អគ្គិភ័យឆេះឃ្លាំងរថយន្ត ខូចខាតស៊េរីទំនើបអស់៦គ្រឿង ខណៈមិនទាន់ដឹងមូលហេតុ
- កំពង់ស្ពឺ
ខេត្តកំពង់ស្ពឺ ៖ មានករណីអគ្គិភ័យបានឆាបឆេះឃ្លាំងរថយន្តមួយកន្លែង បណ្តាលឱ្យរថយន្តស៊េរី
ខេត្តកំពង់ស្ពឺ ៖ មានករណីអគ្គិភ័យបានឆាបឆេះឃ្លាំងរថយន្តមួយកន្លែង បណ្តាលឱ្យរថយន្តស៊េរីទំនើបចំនួន៦គ្រឿង ត្រូវបានអគ្គិភ័យឆាបឆេះបំផ្លាញអស់ ខណៈដែលម្ចាស់ដេកលង់លក់ កាលពីរំលងអាធ្រាត្រ បង្កឱ្យមានការភ្ញាក់ផ្អើលដល់សមត្ថកិច្ចជួយអន្តរាគមន៍បាញ់ពន្លត់មិនឱ្យឆេះរាលដាលដល់ផ្ទះប្រជាពលរដ្ឋ ។
ហេតុការណ៍អគ្គីភ័យឆាបឆេះឃ្លាំងរថយន្តខាងលើនេះបង្កឱ្យមានការភ្ញាក់ផ្អើល កាលពីម៉ោងជិត១រំលងអាធ្រាត្រឈានចូលថ្ងៃទី១ ខែវិច្ឆិកា ឆ្នាំ២០២៣ ស្ថិតនៅចំណុចភូមិអូរវែង ឃុំកាហែង ស្រុកសំរោងទង ខេត្តកំពង់ស្ពឺ។
មន្ត្រីនគរបាលស្រុកសំរោងទងបាននិយាយឱ្យដឹងថា ម្ចាស់ឃ្លាំងរថយន្តរងគ្រោះខាងលើឈ្មោះ មុយ ចាន់ណារី ភេទប្រុស អាយុ៤១ឆ្នាំ និងប្រពន្ធឈ្មោះ ឪ ស្រីនោ អាយុ៣៩ឆ្នាំ រស់នៅភូមិកើតហេតុខាងលើ ។ អគ្គិភ័យនេះបានបំផ្លាញឃ្លាំងមានទំហំ២០ម៉ែត្រ គុណនិង៣៤ម៉ែត្រ ធ្វើអំពីដែកជញ្ជាំងស័ង្កសី ដំបូលស័ង្កសី ។
មន្ត្រីនគរបាលដដែលបានបញ្ជាក់ថា នៅក្នុងហេតុការណ៍ខាងលើនេះ ឆេះអស់រថយន្ដចំនួន០៦គ្រឿង ទី០១ម៉ាកLexus 470 ចំនួន ០១គ្រឿង និងរថយន្ដ Ford Ranger pickup ចំនួន ០២គ្រឿង រថយន្ដLand Cruiser ចំនួន ០២គ្រឿង រថយន្ដដឹកទំនិញ ចំនួន ០១គ្រឿង (ឆេះមួយផ្នែកខាងស្ដាំ) និងឆេះសម្ភារៈប្រើប្រាស់ក្នុងរថយន្ដមួយចំនួនទៀត។
ចំពោះមូលហេតុដែលបណ្តាលឱ្យមានការឆាបឆេះនេះ សមត្ថកិច្ចជំនាញកំពុងធ្វើការស្រាវជ្រាវ ហើយទំហំទឹកប្រាក់ក្នុងការខាតបង់មិនទាន់ដឹងចំនួនពិតប្រាកដនៅឡើយទេ៕
ចែករំលែកព័តមាននេះ