រាជធានីភ្នំពេញ ៖ សម្តេចតេជោ ហ៊ុន សែន អតីតនាយករដ្ឋមន្ត្រី បានគូសបញ្ជាក់ថា អ្នកដែលប្រកាសថា នាយករដ្ឋមន្ត្រីបច្ចុប្បន្ននេះ មិនស្របច្បាប់នោះ…
រាជធានីភ្នំពេញ ៖ សម្តេចតេជោ ហ៊ុន សែន អតីតនាយករដ្ឋមន្ត្រី បានគូសបញ្ជាក់ថា អ្នកដែលប្រកាសថា នាយករដ្ឋមន្ត្រីបច្ចុប្បន្ននេះ មិនស្របច្បាប់នោះ គឺកាន់តែល្អ ព្រោះថា និយាយមួយជីវិតតែម្តងទៅ ព្រោះកុំឲ្យជំពាក់គុណ។
ថ្លែងក្នុងពិធីចុះហត្ថលេខា លើកិច្ចព្រមព្រៀងចងសម្ព័ន្ធភាព រវាងគណបក្សប្រជាជនកម្ពុជា ជាមួយបណ្ដាគណបក្សនយោបាយនៅកម្ពុជា ចំនួន២៧ផ្សេងទៀត នាព្រឹកថ្ងៃទី២៥ ខែតុលា ឆ្នាំ២០២៣ នៅវិមាន ៧ មករា សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានលើកឡើងថា តួនាទីសម្តេច ឥឡូវធំជាងមុន គឺជាឪពុកនាយករដ្ឋមន្ត្រី ។
សម្តេចតេជោ បានគូសបញ្ជាក់យ៉ាងដូច្នេះថា ៖ «ខ្ញុំពីមុនជានាយករដ្ឋមន្ត្រី តែឥឡូវជាឪពុកនាយករដ្ឋមន្ត្រី។ ហើយត្រង់ គេថា ស្របច្បាប់ ឬមិនស្របច្បាប់ គឺស្រេចតែគេ តែបើអ្នកទទួលស្គាល់មិនស្របច្បាប់ កាន់តែល្អ រហូតដល់មួយជីវិតតែម្តងទៅ កុំឲ្យជំពាក់គុណអ្នកឯង។ មិនចាំបាច់ទទួលស្គាល់ទេ ពាក្យថា មិនទទួលស្គាល់ហ្នឹង គឺមានន័យថា តម្រូវចិត្តអ្នកឯង ឬតម្រូវចិត្តប្រជាជនជាង ៦លាននាក់ ដែលបោះឆ្នោតឲ្យគណបក្សប្រជាជនកម្ពុជា» ។
សម្តេចតេជោ បានបន្ថែមថា សម្តេចពិតជាពិបាក ក្នុងការនិយាយជាមួយក្រុមជ្រុលនិយមណាស់។
សូមជម្រាបថា ការលើកឡើងរបស់សម្តេចតេជោ ហ៊ុន សែន បន្ទាប់ពីក្រុមប្រឆាំងនៅក្រៅប្រទេស ជាពិសេសលោកសម រង្ស៊ី និងបក្ខពួកខ្លួន បានប្រកាសថា នាយករដ្ឋមន្ត្រីបច្ចុប្បន្ន មិនស្របច្បាប់ ដោយសារការបោះឆ្នោតជ្រើសតាំងអ្នកតំណាងរាស្ត្រ អាណត្តិទី៧ កន្លងមកនេះ គ្មានគណបក្សប្រឆាំងចូលរួម ប្រកួតប្រជែងសន្លឹកឆ្នោត៕
ចែករំលែកព័តមាននេះ