ខេត្តស្ទឹងត្រែង ៖ ប្រជាសហគមន៍ភ្នំជម្រកសត្វកំពុងនាំគ្នាធ្វើសកម្មភាពល្បាត ដើម្បីដេញបង្អើលជនខិលខូចចូលបរបាញ់ និងដាក់អន្ទាក់សត្វព្រៃនៅក្នុង តំបន់ព្រៃសហគមន៍ជាង៤ពាន់ហិចតាដែលមានពពួកសត្វចតុបាត និងសត្វស្លាបជាច្រើនប្រភេទកំពុងរស់នៅ ។
ក្នុងសកម្មភាពចុះធ្វើល្បាតតាមព្រៃសហគមន៍ភ្នំជំរកសត្វ នៅភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង លោក ម៉ឹង រដ្ឋា ប្រធានសហគមន៍នេះបានបញ្ជាក់ថា បន្ទាប់ពីអង្គការដៃគូបានដាក់កាមេរ៉សុវត្ថិភាព ពិនិត្យឃើញវត្តមានពពួកសត្វ ខ្ទីង ទន្សោង ប្រើសនិងសត្វស្លាបជាច្រើនប្រភេទទៀត ហើយប្រជាសហគមន៍បានធ្វើសកម្មភាពល្បាតក្នុងមួយសប្តាហ៍ម្តងដើម្បីបង្កើនការការពារ។
លោកបន្តថា សកម្មភាពនេះយើងបានដេញជនខិលខូច ដែលឆ្លៀតឱកាសចូលព្រៃបរបាញ់សត្វនិងដាក់អន្ទាក់ ដែលជាករណីប្រឈមធ្វើឱ្យបាត់បង់ និងប៉ះពាល់ដល់សត្វកំពុងរស់នៅ ។ លោកអំពាវនាវដល់បងប្អូនប្រជាពលរដ្ឋយើងសូមចូលរួមអភិរក្សសត្វព្រៃដោយមិនត្រូវយកជីវិតសត្វមកធ្វើអាជីវកម្មនោះទេ ហើយក្នុងករណីនេះប្រជាសហគមន៍ដឹងមុខសញ្ញាច្បាស់ និងដាក់ពាក្យបណ្តឹងទៅមន្ត្រីមានសមត្ថកិច្ចឱ្យចាត់ការតាមនិតិវិធី ។
លោកគាំសារ៉ាំង មេឃុំសំអាង បានបញ្ជាក់ថា៖កាលពីកិច្ចប្រជុំ ប្រចាំខែកម្លងមក លោកបានឱ្យក្រុមប្រជាការពារជួយផ្សព្វផ្សាយពីវិធានការការពារសម្បត្តិធនធានធម្មជាតិទាំងនេះ ព្រោះវាជាសម្បត្តិដែលមាននៅសល់ចុងក្រោយនៅក្នុងភូមិឃុំរបស់យើង ។
លោកបន្តថា ជាយុទ្ធសាស្ត្ររបស់មន្ទីរសរិស្ថានបើបងប្អូនណាមានប្រប្រាស់អាវុធកែច្នៃសូមយកមកប្រគល់ជូនអាជ្ញាធរមូលដ្ឋាន និងទទួលបានរង្វន់លើកទឹកចិត្តជូនបងប្អូនដើម្បីយើងរួមគ្នាអភិរក្សធនធានធម្មជាតិឱ្យមានប្រសិទ្ធភាព។
សូមបញ្ចាក់ថា នៅខេត្តស្ទឹងត្រែងអាជ្ញាធរខេត្តសហការជាមួយក្រសួងបរិស្ថាន បានធ្វើពិធីដុតកម្ទេចអាវុធកែច្នៃ និងអន្ទាក់សត្វចំនួនពីរលើករួចមកហើយ ដែលមានជាច្រើនពាន់ដើម ក្នុងនោះនៅស្រុកសៀមប៉ាងមួយលើក និងស្រុកសៀមបូកមួយលើក ដើម្បីបង្ហាញ់ពីការរឹតបន្តឹងផ្នែកច្បាប់និងដាស់ស្មារតីប្រជាជលរដ្ឋយើងឱ្យស្រឡាញ់ធនធានធម្មជាតិរបស់ខ្លួន៕
ចែករំលែកព័តមាននេះ