អាជ្ញាធរទុយនីស៊ីប្រកាសកាលពីថ្ងៃទី១៨ ឧសភា ពីការលុបចោលបំរាមគោចរដែលដាក់តាំងពីថ្ងៃទី៧ ឧសភា មកនៅក្នុងប្រទេសដើម្បីរារាំងការធ្វើបាតុកម្មដែលបរិហារចំពោះភាពយឺតយ៉ាងនៃការកែទម្រង់ចាប់តាំងពីការផ្តួលរំលំប្រធានាធិបតីលោកហ្ស៊ីនបេន អាលី ពីខែមករាមក ។ ក្រសួងមហាផ្ទៃអះអាងក្នុងសេចក្តីប្រកាសមួយពីការសម្រេចចិត្តលុបចោលបំរាមគោចរដែលបានសម្រាលកាលពីថ្ងៃទី១៤ ឧសភា កន្លងមក នេះ ដោយសារស្ថេរភាពនៃសភាពការណ៍សន្តិសុខក្នុងប្រទេស។
មនុស្សប្រមាណជា១.៤០០នាក់ បានត្រូវចាប់ខ្លួនរយៈពេល១០ថ្ងៃចុងក្រោយនេះ នៅទុយនីស៊ី ក្រោយបាតុកម្ម ប្រឆាំងរដ្ឋាភិបាលទាំងឡាយ ។ ក្នុងចំណោមមនុស្សទាំងនេះ ៨នាក់ ទទួលការចោទប្រកាន់ពីបទសម្លាប់មនុស្សដោយចេតនា ៦២នាក់ជាប់ចោទពីបទរំលោភបំពានលើរាងកាយ និងប្រើអំពើហិង្សា។
ភាពតានតឹងមានការកើនឡើងនៅទុយនីស៊ីខណៈជិតដល់ការបោះឆ្នោតថ្ងៃទី២៤ កក្កដា ដែលត្រូវជ្រើសរើសសភាមួយទទួលបន្ទុកតាក់តែងរដ្ឋធម្មនុញ្ញថ្មី។
ពេលទៅបំពេញទស្សនកិច្ចនៅប្រទេសបារាំង នាយករដ្ឋមន្ត្រីទុយនីស៊ី លោក BEJI CAÏD ESSEBSI អះអាងប្រាប់ប្រធានាធិបតីបារាំងលោកនីកូឡាស់ សាកូហ្ស៊ី ថា ការបោះឆ្នោតនេះនឹងប្រព្រឹត្តទៅតាមកាលបរិច្ឆេទដែលបានគ្រោងទុក ។ នាយករដ្ឋមន្ត្រីទុយនីស៊ី និងប្រធានាធិបតីបារាំងអះអាងថា ទំនាក់ទំនងរវាងបារាំង និងអតីតអាណាព្យាបាលបារាំងគឺល្អប្រសើរបំផុត ៕
ចែករំលែកព័តមាននេះ