លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងប្រាប់ឲ្យដឹងថា ជនសង្ស័យដែលក្លែងព្រះរាជសាររបស់ព្រះមហាក្សត្រ ត្រូវបានតំណាងអយ្យការ បើកការស៊ើបសួររួចរាល់ហើយ ដោយចោទប្រកាន់ពីបទ
រាជធានីភ្នំពេញ ៖ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី០២ ខែវិច្ឆិកា ឆ្នាំ២០២៣នេះ បានថ្លែងប្រាប់ឲ្យដឹងថា ជនសង្ស័យដែលក្លែងព្រះរាជសាររបស់ព្រះមហាក្សត្រ ត្រូវបានតំណាងអយ្យការ បើកការស៊ើបសួររួចរាល់ហើយ ដោយចោទប្រកាន់ពីបទ «ឆបោ.ក» បទ «ក្លែងបន្លំឯកសារសាធារណៈ» និងបទ «ប្រើប្រាស់ឯកសារសាធារណៈក្លែង» ដែលបទល្មើសទាំងនេះ មានចែងតាមបញ្ញត្តិមាត្រា៣៧៧ មាត្រា៣៧៨ មាត្រា៦២៩ និងមាត្រា៦៣០ នៃក្រមព្រហ្មទណ្ឌ ។
ក្រោយពីតំណាងអយ្យការបានចោទប្រកាន់ជាផ្លូវការហើយ សំណុំរឿងនេះបានចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
សូមជម្រាបថា ជនដែលក្លែងព្រះរាជសារព្រះមហាក្សត្រ នៃព្រះរាជាណាចក្រកម្ពុជា ត្រូវបានកម្លាំងសមត្ថកិច្ចនគរបាល នៃអគ្គស្នងការនគរបាលជាតិ ធ្វើការស្រាវជ្រាវ និងឃាត់ខ្លួនកាលពីថ្ងៃទី២៩ ខែតុលា ឆ្នាំ២០២៣ នៅចំណុចផ្ទះសំណាក់មួយកន្លែង ទល់មុខមន្ទីរពេទ្យមិត្តភាពកម្ពុជា-ចិន ហៅមន្ទីរពេទ្យលោកសង្ឃ ស្ថិតក្នុងភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
បើតាមសមត្ថកិច្ច បានប្រាប់ឲ្យដឹងថា កាលថ្ងៃទី២៦ ខែតុលា ឆ្នាំ២០២៣ បន្ទាប់ពីមានសេចក្តីប្រកាសព័ត៌មានរបស់ក្រសួងព្រះបរមរាជវាំង បដិសេធចំពោះលិខិតក្លែងបន្លំជាព្រះរាជសារចុះថ្ងៃទី២៤ ខែតុលា ឆ្នាំ២០២៣ ដែលត្រូវបានបង្ហោះចែកចាយនៅក្នុងបណ្តាញសង្គម ដោយមានបទបញ្ជាពីប្រមុខរាជរដ្ឋាភិបាល អគ្គស្នងការដ្ឋាននគរបាលជាតិ សហការជាមួយអាជ្ញាធរពាក់ព័ន្ធ បើកប្រតិបត្តិការធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យម្នាក់មានឈ្មោះ ហាក់ ឧត្តម ភេទប្រុស នៅថ្ងៃទី២៩ ខែតុលា ឆ្នាំ២០២៣។
ក្រោយពេលឃាត់ខ្លួន ជនសង្ស័យក៏បានសារភាពថា «ខ្លួនពិតជាបានរៀបចំបង្កើតលិខិតក្លែងបន្លំជាព្រះរាជសារពិតប្រាកដមែន ដោយបន្លំខ្លួនធ្វើជាខ្សែព្រះញាតិវង្ស ទៅជួលសេវាវា.យអត្ថបទតាមកុំព្យូទ័រមួយកន្លែង នៅម្តុំវិទ្យាល័យសម្តេច ជា ស៊ីម សន្ធរម៉ុក ដោយខ្លួនជាអ្នកផ្តល់នូវខ្លឹមសារ និងឯកសារគំរូ រួចផ្ញើលិខិតនោះទៅឲ្យកូនសិស្សលោកនៅវត្ត «ចន្ទប្បជោត្តនារាម» ដើម្បីនិមន្តព្រះធម្ម វនវាសី ចន្ទ មុនី ទៅសម្តែងធម៌ទេសនា ក្នុងព្រះរាជពិធីបុណ្យកឋិនទាន នៅវត្ត «ទេពវិមាន» ហៅវត្ត «កាន់ទ្រង់» ស្ថិតនៅក្នុងឃុំតានី ស្រុកអង្គជ័យ ខេត្តកំពត ដើម្បីទទួលបានផលប្រយោជន៍ពីការរៀបចំកម្មវិធីបុណ្យកឋិនទាននោះ»។
ពាក់ព័ន្ធករណីខាងលើនេះផងដែរ អគ្គស្នងការដ្ឋាននគរបាលជាតិ សូមអំពាវនាវដល់សាធារ ណជន ឲ្យមានការប្រុងប្រយ័ត្នចំពោះការចែករំលែកនូវព័ត៌មានគ្មានប្រភពច្បាស់លាស់ ដែលបណ្តាលឲ្យខ្លួនក្លាយជាឈ្នាន់បម្រើដល់ឧបាយកលរបស់ក្រុមជនឆបោ.ក ព្រមទាំងត្រូវទទួលខុសត្រូវចំពោះច្បាប់ថែមទៀតផង ។
គួររំលឹកថា ៖ ចាប់បាននៅក្នុងផ្ទះសំណាក់ ជនដែលហ៊ានក្លែងព្រះរាជសារព្រះមហាក្សត្រ ៕
ចែករំលែកព័តមាននេះ