កម្លាំងការិយាល័យជំនាញព្រហ្មទណ្ឌកម្រិតស្រាលរាជធានីភ្នំពេញ បានធ្វើការឃាត់ខ្លួនយុវជនចំនួន២នាក់ ដែលសង្ស័យជាប់ពាក់ព័ន្ធករណីប្រព្រឹត្តបទល្មើស
រាជធានីភ្នំពេញ ៖ កាលពីរសៀលថ្ងៃទី០៤ ខែវិច្ឆិកា ឆ្នាំ២០២៣ កម្លាំងការិយាល័យជំនាញព្រហ្មទណ្ឌកម្រិតស្រាលរាជធានីភ្នំពេញ បានធ្វើការឃាត់ខ្លួនយុវជនចំនួន២នាក់ ដែលសង្ស័យជាប់ពាក់ព័ន្ធករណីប្រព្រឹត្តបទល្មើសឆ.ក់ជាក់ស្តែង នៅចំណុចផ្លូវលេខ៤៧ កែងផ្លូវលេខ៨២ ស្ថិតក្នុងសង្កាត់ស្រះចក ខណ្ឌដូនពេញ។
ប្រតិបត្តិការនេះ ដោយមានការបញ្ជាពីឯកឧត្តមឧត្តមសេនីយ៍ទោ ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកវរសេនីយ៍ឯក ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ ដឹកនាំបញ្ជាផ្ទាល់ពីលោកឧត្តមសេនីយ៍ត្រី លី ប៊ុនអេង ស្នងការរងទទួលដឹកនាំការិយាល័យ។
ជនសង្ស័យខាងលើនេះ ម្នាក់មានឈ្មោះ ណា អូនយូ ភេទប្រុស អាយុ១៨ឆ្នាំ ស្នាក់នៅផ្ទះជួលលេខ០៧១ ផ្លូវលេខ៥៨ ស្ថិតក្នុងភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ មុខរបរមិនពិតប្រាកដ ។ និងម្នាក់ទៀតមានឈ្មោះ ចាន់ ហួរ ភេទប្រុស អាយុ២២ឆ្នាំ នៅផ្ទះជួលលេខ០៧១ ផ្លូវលេខ៥៨ ស្ថិតក្នុងភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ មុខរបរមិនពិតប្រាកដដូចគ្នា។ ចំណែកវត្ថុតាងចាប់យកមាន ម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០២១ ពាក់ផ្លាកលេខ កណ្តាល១AL-៦៥៣០ ។
ទាក់ទិននឹងការឃាត់ខ្លួនជនសង្ស័យទាំង២នាក់ខាងលើនេះ សមត្ថកិច្ចប្រាប់ឲ្យដឹងថា កាលពីរសៀលថ្ងៃទី០៤ ខែវិច្ឆិកា ឆ្នាំ២០២៣ មានករណីភ្ញៀវជនបរទេស១ក្រុមបានដើរកម្សាន្តនៅក្នុងរាជធានីភ្នំពេញ លុះមកដល់ចំណុចមុខផ្ទះលេខ២៧៧c ផ្លូវព្រះស៊ីសុវត្ថិ ក្រុម២៧ ស្ថិតក្នុងភូមិ៦ សង្កាត់ផ្សារកណ្តាល១ ខណ្ឌដូនពេញ ស្រាប់តែមានយុវជន២នាក់ ជិះម៉ូតូម៉ាកឌ្រីមសង់១២៥ ពណ៌ខ្មៅមួយគ្រឿង ធ្វើសកម្មភាពឆ.ក់ទូរស័ព្ទដៃម៉ាកសាំងសុងរបស់ជនបរទេសបានសម្រេច រួចរត់គេចខ្លួន។
សមត្ថកិច្ចបានប្រាប់បន្តថា ប៉ុន្តែភ្លាមៗនោះ ត្រូវក៏បានកម្លាំងសមត្ថកិច្ចជំនាញព្រហ្មទណ្ឌ ដែលកំពុងល្បាតលើផ្លូវសាធារណៈឃើញទាន់ ក៏នាំគ្នាប្រដេញតាមជនសង្ស័យពីក្រោយ រហូតមកដល់ចំណុចផ្លូវលេខ៤៧ កែងផ្លូវលេខ៨២ ស្ថិតក្នុងសង្កាត់ស្រះចក ខណ្ឌដូនពេញ ជនសង្ស័យជាអ្នកបើកម៉ូតូ មានសភាពភ័យស្លន់ស្លោ ក៏ជិះទៅបុ.កពីក្រោយរថយន្តរបស់ប្រជាពលរដ្ឋដែលកំពុងធ្វើដំណើរស្របគ្នា បណ្តាលឲ្យដួលម៉ូតូខ្ទាតទូរស័ព្ទចេញពីដៃ ហើយក៏ត្រូវសមត្ថកិច្ចចាប់ក្របួចដាក់ខ្នោះទាំង២នាក់តែម្តងទៅ ដែលនេះហៅថា «ក.ម្មមិនចាំជាតិក្រោយទេ»។
ក្រោយពេលឃាត់ខ្លួនជនសង្ស័យ និងវត្ថុតាងម៉ូតូដែលជាមធ្យោបាយពួកគេជិះធ្វើសកម្មភាពរួចមក សមត្ថកិច្ចក៏បានកសាងសំណុំរឿង រួចបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីនៃច្បាប់៕
ចែករំលែកព័តមាននេះ