាស៊ីលើកទី១៩ (19th Asian Games) ដែលប្រទេសចិនធ្វើជាម្ចាស់ផ្ទះ ក៏ដូចជាភូមិអត្តពលិក នៅក្នុងការប្រកួតប្រជែង និងពិធីបំពាក់មេដាយផងដែរ។
WADA ដែលមានមូលដ្ឋាននៅទីក្រុងម៉ុងរ៉េអាល់ (Montreal) ប្រទេសកាណាដា បានបញ្ជាក់ក្នុងសេចក្តីថ្លែងការណ៍មួយថា ច្បាស់ណាស់អំឡុងពេលកីឡាអាស៊ី OCA មិនបានចាត់វិធានការលើកូរ៉េខាងជើង ដើម្បីអនុវត្តលក្ខខណ្ឌអនុលោមតាមច្បាប់ ដោយទង់ជាតិកូរ៉េខាងជើងបានបង្ហាញម្តងហើយម្តងទៀត អំឡុងពេលព្រឹត្តិការណ៍ទាំងមូល។ ទោះបីជាមានការរំលឹកម្តងហើយម្តងទៀតពី WADA មុននិងអំឡុងពេលការប្រកួតយ៉ាងណាក៏ដោយក៏ OCA មិនបានធ្វើតាម។
មិនទាន់មានការអត្ថាធិប្បាយភ្លាមៗពី OCA នៅឡើយទេ ខណៈដែលស្ថាប័នមានមូលដ្ឋាននៅប្រទេសគុយវ៉ែតមួយនេះមានពេល៣សប្តាហ៍ ដើម្បីប្តឹងតវ៉ាប្រឆាំងនឹងការសម្រេចចិត្តរបស់ WADA ។
គួរបញ្ជាក់ថា ប្រទេសកូរ៉េខាងជើង បានបញ្ចប់ព្រឹត្តិការណ៍កីឡាអាស៊ីលើកទី១៩ ទីក្រុងហាងចូវ ប្រទេសចិន ស្ថិតនៅចំណាត់ថ្នាក់លេខ១០ នៃតារាងមេដាយសរុប ដោយឈ្នះមេដាយសរុប ៣៩ គ្រឿង មាស ១១ ប្រាក់ ១៨ និងសំរឹទ្ធ ១០៕
ចែករំលែកព័តមាននេះ