ខេត្តកណ្ដាល ៖ យុវជនម្នាក់បានជីកកាប់កាយដីក្នុងចម្ការក្បែរផ្ទះរបស់ខ្លួន ស្រាប់តែប្រទះឃើញរូបសំណាកព្រះបដិមាករ១ព្រះអង្គ ដែលដាច់បាត់ព្រះកេស និងប្រអប់ដៃទាំង២កប់នៅក្នុងដី ប៉ុន្តែនៅពុំទាន់ដឹងថា ជារូបសំណាកអ្វីឲ្យពិតប្រាកដនៅឡើយទេ ។ ព្រោះពុំទាន់ឆ្លងកាត់ការវាយតម្លៃពីខាងមន្ត្រីជំនាញនៃមន្ទីរវប្បធម៌…
ខេត្តកណ្ដាល ៖ យុវជនម្នាក់បានជីកកាប់កាយដីក្នុងចម្ការក្បែរផ្ទះរបស់ខ្លួន ស្រាប់តែប្រទះឃើញរូបសំណាកព្រះបដិមាករ១ព្រះអង្គ ដែលដាច់បាត់ព្រះកេស និងប្រអប់ដៃទាំង២កប់នៅក្នុងដី ប៉ុន្តែនៅពុំទាន់ដឹងថា ជារូបសំណាកអ្វីឲ្យពិតប្រាកដនៅឡើយទេ ។ ព្រោះពុំទាន់ឆ្លងកាត់ការវាយតម្លៃពីខាងមន្ត្រីជំនាញនៃមន្ទីរវប្បធម៌ និងវិចិត្រសិល្បៈខេត្តកណ្ដាលនៅឡើយ គ្រាន់តែភ្លាមៗនោះមានសន្និដ្ឋានជាបឋមតៗគ្នាថា ជារូបសំណាងព្រះអង្គចេកព្រអង្គចមតែប៉ុណ្ណោះ ។
ហេតុការណ៍ បានបង្កឲ្យមានការភ្ញាក់ផ្អើលកាលពីវេលាព្រឹកថ្ងៃទី២៧ ខែតុលា ឆ្នាំ២០២៣ នៅក្នុងភូមិព្រៃទទឹង ឃុំទួលព្រេជ ស្រុកអង្គ្នួល ខេត្តកណ្ដាល។ យុវជនដែលជាអ្នកជីកដីប្រទះឃើញព្រះបដិមាករនោះ ឈ្មោះ វាសនា បញ្ញា ហៅណយ អាយុ១៩ឆ្នាំ មុខរបរកសិករ មានទីលំនៅក្នុងភូមិខាងលើ ។
តាមប្រភពព័ត៌មានបានឲ្យដឹងថា ព្រះបដិមាករខាងលើ កប់នៅក្នុងដីមិនជ្រៅប៉ុន្មាននោះទេ ហើយពុំដឹងថា ស្ថិតនៅទីនោះតាំងពីពេលណាមកឡើយ នៅព្រឹកថ្ងៃទី២៧ ខែតុលា យុវជនវាសនា បញ្ញា បានកាប់កាយពង្រាបដីចម្ការរបស់ខ្លួន ខណៈនោះក៏ស្រាប់តែប្រទះឃើញព្រះបដិមានោះកប់នៅក្នុងដី ក៏បានគាស់យកចេញមកបង្កឲ្យភ្ញាក់ផ្អើលដល់អ្នកភូមិ និងរាយការណ៍ជូនអាជ្ញាធរឃុំបានដឹងភ្លាមៗដែរ ។
បើតាមមន្ត្រីនគរបាលប៉ុស្តិ៍ទួលព្រេជបានប្រាប់ឲ្យដឹងថា ក្រោយទទួលបានដំណឹងនោះ មន្ត្រីសាលាឃុំទួលព្រេជបានចុះទៅពិនិត្យជាក់ស្ដែងហើយដែរ ប៉ុន្តែពុំទាន់មានការវាយតម្លៃថា ជារូបសំណាកអ្វី និងជាចម្លាក់ថ្មភក់ ឬថ្មធម្មតានៅឡើយទេ ។ បន្ទាប់មក មន្ត្រីខាងលើបានរាយការណ៍បន្តជូនទៅកាន់មន្ទីរវប្បធម៌និងវិចិត្រសិល្បៈខេត្តកណ្ដាល ដើម្បីចាត់មន្ត្រីជំនាញចុះទៅពិនិត្យនិងវាយតម្លៃបន្ត ប៉ុន្តែរហូតមកដល់វេលារសៀលថ្ងៃដដែល នៅពុំទាន់ឃើញមានមន្ត្រីជំនាញណាម្នាក់ចុះទៅនៅឡើយ ។
ប្រភពដដែលបានប្រាប់បន្ថែមទៀតថា ព្រះបដិមាអង្គនេះ មានកម្ពស់ប្រមាណ១ម៉ែត្រ បានដាច់បាត់ព្រះកេស និងប្រអប់ដៃទាំង២ ដោយពុំដឹងថា ត្រូវគេកាត់យកឬក៏ដាច់បាត់ដោយប្រការណាមួយនោះទេ ហើយខណៈនេះកំពុងត្រូវបានរក្សាទុកនៅក្នុងផ្ទះរបស់យុវជនខាងលើ។
មិនតែប៉ុណ្ណោះយុវជនដែលជាអ្នកប្រទះឃើញ រួមជាមួយអ្នកភូមិបាននាំគ្នាលាងទឹកសម្អាតរួចរាល់ហើយ ព្រមទាំងមានអ្នកទៅអុជធូបសុំលាភសំណាង សុំសេចក្ដីសុខ និងយកទឹកទៅចាក់ស្រោចលើព្រះកាយ រួចត្រងទុកផឹក និងស្រោចក្បាល លុបមុខ ដើម្បីសិរីសួស្ដីផ្ទាល់ខ្លួននិងក្រុមគ្រួសាររៀងៗខ្លួនផងដែរ ។
ចែករំលែកព័តមាននេះ