រាជធានីភ្នំពេញ ៖ ក្រុមបាល់ទាត់ព្រះខ័នរាជ្យរកបាន៣ពិន្ទុទាំងលំបាក បន្ទាប់ពីបានយកឈ្នះក្រុមព្រែកប្រាកីឡា ៥-៤ នៅក្នុងការប្រកួតបាល់ទាត់ពានរង្វាន់ Metfone Cambodian League នៅលើទីលានស្តាតចាស់កាលពីរសៀលថ្ងៃពុធ ទី១៨ ឧសភា ។
ក្រុមព្រែកប្រាកីឡាដែលធ្លាប់តែធ្វើឱ្យក្រុមខ្លាំងជួបការលំបាកច្រើនលើកច្រើនសាមកហើយនោះលើកនេះការលេងរបស់គេនៅតែបានបង្ហាញពីការលេងយ៉ាងល្អដដែល ជាពិសេសការស៊ុតបាល់បញ្ចូលទីគ្រាប់ទី១របស់គេ ខណៈលេងបាន៥នាទីដំបូងដោយកីឡាករស៊េន ស៊ូកី ពាក់អាវលេខ១៥។ ប៉ុន្តែត្រូវព្រះខ័នរាជ្យតាមរកសងបាន៣គ្រាប់វិញភ្លាមនៅក្នុងតង់ទី១។ កីឡាករប្រាក់ មុន្នីឧត្តម ពាក់អាវលេខ៧រកបាននៅនាទីទី២៣ កីឡាករផាន់នី លីរដ្ឋា ពាក់អាវលេខ២៧រកបាននៅនាទីទី៣៩ និងកីឡាករទុំ សារ៉ាយ ពាក់អាវលេខ១៩រកបាននៅនាទីទី៤២។
ថ្វីដ្បិតតែនៅក្នុងតង់ទី១ព្រែកប្រាកីឡាត្រូវព្រះខ័នរាជ្យលេងសង្គ្រប់ជាប់រហូត ហើយថែមទាំងរកបានគ្រាប់បាល់នាំមុខ៣-១ ក៏ដោយក៏ការលេងរបស់គេនៅ តែមានការប្តេជ្ញាចិត្តខ្ពស់សហការគ្នាបានយ៉ាងល្អបំផុតនៅក្នុងតង់ទី២ ដោយប្រើពេលវេលាមិនដល់៥នាទីផង ព្រែកប្រាអាចរកគ្រាប់បាល់តាមសងវិញចំនួន៣គ្រាប់នៅនាទីទី៧០ កីឡាករ JAMIV ADEBAYO ពាក់អាវលេខ២១ស៊ុតបាល់ប៉េណាល់ទីបានសំរេច១គ្រាប់។ ចូលដល់នាទីទី៧ កីឡាករសុត សាអូន ពាក់អាវលេខ១៦ស៊ុតបាល់ពីចំងាយយ៉ាងល្អហោះរំលងដៃអ្នកចាំទីអ៊ុក មិុច បំប៉ោងសំណាញ់ព្រះខ័នរាជ្យក្នុងមុំ៩០អង្សា និងគ្រាប់បាល់ចុងក្រោយត្រូវកីឡាករម៉ាត់ ហូសាន់ ពាក់អាវលេខ៧បណ្តើរដាច់ខ្សែការពារព្រះខ័នរាជ្យស៊ុតបាល់បញ្ចូលទីដោយមិនខ្វល់ពីអ្វីទាំងអស់បានសំរេច១គ្រាប់ទៀតនៅនាទីទី៧៥។
ភាពសប្បាយរីករាយរបស់ព្រែកប្រាកីឡាត្រូវបានបញ្ចប់ ខណៈពេលដែលត្រូវព្រះខ័ន
រាជ្យលេងវាយបកវិញលឿនៗ និងរកបាន២គ្រាប់សងវិញភ្លាមៗ ដែលនៅនាទីទី ៧៧ កីឡាករផាន់នី លីរដ្ឋា ទទួលបានបាល់ពីមិត្តរួមក្រុមរបស់គេទាត់បញ្ចូលទីបាន១គ្រាប់វិញ និងនាទី៨១ខ្សែប្រយុទ្ធដ៏ឆ្នើមរបស់ព្រះខ័នរាជ្យឃួន ឡាបូរ៉ាវី ពាក់អាវលេខ១១បន្ថែមបាន១គ្រាប់ទៀត។ ជ័យជម្នះ ៥-៤ដែលព្រះខ័នរាជ្យបានយកឈ្នះលើព្រែកប្រាកីឡាពេលនោះបានធ្វើឱ្យអ្នកគាំទ្ររបស់គេមិនសូវមានការសប្បាយចិត្តប៉ុន្មានឡើយ ដោយពួកគេយល់ថា អាជ្ញាកណ្តាលកាត់ក្តីមិនត្រឹមត្រូវមានការលំអៀងទៅលើព្រះខ័នរាជ្យច្រើនជាង។
ព្រះខ័នរាជ្យលេងបាន៥ប្រកួត ឈ្នះ២ ស្មើ២ ចាញ់១ មាន៨ពិន្ទុ។ ចំណែកឯព្រែកប្រាកីឡាលេងបាន៥ប្រកួតស្គាល់ស្មើតែ១ប្រកួតប៉ុណ្ណោះគឺចាញ់អស់៤ប្រកួតទៅហើយមាន១ពិន្ទុ ៕
ចែករំលែកព័តមាននេះ