មនុស្សប្រុសស្រីចំនួន១០៣នាក់ សុទ្ធតែស្រីស្អាត ប្រុសសង្ហា ក្នុងនោះមានទាំងជនបរទេសផងដែរ ត្រូវបានកម្លាំងមន្ទីរប្រឆាំងបទល្មើសគ្រឿ.ងញៀ.ននៃអគ្គស្នងការដ្ឋាននគរបាលជាតិ ធ្វើការឃាត់ខ្លួន និងបញ្ជូនទៅធ្វើការសាកសួរ ដោយសង្ស័យថា
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មនុស្សប្រុសស្រីចំនួន១០៣នាក់ សុទ្ធតែស្រីស្អាត ប្រុសសង្ហា ក្នុងនោះមានទាំងជនបរទេសផងដែរ ត្រូវបានកម្លាំងមន្ទីរប្រឆាំងបទល្មើសគ្រឿ.ងញៀ.ននៃអគ្គស្នងការដ្ឋាននគរបាលជាតិ ធ្វើការឃាត់ខ្លួន និងបញ្ជូនទៅធ្វើការសាកសួរ ដោយសង្ស័យថា ជាប់ពាក់ព័ន្ធការប្រើប្រាស់ «HAPPY BALLON» ហៅថា «ប៉ោងប៉ោងរីករាយ» បង្កឱ្យមានការភ្ញាក់ផ្អើលកាលពីវេលាម៉ោង២និង១០នាទីរំលងអធ្រាត្រឈានចូលថ្ងៃទី០៤ ខែវិច្ឆិកា ឆ្នាំ២០២៣ នៅចំណុចក្លិបកម្សាន្ត១កន្លែង ដែលមានស្លាកយីហោ «NUMBER9 BASSAC LIVE DJS – DANCE FLOOR» តាមផ្លូវលេខ៣០៨ មូលដ្ឋានសង្កាត់ទន្លេបាសាក់ ស្ថិតក្នុងខណ្ឌចំការមន រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុ បានប្រាប់ឱ្យដឹងថា គេឃើញមានវត្តមានរបស់សមត្ថកិច្ចមន្ទីរប្រឆាំងបទល្មើសគ្រឿ.ងញៀ.ន នៃអគ្គស្នងការដ្ឋាននគរបាលជាតិ សហការជាមួយសមត្ថកិច្ចមូលដ្ឋានសង្កាត់ទន្លេបាសាក់ ចុះធ្វើការឡោមព័ទ្ធទីតាំងក្លិបកម្សាន្តខាងលើ ព្រមទាំងធ្វើការឃាត់ខ្លួនមនុស្សប្រុសស្រីជាច្រើននាក់ ក្នុងនោះមានទាំងជនបរទេសផងដែរ។
តាមរបាយការណ៍បឋមពីសមត្ថកិច្ចបានឱ្យដឹងបន្តថា មនុស្សប្រុសស្រីជាច្រើននាក់ដែលត្រូវបានធ្វើការឃាត់ខ្លួននោះ មានរហូតដល់ទៅ១០៣នាក់ ទាំងខ្មែរ និងជនបរទេស ព្រមទាំងបានដកហូតគ្រឿងសម្ភារៈដូចជា ៖ ប៉ោងប៉ោងរីករាយទំហំធំចំនួន៤ និងតូចៗជាច្រើនផ្សេងទៀត, បំពង់ខ្យល់សម្រាប់បញ្ចូលទៅក្នុង HAPPY BALLONS ចំនួន១២បំពង់ រួមទាំងបំពង់ឧស្ម័នសប្បាយចំនួន៤បំពង់ធំផងដែរ។
ក្រោយពេលឃាត់ខ្លួន សមត្ថកិច្ចបានបញ្ជូនមនុស្សប្រុសស្រីទាំង១០៣នាក់ខាងលើឡើងទៅលើរថយន្តដឹកអ្នកដំណើរចំនួន២គ្រឿង ព្រមទាំងបញ្ជូនទៅកាន់មន្ទីរប្រឆាំងបទល្មើសគ្រឿ.ងញៀ.ន នៃអគ្គស្នងការដ្ឋាននគរបាលជាតិ ដើម្បីធ្វើការសាកសួរ និងចាត់វិធានការតាមនីតិវិធីច្បាប់ផងដែរ៕
ចែករំលែកព័តមាននេះ