ខេត្តបាត់ដំបង ៖ « ក្នុងនាមខ្ញុំជាតំណាងរាស្ត្រមណ្ឌលបាត់ដំបង និងជាអតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃផង ខ្ញុំសូមអំពាវនាវដល់មន្ត្រីរាជការ រដ្ឋបាលគ្រប់ជាន់ថ្នាក់ បងប្អូនប្រជាពលរដ្ឋ និងជាពិសេស ក្មួយៗទាំងអស់ សូមមេត្តាចូលរួមអនុវត្តឲ្យកាន់តែមានប្រសិទ្ធភាពនូវគោលនយោបាយភូមិ-ឃុំមានសុវត្ថិភាព» ។ នេះជាប្រសាសន៏អំពាវនាវរបស់សម្ដេចក្រឡាហោម ស ខេង ឧត្តមក្រុមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា ដែលបានថ្លែងទៅកាន់មន្ត្រីរាជការគ្រប់ជាន់ថ្នាក់ ប្រជាពលរដ្ឋរាប់រាប់ម៉ឺននាក់ និងក្រុមកីឡាករ-កីឡាការិនី ចំណុះទូកប្រមាណជិត១៦០០នាក់ ក្នុងកម្មវិធីបិទបញ្ចប់ការប្រណាំងទូក ក្នុងពិធីបុណ្យអុំទូក និងបណ្ដែតប្រទីបនៅល្ងាចថ្ងៃទី២៩ តុលា នៅក្នុងវេទិការបុណ្យអុំទូកក្រុងបាត់ដំបង ។
ជាមួយនឹងសារអំពាវនាវឲ្យមានការចូលរួមអនុវត្តឲ្យកាន់តែមានប្រសិទ្ធភាពនូវគោលនយោបាយ «ភូមិ-ឃុំមានសុវត្ថិភាព» នេះ សម្ដេចក្រឡាហោម ស ខេង ហាក់បានផ្ដោតខ្លាំងទៅលើបញ្ហា
«គ្រឿងញៀន» ដែលសម្ដេចចាត់ទុកថា ជាផ្នែកមួយដែលសង្គមកម្ពុជា បច្ចុប្បន្ន កំពុងប្រឈមខ្លាំង និងបារម្ភបំផុត ។ នៅចំពោះមុខមន្ត្រីនានា ប្រជាពលរដ្ឋរាប់ម៉ឺននាក់ ដែលបានចូលរួមទស្សនាការប្រណាំងទូកយ៉ាងជក់ភ្នែក និងចំពោះមុខក្រុមកីឡាប្រណាំងទូកជិត១៦០០នាក់ផង សម្ដេចបានថ្លែងថា «គ្រឿងញៀនគឺជាបញ្ហាគ្រោះថ្នាក់បំផុត បើសិនយើងធ្វើមិនបានជោគជ័យ នឹងការប្រយុទ្ធប្រឆាំងនឹងគ្រឿងញៀននេះ» ។
សម្ដេចបានរំលឹកថា «ក្នុងអណត្តិទី៦ កន្លងទៅនេះ ខ្ញុំនៅចាំបានថា ខ្ញុំតែងរំលឹក និងលើកឡើងជាញឹកញាប់ យើងត្រូវតែគ្រប់គ្រងស្ថានភាពគ្រឿងញៀនឲ្យបាន ។ យើងមិនទុកឲ្យគ្រឿងញៀនគ្រប់គ្រងយើងទេ ។ ឥឡូវនេះ ការរីករាលដាលនៃការចែកចាយ ការប្រើប្រាស់គ្រឿងញៀន បាននិងកំពុងមានការវិវឌ្ឍន៍មិនជាល្អ សម្រាប់យើងប៉ុន្មានទេ» ។ សម្ដេចក្រឡាហោមបានពន្យល់ថា «បើនិយាយបែបនេះ មិនមែនមានន័យថា ស្ថានភាពគ្រឿងញៀន វាបានគ្រប់គ្រងយើងនោះទេ។
យើងនៅតែគ្រប់គ្រងវាបាន តែបើស្ថានភាពនេះ យើងមិនបានយកចិត្តទុកដាក់ទាំងអស់គ្នា ដើម្បីកំចាត់វា និងដោះស្រាយវាទេ វានឹងអាចឈានដល់ស្ថានភាពមួយ ដែលយើងមិនអាចគ្រប់គ្រងវាបានជាក់ជាមិនខាន»។ សម្ដេចបានបង្ហាញពីផលវិបាកដោយសារគ្រឿងញៀននេះថា «ពេលនេះមិនត្រឹមតែប៉ះពាល់ដល់សុខភាពសាធារណៈ ធនធានមនុស្សរបស់យើងទេ វានឹងបង្កផលប៉ះពាល់ដល់ក្រុមគ្រួសារ និងសង្គមជាតិយើងទាំងមូលតែម្ដង។ ចឹងហើយ ខ្ញុំសូមអំពាវនាវដ៏ទទូចថា យើងទាំងអស់គ្នាត្រូវមានឆន្ទៈ ឲ្យបានមោះមុត និងដាច់ខាត ដើម្បីកំចាត់គ្រឿងញៀន» ។
ពាក់ព័ន្ធនឹងការប្រយុទ្ធប្រឆាំងគ្រឿងញៀននេះ កន្លងមក គេសង្កេតឃើញកម្លាំងសមត្ថកិច្ចគ្រប់ស្ថានប័ន បានប្រឹងប្រែងយ៉ាងសកម្មគួរឲ្យកត់ចម្គាល់ ក្នុងការបង្ក្រាបបទល្មើសគ្រឿងញៀននេះ រហូតចាប់ខ្លួនជនប្រព្រឹត្តជាបន្តបន្តាប់ និងវត្ថុតាងបញ្ជូនទៅកាន់តុលាការ ។ ជាពិសេស កម្លាំងនគរបាល ដែលហាក់បានបង្ហាញនូវសកម្មភាពដ៏មមារញឹកជាងកម្លាំងកងរាជអាវុធហត្ថ ។ ប៉ុន្តែតាមការសម្គាល់កម្លាំងនគរបាលបង្ក្រាបបានត្រឹមតែបទល្មើសតូចតាចប៉ុណ្ណោះ ខុសពីកម្លាំងកងរាជអាវុធហត្ថ ដែលចេញបង្ក្រាបយូរៗម្ដង ប៉ះចំបទល្មើសធំដុំ ។
នៅក្នុងកិច្ចប្រតិបត្តិការចុងក្រោយចំនួន០២ករណីរបស់កងរាជអាវុធហត្ថខេត្តបាត់ដំបង ត្រូវគេមើលឃើញថា គឺជាការបង្ក្រាបបទល្មើសគ្រឿងញៀនដ៏ធំដុំ ដែលមិនធ្លាប់មានប្រវត្តិសោះពីមុនមក។ គេនៅចាំបានថា ក្នុងចំណោម០២ករណីធំៗ នៃការបង្ក្រាបបទល្មើសគ្រឿងញៀនគួរឲ្យកត់សម្គាល់របស់កម្លាំងកងរាជអាវុធហត្ថនេះ គឺករណីទី១ ការបង្ក្រាបដ៏ធំបំផុតមិនធ្លាប់មាន កាលរសៀលថ្ងៃទី១៩ មិថុនា ឆ្នាំ២០២៣ នៅចំណុចភូមិកាប់គោថ្មី សង្កាត់អូរចា ក្រុងបាត់ដំបង។
កម្លាំងកងរាជអាវុធហត្ថបានឃាត់ខ្លួនជនសង្ស័យម្នាក់ឈ្មោះ ថោង សូស៊ីវិន ភេទប្រុស អាយុ២៣ឆ្នាំ ជាជាងជួសជុលម៉ូតូ នៅភូមិបោះពោធិ ឃុំអូរដំបង១ ស្រុកសង្កែ ។ សមត្ថកិច្ចរឹបអូសថ្នាំញៀនប្រភេទ «ម៉ាទឹកកក ឬ ICE » បានជាង៣០គីឡូក្រាម និងវត្ថុតាងពាក់ព័ន្ធជាច្រើនទៀត ។ ដោយឡែក ការបង្ក្រាបដ៏ធំដុំករណីទី២ កាលពីព្រលប់ថ្ងៃទី២៥ តុលា ឆ្នាំ២០២៣ នេះដែរ នៅលើផ្លូវជាតិលេខ៥ ត្រង់ចំណុចភូមិវាលទ្រា ឃុំអូរតាគី ស្រុកថ្មគោល។
នៅក្នុងកិច្ចប្រតិបត្តិការនេះ កម្លាំងកងរាជអាវុធហត្ថបានឃាត់ខ្លួនជនស្ស័យ០២នាក់ ឈ្មោះ ប៊ូ សុផាត ហៅ ហ៊ុល អាយុ៦៣ឆ្នាំ និងឈ្មោះ លី ធារិទ្ធ អាយុ៤២ឆ្នាំ ។ សមត្ថកិច្ចរឹបអូសបានគ្រឿងញៀនប្រភេទ «ម៉ាទឹកកក ឬ ICE» បានចំនួនជាង១០គីឡូក្រាម រថយន្តមួយគ្រឿង និងវត្ថុតាងពាក់ព័ន្ធជាច្រើនទៀត ។ នេះគឺជាស្នាដៃដ៏ធំដុំរបស់កងរាជអាវុធហត្ថខេត្ត ដែលធ្វើបាននៅក្នងឆ្នាំ២០២៣នេះ ខណៈកម្លាំងជំនាញនគរបាលបង្ក្រាបបានស្ទើររាប់ភ្លេច តែជាបទល្មើសតូចតាច។
យ៉ាងណាក្ដី ជុំវិញបញ្ហាគ្រឿងញៀនដដែលនេះ សម្ដេចក្រឡាហោម ស ខេង ក៏បានថ្លែងផ្ដាំផ្ញើដល់មហាជនថា «យើងទាំងអស់គ្នា ត្រូវចូលរួមឲ្យសកម្ម ក្នុងការប្រយុទ្ធប្រឆាំងគ្រឿងញៀន។ ជាពិសេស យុវជនដែលជាមុខសញ្ញាគ្រឿងញៀនងាយនឹងលុកលុយ។ ដូច្នេះ ចាំបាច់ត្រូវតែចូលរួមគាំទ្រប្រឆាំងគ្រឿងញៀន ។ ចូលរួមឲ្យខាងតែបាន ដើម្បីដោះស្រាយបញ្ហាស្មុគស្មាញនេះ» ។
ជាចុងក្រោយ សម្ដេចក៏បានលើកឡើងដែរថា កាលពីអណត្តិទី៦ កន្លងទៅយើងបានបើកយុទ្ធនាការប្រយុទ្ធប្រឆាំងគ្រឿងញៀននេះជាបន្តបន្ទាប់។ ដូច្នេះ សម្ដេចរំពឹងថា ក្នុងអណត្តិទី៧ នេះរាជរដ្ឋាភិបាល និងអាជ្ញាធរជាតិប្រយុទ្ធប្រឆាំងគ្រឿងញៀន ក៏ដូចសមត្ថកិច្ចពាក់ព័ន្ធនានានឹងបន្តបើកយុទ្ធនាការបែបនេះទៀត ប្រកបដោយការទទូលខុសត្រូវ និងទទួលបានជោគជ័យ ហើយយើងទាំងអស់គ្នា នឹងចូលរួមយ៉ាងពេញទំហឹងក្នុងការប្រយុទ្ធប្រឆាំងគ្រឿងញៀននេះ ។
ចែករំលែកព័តមាននេះ