អ្នកនាំពាក្យម្នាក់របស់កងទ័ពថៃអះអាងកាលពីថ្ងៃទី១៨ ឧសភា ថា កងទ័ពថៃពុំមានបញ្ហាណាមួយឡើយក្នុងការធ្វើការក្រោមការដឹកនាំរបស់គណបក្សប្រឆាំង គឺគណបក្សភឿថៃជាគណបក្សគាំទ្រអតីតនាយករដ្ឋមន្ត្រី លោកថាក់ស៊ីន ស៊ីណាវ៉ាត្រា ដែលត្រូវកងទ័ពផ្តួលរំលំតាមរយៈរដ្ឋប្រហារយោធាមួយកាលពីឆ្នាំ២០០៦ ប្រសិនបើគណបក្សនេះដណ្តើមបានជ័យជំនះក្នុងការបោះឆ្នោតទូទៅនាពេលខាងមុខនេះ ហើយបង្កើតរដ្ឋាភិបាលថ្មីមួយ។
អ្នកនាំពាក្យយោធារូបនោះវរសេនីយ៍ឯក SANSERN KAEWKAMNERD ឱ្យដឹងថា បណ្តានាយទាហានរបស់កងទ័ពត្រៀមធ្វើការក្រោមការដឹកនាំរបស់គណបក្សណាដែលជាប់ឆ្នោតទទួលបានសម្លេងភាគច្រើន។ កងទ័ពថៃប្រាថ្នាតែមួយគត់ចង់ឃើញប្រទេសបោះជំហានទៅមុខជាមួយនឹងប្រព័ន្ធប្រជាធិបតេយ្យដែលអាចឱ្យប្រជាជនបោះឆ្នោតឱ្យបេក្ខជនណាដែលមានសក្តានុពលអភិវឌ្ឍប្រទេស ពង្រឹងកំណើនសេដ្ឋកិច្ចនិងសន្តិភាពសង្គម។
ពេលសួរអំពីបញ្ហាចោទឡើងជាយថាហេតុនានាប្រសិនបេក្ខជនគណបក្សភឿថៃ លោកស្រីយិញលុក ស៊ីណាវ៉ាត្រា ប្អូនស្រីលោកថាក់ស៊ីនត្រូវបានជ្រើសរើសជានាយករដ្ឋមន្ត្រី វរសេនីយ៍ឯក SANSERN ឆ្លើយថា សង្គមរបស់ថៃត្រូវគោរពលទ្ធផលនៃការបោះឆ្នោត ហើយការបោះឆ្នោតនោះត្រូវប្រព្រឹត្តទៅដោយសេរី និងត្រឹមត្រូវ។
ទោះបីជាលោកថាក់ស៊ីនត្រូវបង្ខំឱ្យចាកចេញពីអំណាចដោយសាររដ្ឋប្រហារយោធាមួយកាលពីឆ្នាំ២០០៦ក្តីក៏លោកនៅតែសកម្មលើឆាកនយោបាយរបស់ប្រទេសដែរ។ កាលពីថ្ងៃទី១៦ ឧសភា កន្លងមកនេះ គណបក្សភឿថៃជាគណបក្សនយោបាយទី៣ផ្គត់ផ្គង់លុយកាក់ដោយលោកថាក់ស៊ីនបានសំរេចជាឯកច្ឆន្ទ
លើកលោកស្រីយិញលុក ស៊ីណាវ៉ាត្រា ប្អូនស្រីពៅរបស់លោកថាក់ស៊ីន ធ្វើជាបេក្ខនារីរបស់គណបក្សសំរាប់តំណែងនាយករដ្ឋមន្ត្រី។ ប្រសិនបើគណបក្សភឿថៃឈ្នះឆ្នោតទទួលបានសម្លេងភាគច្រើននោះលោកស្រីយិញលុក នឹងក្លាយជានាយករដ្ឋមន្ត្រីស្ត្រី លើកដំបូងគេរបស់ថៃ។ ការបោះឆ្នោតសភាថៃគ្រោងធ្វើនាថ្ងៃទី៣ កក្កដា ខាងមុខនេះ ៕
ចែករំលែកព័តមាននេះ