បុរសពីរនាក់ បន្ទាប់ពីផឹកស៊ីជាមួយមិត្តភក្កិផ្សេងទៀត រហូតដល់ស្រវឹងជោកជាំ រួចជិះម៉ូតូមួយគ្រឿងលឿនពេក ក៏រអិលដួលតែម្ដង ភ្លាមៗនោះក៏មានជនសង្ស័យចំនួន៣នាក់ជិះម៉ូតូមួយគ្រឿង មកធ្វើជាជួយលើកម៉ូតូឱ្យជនរងគ្រោះ បែរជាប្រើល្បិ.ច
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសពីរនាក់ បន្ទាប់ពីផឹកស៊ីជាមួយមិត្តភក្កិផ្សេងទៀត រហូតដល់ស្រវឹងជោកជាំ រួចជិះម៉ូតូមួយគ្រឿងលឿនពេក ក៏រអិលដួលតែម្ដង ភ្លាមៗនោះក៏មានជនសង្ស័យចំនួន៣នាក់ជិះម៉ូតូមួយគ្រឿង មកធ្វើជាជួយលើកម៉ូតូឱ្យជនរងគ្រោះ បែរជាប្រើល្បិ.ចជិះម៉ូតូរបស់ជនរងគ្រោះយកទៅបាត់ស្រមោលតែម្ដង បង្កឱ្យមានការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺ ថ្ងៃទី២៩ ខែតុលា ឆ្នាំ២០២៣ នៅតាមបណ្តោយផ្លូវបេតុងបែកជាបួន ស្ថិតក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មាននៅកន្លែងកើតហេតុ បានប្រាប់ឱ្យដឹងថា នៅមុនពេលកើតហេតុ ជនរងគ្រោះមានគ្នា២នាក់ជិះម៉ូតូមួយគ្រឿង ម៉ាកហុងដាឌ្រីម ស៊េរីឆ្នាំ២០២០ ពណ៌ខ្មៅ ចំណែកឯមិត្តភក្កិ២នាក់ទៀតជិះម៉ូតូមួយគ្រឿង ម៉ាកហុងដាឌ្រីម ពណ៌ខ្មៅ មិនចាំសេរី មិនចាំស្លាកលេខបានចេញពីផឹកស៊ីជាមួយមិត្តភក្កិនៅម្តុំផ្សាររាជ្យ២ ស្ថិតក្នុងសង្កាត់ចោមចៅទី៣ បានជិះម៉ូតូក្នុងគោលបំណងត្រឡប់ទៅសំរាកនៅកន្លែងធ្វើការវិញ ម្តុំសង្កាត់សំរោងក្រោម ក្នុងស្ថានភាព ស្រវឹងជោកជាំទាំង៤នាក់។
ប្រភពដដែលបន្តថា ខណៈពេលជិះមកដល់កន្លែងកើតហេតុខាងលើ មិត្តភក្កិ២នាក់បានឈប់ម៉ូតូ ដើម្បីបត់ជើងតូច ចំណែកឯជនរងគ្រោះទាំង២នាក់វិញក៏បានជិះម៉ូតូមកមុន ក្នុងល្បឿនយ៉ាងលឿន។ លុះពេលជិះមកដល់ផ្លូវបំបែកជាបួន ស្រាប់តែរអិលបណ្ដាលឱ្យដួលម៉ូតូតែម្ដង ស្របពេលនោះដែរ ក៏លេចមុខជនសង្ស័យចំនួន៣នាក់ ជិះម៉ូតូមួយគ្រឿង មិនចាំម៉ាក បានមកធ្វើជាជួយលើកម៉ូតូជនរងគ្រោះ ហើយដោយឃើញជនរងគ្រោះទាំង២នាក់ស្ថិតក្នុងស្ថានភាពស្រវឹងជោកជាំផងនោះ ជនសង្ស័យក៏លើកម៉ូតូជនរងគ្រោះជិះរត់គេចខ្លួនបាត់ស្រមោលតែម្ដង។
ក្រោយពេលកើតហេតុ ជនរងគ្រោះទាំង២នាក់បាននាំគ្នាទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសំរោងក្រោម ដើម្បីអោយជួយអន្តរាគមន៍តែម្ដង៕
ចែករំលែកព័តមាននេះ