មានរថយន្តយីឌុបធុនយក្សជាច្រើនគ្រឿង សង្ស័យថា ដឹកទំនិញគេចពន្ធជាច្រើនប្រភេទលួ.ចឆ្លងដែនទៅប្រទេសវៀតណាម តាមច្រករបៀងនៃច្រកទ្វារព្រំដែនទួលស្ដី ស្ថិតនៅក្នុងភូមិកោះឬស្សី ឃុំទួលស្ដី ស្រុកចន្ទ្រា ដូចហែកឋិន ធ្វើឱ្យមហាជនដាក់ការសង្ស័យថា
ខេត្តស្វាយរៀង ៖ មានរថយន្តយីឌុបធុនយក្សជាច្រើនគ្រឿង សង្ស័យថា ដឹកទំនិញគេចពន្ធជាច្រើនប្រភេទលួ.ចឆ្លងដែនទៅប្រទេសវៀតណាម តាមច្រករបៀងនៃច្រកទ្វារព្រំដែនទួលស្ដី ស្ថិតនៅក្នុងភូមិកោះឬស្សី ឃុំទួលស្ដី ស្រុកចន្ទ្រា ដូចហែកឋិន ធ្វើឱ្យមហាជនដាក់ការសង្ស័យថា ទំនងជាសមត្ថកិច្ចពាក់ព័ន្ធទទួលបានសំណែនហើយមើលទៅ ទើបគ្មានការបង្ក្រាបបែបនេះ គឺដឹកទៅដល់ព្រំដែនយ៉ាងរលូនទៅហោង… ហេ! ហេ! ។
មហាជនទម្លាយករណីឈ្មួញដឹកទំនិញគេចពន្ធឆ្លងដែនទៅប្រទេសវៀតណាមនេះ បានកើតឡើងកាលពីរសៀលថ្ងៃទី២៥ ខែតុលា ឆ្នាំ២០២៣ នៅចំណុច្រករបៀងទួលស្តី ស្ថិតក្នុងឃុំទួលស្តី ស្រុកចន្ទ្រា។
បើតាមប្រភពពីមន្ត្រីច្រកទ្វារព្រំដែនទួលស្ដី ម្នាក់ សុំមិនបញ្ចេញឈ្មោះបានបង្ហើបឲ្យដឹងថា «ករណីក្រុមឈ្មួញលួ.ចដឹកទំនិញគេចពន្ធឆ្លងដែនទៅប្រទេសវៀតណាមទាំងខុសច្បាប់នេះ មានរយៈពេលជាយូរមកហើយ គឺក្រុមឈ្មួញបានដឹកទំនិញតាមរថយន្តយីឌុបដែលមានស្លាកយីហោ «K ដឹកជញ្ជួន 2023» ចេញពេលថ្ងៃ និងពេលយប់។ ហើយក៏មិនបានដឹងថា តើបង់ពន្ធជូនមន្ត្រីគយ ឬយ៉ាងណាទេ? ក៏ប៉ុន្តែបើពិនិត្យនៅច្រករបៀងនេះ មិនឃើញមានមន្ត្រីគយណាម្នាក់មកពិនិត្យ ឬបង់ពន្ធដែរ ដូចគេនិយាយណាត់គ្នានៅទីតាំងណាមួយ មិនអត់ទេ»។
ប្រភពដដែលបន្តទៀតថា ទំនិញគេចពន្ធទាំងនោះ រួមមាន ៖ គ្រឿងអេឡេចត្រូនិច (ម៉ាស៊ីនត្រជាក់ ទូទឹកកក), ស្រាដប, បារី, ស្ករ.ស ។ល។
ចំណែកកម្មករលើកទំនិញម្នាក់ ក៏បានប្រាប់ឲ្យដឹងដែរថា «យប់ខ្លះក៏មានបង្កប់ឈើប្រណីតឆ្លងដែនទៅប្រទេសវៀតណាមផងដែរ»។ ប្រភពដដែលបង្ហើបទៀតថា «ពេលផ្ទេរទំនិញឆ្លងដែន គឺពួកគេឃើញមានមន្ត្រី មានសមត្ថកិច្ចជាច្រើនស្ថាប័ន បានទៅយកប្រាក់ក្បាលរថយន្តពីឈ្មួញយ៉ាងពពាក់ពពូនដាក់ហោប៉ាវ»។
ទាក់ទិននឹងករណីខាងលើនេះដែរ មិនអាចរកការបំភ្លឺពីស្ថាប័នពាក់ព័ន្ធបានទេ ដោយសារទូរស័ព្ទចូល គឺគ្មានអ្នកទទួល។ ចំណែកអ្នកទទួលបានឆ្លើយថា «សូមសួរទៅស្ថាប័នជំនាញទៅ»។
អ្នករស់នៅតំបន់ច្រករបៀងខាងលើ និយាយពេញៗមាត់ថា មន្ត្រីប្រចាំការនៅទីនោះកំពុងត្រូវប៉ាន់ធំណាស់ តូចស៊ីតាមតូច ធំច្រា.ស់ច្រំតាមធំ ដូចទន្សោងគោព្រៃ ព្រោះបានមើលឃើញថា សមត្ថកិច្ចប្រចាំការនៅច្រករបៀងទួលស្តី កំពុងតែបើកដៃឲ្យឈ្មួញដឹកទំនិញឆ្លងដែនទៅប្រទេសវៀតណាមទាំងយប់ ទាំងថ្ងៃ ហើយសង្ស័យថា ជាទំនិញគេចពន្ធ ដោយនាំឱ្យបាត់ចំណូលចូលរបស់រដ្ឋ៕
ចែករំលែកព័តមាននេះ