អគ្គនាយកមូលនិធិរូបិយវត្ថុអន្តរជាតិ (IMF) លោក Dominique Strauss-Kahn បានសម្រេចសុំលាលែងចេញពីតំណែងហើយ ចំពេលមានការអំពាវនាវជាបន្តឱ្យលោកលាលែងចេញពីតំណែងក្រោយពីលោកត្រូវនាំខ្លួនដាក់ពន្ធនាគារពីបទចោទប្រកាន់រំលោភបំពានផ្លូវភេទលើស្ត្រីអ្នកបម្រើមួយរូបនៅសណ្ឋាគារមួយក្នុងទីក្រុងញូវយ៉ក ។ ក្នុងលិខិតខ្លីមួយច្បាប់ផ្ញើជូនក្រុមប្រឹក្សាប្រតិបត្តិការ IMF កាលពីល្ងាចថ្ងៃទី១៨ ឧសភា លោក Dominique Strauss-Kahn អះអាងថា លោកមិនបានប្រព្រឹត្តអ្វីខុសនោះទេ ហើយលោកថ្លែងថា ពេលនេះ លោកសុខចិត្តលាលែងចេញពីតំណែង ដើម្បីទុកកេរ្តិ៍ឈ្មោះឱ្យស្ថាប័ន IMF ដែលលោកបានបម្រើការងារជាអគ្គនាយកប្រកបដោយភាពស្មោះត្រង់ និងការលះបង់ ។
លោក Dominique Strauss-Kahn ថ្លែងថា «សរុបមកខ្ញុំចង់និយាយថា ខ្ញុំសូមបដិសេធរាល់ការចោទប្រកាន់ប្រឆាំងខ្ញុំទាំងអស់» ។
លោក Dominique បានសម្រេចលាលែងចេញពីតំណែងប្រមុខ IMF ក្រោយពីមេធាវីរបស់លោកកំពុងរៀបចំឯកសារដាក់ពាក្យបណ្តឹងទៅសាលាឧទ្ធរណ៍ និងតុលាការកំពូលក្រុងញូវយ៉កទាមទារឱ្យដោះលែងរូបលោក។
ក្រោយពីត្រូវចាប់ខ្លួនពីបទចោទប្រកាន់ប៉ុនប៉ងរំលោភបំពានផ្លូវភេទលើស្ត្រីបម្រើសណ្ឋាគារនោះ លោក Dominique Strauss-Kahn បានយល់ព្រមបង់ប្រាក់ចំនួន១លានដុល្លារអាេមរិក សុំនៅក្រៅឃុំ ប៉ុន្តែសំណើរបស់លោកត្រូវតុលាការក្រុងញូវយ៉កច្រានចោល ។ ការចាប់ខ្លួនលោក Dominique Strauss-Kahn ទាក់ទាញឱ្យមានការចាប់អារម្មណ៍នៅទូទាំងពិភព
លោក ៕
ចែករំលែកព័តមាននេះ