ADផ្ទាំងផ្សព្វផ្សាយពាណិជ្ជកម្ម

Picture

ស្រី​ស្អាត ច​ន សុទី​ម៉ា ធ្វើ​ឲ្យ​មហាជន​រំពឹង​ខ្លាំង​ពី​ភាព​ជោគជ័យ ក្រោយ​បង្ហាញ​ឈុត​តំណាង​ជាតិ​យ៉ាង​​លេចធ្លោ

8 ខែ មុន
  • ភ្នំពេញ

បវរកញ្ញា​កម្ពុជា ច​ន សុទី​ម៉ា បាន​ធ្វើ​ឲ្យ​មហាជន​ដាក់​ក្តី​រំពឹង​យ៉ាង​ខ្លាំង​ពី​ភាព​ជោគ​ជ័យ​សម្រាប់​ការ​ប្រកួត «Miss Universe 2023» ក្រោយ​ពី​កញ្ញា​បាន​បង្ហាញ​សមត្ថភាព​បាន​យ៉ាង​ល្អ​ពី​មួយ​វគ្គ​ទៅ​មួយ​វគ្គ ជា​ពិសេស​គឺ​

រាជធានី​ភ្នំពេញ ៖ បវរកញ្ញា​កម្ពុជា ច​ន សុទី​ម៉ា បាន​ធ្វើ​ឲ្យ​មហាជន​ដាក់​ក្តី​រំពឹង​យ៉ាង​ខ្លាំង​ពី​ភាព​ជោគ​ជ័យ​សម្រាប់​ការ​ប្រកួត «Miss Universe 2023» ក្រោយ​ពី​កញ្ញា​បាន​បង្ហាញ​សមត្ថភាព​បាន​យ៉ាង​ល្អ​ពី​មួយ​វគ្គ​ទៅ​មួយ​វគ្គ ជា​ពិសេស​គឺ​វគ្គ​ដើរ​បង្ហាញ​ឈុត​តំណាង​ជាតិ​យ៉ាង​លេចធ្លោ​នៅ​លើ​វេទិកា កាល​ពី​ថ្ងៃ​ទី​១៧ ខែវិច្ឆិកា ឆ្នាំ​២០២៣ នេះ ។

ការ​ប្រកួត Miss Universe 2023 ដែល​រៀបចំ​ឡើង​នៅ​ប្រទេស El Salvador បាន​ឈាន​ដល់​វគ្គ​សំខាន់​ៗ ហើយ​កញ្ញា ច​ន សុទី​ម៉ា តំណាង​កម្ពុជា ក៏​បាន​បំពេញ​តួនាទី​ខ្លួន​បាន​យ៉ាង​ល្អ រហូត​ទទួល​បានការ​ចាប់អារម្មណ៍​ខ្លាំង​ពី​គណៈកម្មការ ។ អ្វី​ដែល​ពិសេស​ខ្លាំង​ថែម​ទៀត​នោះ នៅ​ក្នុង​វគ្គ​បង្ហាញ​ឈុត​តំណាង​​ជាតិ​នេះ ច​ន សុទី​ម៉ា កាន់តែ​ធ្វើ​ឲ្យ​មហាជន​កម្ពុជា ជា​ច្រើន​សម្តែង​នូវ​មោទនភាព​ចំពោះ​កញ្ញា​ដែល​នាំ​យក​អ្វី​ដែល​ជា​ប្រពៃណី វប្បធម៌ និង​កេរ្តិ៍​តំណែល​ខ្មែរ​បង្ហាញ​ឲ្យ​ពិភពលោក​ស្គាល់​កាន់តែ​ច្បាស់​។

ស្រី​ស្អាត ច​ន សុទី​ម៉ា បាន​គ្រោង​ឈុត​តំណាង​ជាតិ​ដើរ​បង្ហាញ​នៅ​លើ​ឆាក​ដោយ​ភាព​ទន់ភ្លន់ ញញឹម​សាក​សមជា​នារី​ខ្មែរ ជាមួយនឹង​សម្រស់​យ៉ាង​ស្រស់​ផូរផង់ និង​ភាពល្អ​ឯក​ក្នុង​ឈុត​មួយ​នេះ​។ ឈុត​តំណាង​ជាតិ​ដែល​ស្រី​ស្អាត ច​ន សុទី​ម៉ា យក​មក​បង្ហាញ​នា​ពេល​នេះ ត្រូវ​បាន​គេ​ប្រសិទ្ធ​នាម​ថា «​ព្រះ​មេគង្គា​» ដោយ​ឈុត​នេះ រំលេច​នូវ​គ្រឿងអលង្ការ​នានា ច្នៃ​ចេញពី​រចនា​បទ​សិល្បៈ​សម័យ​អង្គរ​។

ឈុត​តំណាង​ជាតិ «​ព្រះ​មេគង្គា​» ឧទ្ទិស​ដល់​ទន្លេមេគង្គ​ដែល​ហូរ​មក​ពី​ទី​បេ កាត់​ប្រទេស​ចិន មី​យ៉ា​ន់​ម៉ា ថៃ ឡាវ កម្ពុជា និង​វៀតណាម​។ ដោយ​ដកស្រង់​គំនិត​ពី​ទេវ​កថា ចម្លាក់​បុរាណ និង​បរិស្ថាន ហើយ​ឈុត​នេះ​រំលេច​នូវ​គ្រឿងអលង្ការ​នានា ដែល​ច្នៃ​ចេញពី​រចនា​បទ​សិល្បៈ​សម័យ​អង្គរ​ផង​ដែរ​។

ឈុត «​ព្រះ​មេគង្គា​» បង្ហាញ និង​លើកតម្កើង​ធនធាន​ដ៏​សម្បូរ​បែប​នៃ​ទឹកដី​វប្បធម៌​កម្ពុជា ដោយ​ធ្វើការ​ប្រើប្រាស់​នៅ​ត្បូង​ធម្មជាតិ និង​សំពត់​ចរបាប់​សូត្រ​ត្បាញ​ដោយ​ដៃ​ខ្មែរ​។ ឈុត​តំណាង​ជាតិ «​ព្រះ​មេគង្គា​» ដ៏​ស្រស់ថ្លា និង​វិសេស​នេះ ជា​និម្មិតរូប​នៃ​លំហូ សុខ​សិរី​សួស្តី​ជ័យ តំណាង​លំហូ​នៃ​សន្តិភាព មិត្តភាព និង​ការ​រីក​ចម្រើន​នៃ​យុគសម័យ​ថ្មី​។

ជា​ការ​កត់សម្គាល់ អំឡុង​ពេល​ប្រកួត​នេះ​ដែរ កញ្ញា ច​ន សុទី​ម៉ា ក៏​បាន​បង្ហោះ​សារ​តាម​បណ្តាញ​សង្គម​ផ្ញើ​ទៅ​កាន់​អ្នកគាំទ្រ​កម្ពុជា​ទាំងអស់​ថា «​នាង​ខ្ញុំ​ពិតជា​រីករាយ និង​មាន​កិត្តិយស​ណាស់​ក្នុង​ការ​តំណាង​ប្រទេស​កម្ពុជា​នៅ​លើ​ឆាក​បវ​កញ្ញា​ចក្រវាល​២០២៤ នេះ ។ នាង​ខ្ញុំ​សង្ឃឹមថា ប្រជាជន​កម្ពុជា​ទាំងអស់​ពេញចិត្ត​ចំពោះ​ការ​បង្ហាញ​សមត្ថភាព​របស់ខ្ញុំ សូម​អរគុណ​ចំពោះ​ប្រជាជន​កម្ពុជា​ទាំងអស់ ចំពោះ​ការ​លើកទឹកចិត្ត និង​ផ្តល់​ក្តី​ស្រលាញ់​មក​កាន់​រូប​នាង​ខ្ញុំ​។ នាង​ខ្ញុំ​ពិតជា​រំភើប​ណាស់ ជា​ពិសេស​នាង​ខ្ញុំ​ពិតជា​មានសំណាង​ដែល​កើតមក​ជា​ខ្មែរ និង​មិន​ភ័យ​ខ្លាច​ទេ ក្នុង​ការ​បង្ហាញ​ខ្លួន​ឯង​ក្នុង​ភាព​ជា «​ខ្មែរ​» ។

គួរ​បញ្ជាក់​ថា សម្រាប់​ការ​ប្រកួត​វគ្គ​ផ្តាច់ព្រ័ត្រ​នៃ​កម្មវិធី «Miss Universe 2023» នឹង​ធ្វើ​ឡើង​នៅ​ថ្ងៃ​ទី​១៩ ខែវិច្ឆិកា នេះ ចាប់ពី​ម៉ោង​៨​ព្រឹក​តទៅ (​ម៉ោង​នៅ​កម្ពុជា​) ៕

អត្ថបទសរសេរ ដោយ

កែសម្រួលដោយ