រាជធានីភ្នំពេញ ៖ ព័ត៌មានបឋម កាលពីរសៀលថ្ងៃទី១៥ ខែវិច្ឆិកា ឆ្នាំ២០២៣ កម្លាំងកងរាជ អាវុធហត្ថរាជធានីភ្នំពេញ បានធ្វើការឃាត់ខ្លួនវេជ្ជបណ្ឌិតម្នាក់បញ្ជូនទៅតុលាការ ពាក់ព័ន្ធពីបទ.រំលោភលើទំនុកចិត្ត…
រាជធានីភ្នំពេញ ៖ ព័ត៌មានបឋម កាលពីរសៀលថ្ងៃទី១៥ ខែវិច្ឆិកា ឆ្នាំ២០២៣ កម្លាំងកងរាជ អាវុធហត្ថរាជធានីភ្នំពេញ បានធ្វើការឃាត់ខ្លួនវេជ្ជបណ្ឌិតម្នាក់បញ្ជូនទៅតុលាការ ពាក់ព័ន្ធពីបទ.រំលោភលើទំនុកចិត្ត (ស៊ីដាច់ប្រាក់គេរត់ការចូលក្រមខណ្ឌគ្រូពេទ្យស្ម័គ្រចិត្ត ជាង១៤ម៉ឺនដុល្លារអាមេរិក) ប្រព្រឹត្តនៅរាជធានីភ្នំពេញ ។
តាមប្រភពព័ត៌មានបានបង្ហើបឲ្យដឹងថា ជនសង្ស័យឈ្មោះ សុខ ប៉ ភេទប្រុស អាយុ៥២ ឆ្នាំ មុខរបរ ជាវេជ្ជបណ្ឌិតមានទីលំនៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ ។ ប្រភពព័ត៌មានបង្ហើបឲ្យដឹងទៀតថា ជនសង្ស័យមានមិត្តភក្តិជិតស្និទ្ធម្នាក់រាប់អានគ្នាតាំងពីឆ្នាំ១៩៩០ លុះមកដល់តំណាក់កាលផ្ទុះជំងឺរាតត្បាតកូវីដ១៩ មិត្តភក្តិនោះក៏បានពឹងពាក់ជនសង្ស័យ ឲ្យជួយរត់ការកូនក្មួយ៤នាក់ចូលបម្រើការងារជាគ្រូពេទ្យស្ម័គ្រ ចិត្តនៅមន្ទីរពេទ្យមិត្តភាពខ្មែរ.សូវៀត នៅមន្ទីរពេទ្យព្រះកុសមៈ២ នាក់ មណ្ឌលសុខភាពជើងគោក២ នាក់ និងនៅមណ្ឌលស្ម័គ្រចិត្តសេនាពិជ័យ ទៀ បាញ់ ចំនួន២១ នាក់ ។
ការពឹងពាក់ខាងលើនេះ ដើមបណ្តឹងបានប្រគល់ប្រាក់ឲ្យទៅជនសង្ស័យតាមដំណាក់កាល ក្នុងម្នាក់ចាប់ពី៣៥០០ ដល់ទៅ ៨០០០ដុល្លារ សរុបទាំងអស់ចំនួន១៤.១៧០០ដុល្លារអាមេរិក ។ ក្រោយពេលប្រគល់និងទទួលប្រាក់ជាបន្តបន្ទាប់រួចហើយ ជនសង្ស័យមិនបានគោរពតាមកិច្ចសន្យា ឬដែលហៅថាការពឹងពាក់នោះទេ ខណៈម្ចាស់លុយសួរនាំជនសង្ស័យចេះតែឆ្លើយដោះសាររហូត ។
ការសន្យា ឬការពឹងពាក់នោះបានក្លាយជាការសន្យាខ្យល់ ដូច្នោះដើមបណ្តឹងក៏បានតាមទារប្រាក់មកវិញ ប៉ុន្តែជនសង្ស័យចេះតែឆ្លើយដាក់អ្នកនេះអ្នកនោះ ថែមទាំងបិទទូរស័ព្ទគេចវេសទៀតផង ។ ដោយមើលឃើញទង្វើដែលគួលែងឲ្យជឿទុកចិត្ត ម្ចាស់ប្រាក់បានដាក់ពាក្យបណ្តឹងទៅសមត្តកិច្ច ឲ្យជួយចាត់ការតាមផ្លូវច្បាប់ ។ ចំណែកជនសង្ស័យបានបដិសេធចំពោះការចោទប្រកាន់នេះ ដោយអះអាងថា ខ្លួនមិនបាននៅជំពាក់លុយថ្លៃរត់ការទេ ។
តែទោះជាយ៉ាងណាក្តី សំណុំរឿងខាងលើ កំពុងស្ថិតនៅដំណាក់កាលស្ថាប័នអយ្យការបើកការស៊ើបសួរ លទ្ធផលចុងក្រោយយ៉ាងណានោះគង់តែដឹង ។
មានព័ត៌មានបន្ថែម កោះសន្តិភាពផ្សាយជូនបន្ត ។
ចែករំលែកព័តមាននេះ