រថយន្ត១គ្រឿងត្រូវអណ្ដាតភ្លើងឆាបឆេះយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់សន្តិសុខផ្សារធំថ្មីទាំងក្បាលព្រលប់ នាំគ្នារត់យកបំពង់ពន្លត់អគ្គិភ័យមកធ្វើការបា.ញ់ពន្លត់
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្ត១គ្រឿងត្រូវអណ្ដាតភ្លើងឆាបឆេះយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់សន្តិសុខផ្សារធំថ្មីទាំងក្បាលព្រលប់ នាំគ្នារត់យកបំពង់ពន្លត់អគ្គិភ័យមកធ្វើការបា.ញ់ពន្លត់ជួយទាន់ ដោយមិនបង្កឱ្យឆាបឆេះខ្លាំងជាងនេះទៀតនោះទេ។ ហេតុការណ៍នេះ បានកើតឡើងកាលពីវេលាម៉ោង៧និង៤០នាទីយប់ ថ្ងៃទី២៧ ខែតុលា ឆ្នាំ២០២៣ នៅចំណុចខាងត្បូងផ្សារធំថ្មី ស្ថិតក្នុងសង្កាត់ផ្សារថ្មី១ ខណ្ឌដូនពេញ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គេឃើញម្ចាស់រថយន្តខាងលើ បានយករថយន្តរបស់ខ្លួនម៉ាក KIA MORNING ពណ៌ស ដែលមានស្លាកលេខ ភ្នំពេញ2AO.1654 មកចតនៅខាងត្បូងផ្សារធំថ្មី ត្រង់ចំណុចផ្ទះលក់មាស មួយកន្លែង។
ប្រភពដដែលបន្តថា លុះពេលឈប់រថយន្ត គេក៏ឃើញម្ចាស់រថយន្តដើរចេញទៅញ៉ាំអាហារបាត់ទៅ ដោយបន្សល់ទុកតែរថយន្តនៅកន្លែងដដែល។ ប្រមាណមួយសន្ទុះធំ គេក៏ស្រាប់តែឃើញមានផ្សែង និងអណ្តាតភ្លើងឆេះចេញពីរថយន្តនោះ ចាប់ពីឆេះតិចទៅច្រើន រហូតដល់ឆាបឆេះក្បាលរថយន្តផ្នែកខាងមុខយ៉ាងសន្ធោសន្ធៅតែម្ដង។
ប្រភពដដែលបន្តទៀតថា ភ្លាមៗនោះឃើញស្ថានភាពមិនស្រួល ប្រជាពលរដ្ឋក៏បានទាក់ទងសុំឱ្យសមត្ថកិច្ចហៅរថយន្តពន្លត់អគ្គិភ័យមកជួយអន្តរាគមន៍ ប៉ុន្តែដោយសារខ្លាចអណ្ដាតភ្លើងឆាបឆេះខ្លាំងជាងនេះ ភ្នាក់ងារខាងផ្សារធំថ្មី រួមមានសន្តិសុខប្រចាំបរិវេណផ្សារ បាននាំគ្នាជួយសង្គ្រោះបឋម ដោយយកបំពង់ឧស្ម័នបា.ញ់ពន្លត់ប្រមាណ១៣បំពង់ ទើបភ្លើងដែលឆេះរថយន្តនោះថមថយទៅវិញ។
ប្រភពដដែលបានបញ្ជាក់ទៀតថា ដើម្បីចៀសវាងការឆាបឆេះបន្តទៀត ប្រជាពលរដ្ឋក៏សម្រេចចិត្តវា.យបំបែកកញ្ចក់រថយន្ត ដើម្បីបើកទ្វាររថយន្ត និងយកទឹកមកធ្វើការបា.ញ់ពន្លត់បន្ថែម រហូតដល់រលត់ទាំងស្រុង និងមិនបង្កឱ្យមានមនុស្សណាម្នាក់រងរបួសនោះទេ។
ក្រោយពេលកើតហេតុ រថយន្តត្រូវបានប្រគល់ជូនម្ចាស់ដើមវិញ ដើម្បីយកទៅធ្វើការជួសជុលដោយខ្លួនឯង ព្រោះវាមិនបានប៉ះពាល់ដល់ទ្រព្យសម្បត្តិរដ្ឋនោះទេ៕
ចែករំលែកព័តមាននេះ