មន្ត្រីយេម៉ែននិយាយថា អគ្គលេខាធិការក្រុមប្រឹក្សាកិច្ចសហប្រតិបត្តិការឈូងសមុទ្រ (GCC) លោក Abdulafif al-Zayani បានចាកចេញពីទីក្រុងសាណា រដ្ឋធានីយេម៉ែន វិញ ហើយកាលពីថ្ងៃទី១៨ ឧសភា កន្លងមក ក្រោយពីទទួលបរាជ័យទៀត ក្នុងអំឡុងពេលដំណើរទស្សនកិច្ចនៅក្នុងប្រទេសនេះ ដើម្បីសម្របសម្រួលឱ្យមានកិច្ចព្រមព្រៀងផ្ទេរអំណាចរវាងលោកប្រធានាធិបតីអាលីអាប់ឌុលឡាហ៍ សាឡេហ៍ និងក្រុមប្រឆាំង។
មន្ត្រីវិមានប្រធានាធិបតីយេម៉ែនម្នាក់ដែលស្នើសុំមិនបញ្ចេញឈ្មោះបានប្រាប់ទីភ្នាក់ងារព័ត៌មានចិនស៊ីនហួថា លោក Al-Zayani បានចាកចេញពីប្រទេសយេម៉ែន ក្រោយពីការបដិសេធរបស់តំណាងក្រុមប្រឆាំងមិនព្រមជួបចរចាជាមួយសមភាគីរបស់ខ្លួនមកពីគណបក្សកំពុងកាន់អំណាចរបស់លោកសាឡេហ៍ ស្តីអំពីការរៀបចំសម្រាប់ការជួបចរចាគ្នាលើកក្រោយ បន្ទាប់ពីភាគីទាំង២ចុះចត្ថលេខាលើកិច្ចព្រមព្រៀងដែលសម្របសម្រួលបានដោយ GCC ។ ចំណែកមន្ត្រីរដ្ឋាភិបាលម្នាក់ទៀតនិយាយថា លោក Al-zayani បានចាកចេញពីប្រទេសយេម៉ែនក្រោយពីលោកបរាជ័យក្នុងការធានាឱ្យបានការចុះហត្ថលេខាលើកិច្ចព្រមព្រៀងនោះ ។
ទោះបីជាបែបណា អ្នកនាំពាក្យក្រុមប្រឆាំងយេម៉ែនបានបដិសេធមិនធ្វើអត្ថាធិប្បាយអំពីបញ្ហានោះទេ ប៉ុន្តែនិយាយថា ក្រុមរបស់លោកបានឯកភាពលើអ្វីគ្រប់យ៉ាង ហើយបានជម្រាបពីបញ្ហានេះដល់លោក al-zayani រួចរាល់ហើយដែរ រួចយើងរង់ចាំឱ្យលោកសាឡេហ៍ ចុះហត្ថលេខាលើកិច្ចព្រមព្រៀងនេះជាមុនសិន ទើបយើងចុះហត្ថលេខាដែរ ៕
ចែករំលែកព័តមាននេះ