អគ្គិភ័យបានឆាបឆេះដំបូលស្ថាននីយប្រេងឥន្ទនៈមួយកន្លែង បង្កឱ្យមានការភ្ញាក់ផ្អើលដល់ប្រជាពលរដ្ឋ និងបុគ្គលិកចាក់សាំង នាំគ្នាទាញបំពង់ឧស្ម័នបា.ញ់ពន្លត់ ប៉ុន្តែតែមិនរលត់នោះទេ បន្ទាប់មកក៏មាន
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា អគ្គិភ័យបានឆាបឆេះដំបូលស្ថាននីយប្រេងឥន្ទនៈមួយកន្លែង បង្កឱ្យមានការភ្ញាក់ផ្អើលដល់ប្រជាពលរដ្ឋ និងបុគ្គលិកចាក់សាំង នាំគ្នាទាញបំពង់ឧស្ម័នបា.ញ់ពន្លត់ ប៉ុន្តែតែមិនរលត់នោះទេ បន្ទាប់មកក៏មានការអន្តរាគមន៍ពីរថយន្តពន្លត់អគ្គិភ័យមកដល់ទីតាំង រួចជួយបា.ញ់ទឹកពន្លត់ភ្លាមៗ ទើបភ្លើងរលត់ទៅវិញទាំងស្រុង កាលពីវេលាម៉ោង៧និង២០នាទីយប់ ថ្ងៃទី១៤ ខែវិច្ឆិកា ឆ្នាំ២០២៣ នៅចំណុចស្ថានីយប្រេងឥន្ទនៈតេលា ជិតស្ពានអាកាស៥មករា ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក រាជធានី ភ្នំពេញ។
យោងតាមប្រភពព័ត៌មាន បានប្រាប់អោយដឹងថា មុនពេលកើតហេតុ គេឃើញមានផ្សែងហុយចេញពីផ្នែកដំបូលនៃស្ថានីយប្រេងឥន្ទនៈនោះ លុះប៉ុន្មាននាទីក្រោយមក ស្រាប់តែមានខ្យល់បោ.កបក់យ៉ាងខ្លាំងធ្វើអោយផ្សែងទាំងនោះ បង្កចេញជាអណ្តាតភ្លើងឆាបឆេះដំបូលស្ថានីយប្រេងខ្លាំងឡើងៗ បង្កឱ្យការភ្ញាក់ផ្អើលដល់បុគ្គលិកស្ថានីយនាំគ្នាយកបំពង់ឧស្ម័នពន្លត់អគ្គិភ័យខ្នាតតូចចំនួន៤បំពង់ និងខ្នាតធំចំនួន៣បំពង់ថែមទៀត ធ្វើការបា.ញ់ពន្លត់ ប៉ុន្តែមិនរលត់នោះទេ។ ចំណែកប្រជាពលរដ្ឋដែលធ្វើដំណើរឆ្លងកាត់ទីនោះ ក៏នាំគ្នាទាញទូរស័ព្ទថត ហើយខ្លះទៀតព្យាយាមទូរស័ព្ទទៅកាន់សមត្ថកិច្ចមូលដ្ឋាន ដើម្បីសុំការអន្តរាគមន៍ពីរថយន្តពន្លត់អគ្គិភ័យផងដែរ។
ក្រោយពីទទួលដំណឹងខាងលើនេះភ្លាម ការិយាល័យនគរបាលបង្ការពន្លត់អគ្គិភ័យ និងសង្គ្រោះ បានចេញរថយន្តសង្គ្រោះមួយគ្រឿងទៅកាន់ទីតាំងកើតហេតុ និងធ្វើការអន្តរាគមន៍បា.ញ់ទឹកពន្លត់ទាន់ពេលវេលាផងដែរ ដោយទប់ស្កាត់ និងមិនឱ្យអណ្ដាតភ្លើងឆេះរាលដាលនោះទេ។ សូមបញ្ជាក់ថា នៅក្នុងករណីអគ្គិភ័យខាងលើនេះដែរ មិនបង្កអោយមាននរណាម្នាក់រងរបួសឡើយ។
ក្រោយពេលកើតហេតុ មន្ត្រីជំនាញអគ្គិភ័យ ក៏បាននាំគ្នាត្រឡប់ទៅកាន់គោលដៅរបស់ខ្លួនវិញ ខណៈសមត្ថកិច្ចមូលដ្ឋានបានសន្និដ្ឋានជាជំហានដំបូងថា ករណីអគ្គិភ័យនេះ គឺសង្ស័យ បណ្តាលមកពីការឆ្លងចរន្តអគ្គិសនី៕
ចែករំលែកព័តមាននេះ