អាជីវកម្មបរទេសជាច្រើន ដកប្រាក់ចំណេញរាប់ពាន់លានដុល្លារចេញពីប្រទេសចិន
បរទេស ៖ ទិន្នន័យផ្លូវការបង្ហាញថា បណ្តាអាជីវកម្មបរទេសជាច្រើនបាននឹងកំពុងដកប្រាក់ចំណេញ
បរទេស ៖ ទិន្នន័យផ្លូវការបង្ហាញថា បណ្តាអាជីវកម្មបរទេសជាច្រើនបាននឹងកំពុងដកប្រាក់ចំណេញរាប់ពាន់លានដុល្លារចេញពីប្រទេសចិន នៅក្នុងអត្រាលឿនជាងអ្វីដែលពួកគេបានដាក់បញ្ចូលទៅក្នុងទិន្នន័យរបស់ខ្លួន។ នេះបើយោងតាមប្រភពពី BBC ចេញពីនៅថ្ងៃទី១៤ ខែវិច្ឆិកា ឆ្នាំ២០២៣។
សេដ្ឋកិច្ចប្រទេសចិនដែលធ្លាក់ចុះ អត្រាការប្រាក់ទាប ព្រមទាំងជម្លោះភូមិសាស្ត្រនយោបាយជាមួយសហរដ្ឋអាមេរិក បានបង្កឱ្យមានការសង្ស័យអំពីសក្តានុពលសេដ្ឋកិច្ចរបស់ប្រទេសសេដ្ឋកិច្ចធំទីពីរពិភពលោកមួយនេះ ខណៈគ្រប់គ្នានឹងផ្តោតលើកិច្ចប្រជុំដ៏សំខាន់រវាងមេដឹកនាំចិន លោក ស៊ី ជីនពីង (Xi Jinping) និងប្រធានាធិបតីអាមេរិក លោក ចូ បៃដិន (Joe Biden) នៅសប្តាហ៍នេះ ប៉ុន្តែទោះយ៉ាងណា បណ្តាអាជីវកម្មបរទេសហាក់ដូចជាមានបញ្ហារួចទៅហើយ។
លោក Nick Marro អ្នកវិភាគមកពី Economist Intelligence Unit (EIU) បានថ្លែងថា ការថប់បារម្ភជុំវិញហានិភ័យភូមិសាស្ត្រនយោបាយ ភាពមិនច្បាស់លាស់នៃគោលនយោបាយក្នុងស្រុក និងកំណើនយឺតកំពុងតែជំរុញឱ្យបណ្តាក្រុមហ៊ុនគិតអំពីការផ្លាស់ប្តូរទីផ្សាររបស់ខ្លួន។
ប្រទេសចិនបានកត់ត្រាឱនភាព នៃការវិនិយោគបរទេសចំនួន ១១.៨ពាន់លានដុល្លារក្នុងរយៈពេល៣ខែដល់ចុងខែកញ្ញា ឆ្នាំនេះ ដែលជាលើកទី១ ចាប់តាំងពីកំណត់ត្រាបានចាប់ផ្តើមនៅក្នុងឆ្នាំ ១៩៩៨ ដែលនេះបង្ហាញឱ្យឃើញថា ក្រុមហ៊ុនបរទេសមិនបានវិនិយោគប្រាក់ចំណេញរបស់ខ្លួនឡើងវិញនៅក្នុងប្រទេសចិន ជាជាងដកប្រាក់ចំណេញចេញពីប្រទេសនេះឡើយ។
អ្នកនាំពាក្យក្រុមហ៊ុនផលិតគ្រឿងចក្រឧស្សាហកម្មរបស់ស្វីស Oerlikon ដែលបានដកប្រាក់ចំណេញ ២៧៧លានដុល្លារពីប្រទេសចិនកាលពីឆ្នាំមុន បានលើកឡើងថា «បច្ចុប្បន្ននេះ ប្រទេសចិនកំពុងប្រឈមមុខនឹងកំណើនយឺត ហើយត្រូវធ្វើការកែតម្រូវខ្លះ។ នៅក្នុងឆ្នាំ ២០២២ យើងគឺជាក្រុមហ៊ុនមួយក្នុងចំណោមក្រុមហ៊ុនដំបូងគេ ដែលទំនាក់ទំនងប្រកបដោយតម្លាភាព ដោយបានរំពឹងថា ការធ្លាក់ចុះសេដ្ឋកិច្ចនៅចិននឹងប៉ះពាល់ដល់អាជីវកម្មរបស់យើង។ ហេតុដូច្នេះហើយ ទើបយើងបានចាប់ផ្តើមអនុវត្តសកម្មភាព និងវិធានការនានា ដើម្បីកាត់បន្ថយផលប៉ះពាល់ទាំងនោះ»។
ទោះយ៉ាងណា ប្រទេសចិននៅតែជាទីផ្សារសំខាន់សម្រាប់ក្រុមហ៊ុន Oerlikon ដោយមានបុគ្គលិកជិត ២,០០០នាក់នៅទូទាំងប្រទេស ដែលមានចំនួនច្រើនជាង១/៣នៃការលក់របស់ខ្លួន។ Oerlikon បានកត់សម្គាល់ថា សេដ្ឋកិច្ចចិននៅតែត្រូវបានគេរំពឹងថានឹងប្រកាសកំណើនប្រហែល ៥% ក្នុងរយៈពេលប៉ុន្មានឆ្នាំខាងមុខនេះ ដែលស្ថិតក្នុងចំណោមកម្រិតខ្ពស់បំផុតនៅក្នុងពិភពលោក។
ចាប់តាំងពីការចាប់ផ្តើមនៃជំងឺរាតត្បាតកូវីដ-១៩ អាជីវកម្មជាច្រើនដូចជា Oerlikon បានប្រឈមមុខនឹងបញ្ហាប្រតិបត្តិការនៅប្រទេសចិន ដែលជាទីផ្សារធំបំផុតរបស់ពិភពលោក។ ប្រទេសចិនបានអនុវត្តការចាក់សោរប្រទេសដ៏តឹងរ៉ឹងបំផុតមួយរបស់ពិភពលោក តាមរយៈគោលនយោបាយ «សូន្យ-កូវីដ» របស់ខ្លួន ដែលបណ្តាលឱ្យមានការរំខានដល់សង្វាក់ផ្គត់ផ្គង់របស់ក្រុមហ៊ុនជាច្រើន ដូចជាក្រុមហ៊ុនបច្ចេកវិទ្យាខ្នាតយក្សរបស់អាមេរិក Apple ដែលផលិតទូរស័ព្ទ iPhone ភាគច្រើននៅប្រទេសចិន ហើយចាប់តាំងពីពេលនោះមក ក្រុមហ៊ុនបានធ្វើពិពិធកម្មខ្សែសង្វាក់ផ្គត់ផ្គង់ ដោយការផ្លាស់ប្តូរផលិតកម្មមួយចំនួនទៅកាន់ប្រទេសឥណ្ឌា៕
ចែករំលែកព័តមាននេះ