ខេត្តប៉ៃលិន ៖ ក្រោយទទួលពាក្យបណ្តឹងកាលពីវេលាម៉ោង២និង១០នាទីរសៀល ថ្ងៃទី២៤ ខែតុលា ឆ្នាំ២០២៣ កម្លាំងនគរបាលក្រុងប៉ៃលិន បានចុះចាប់ឃាត់ខ្លួនជនសង្ស័យម្នាក់ ខណៈដែលនៅសុខៗ ក៏ដើរទៅធាក់រថយន្តរបស់ជនរងគ្រោះ លុះពេលសួរនាំក៏ទាញដំបងវា.យជនរងគ្រោះ២នាក់ប្តីប្រពន្ធឱ្យរងរបួស ថែមទាំងវា.យបំបែកសម្ភារៈក្នុងផ្ទះអស់មួយចំនួន បន្ទាប់ពីជនដៃដល់រូបនេះទើបតែចេញពីពន្ធនាគារបានរយ:ពេលប៉ុន្មានខែប៉ុណ្ណោះ លុះពេលពិនិត្យមើលទឹកនោម ក៏រកឃើញសារធាតុញៀ.នថែមទៀតផង។
ហេតុការណ៍ជនសង្ស័យវា.យម្ចាស់ផ្ទះទាំង២នាក់ប្តីប្រពន្ធ បណ្ដាលឱ្យរងរបួសនេះ បានកើតឡើងកាលពីវេលាម៉ោង១និង៣០នាទីរសៀល ថ្ងៃទី២៤ ខែតុលា ឆ្នាំ២០២៣ ស្ថិតនៅក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។
បើតាមប្រភពព័ត៌មានពីមន្ត្រីនគរបាល បានប្រាប់ឱ្យដឹងថា ជនរងគ្រោះខាងលើ ទី១- ឈ្មោះ ខេង កុសល ភេទប្រុស អាយុ៤៣ឆ្នាំ (ត្រូវជាប្តី) មុខរបរជាមេការសំណង់ រងរបួសដៃខាងឆ្វេង និងដៃខាងស្តាំ។ ជនរងគ្រោះទី២- ឈ្មោះ យន់ សាវឿន ភេទស្រី អាយុ៤៣ឆ្នាំ (ត្រូវជាប្រពន្ធ) មុខរបរអាជីវករលក់ដូរ របួសជើងស្ដាំ របួសកែងដៃខាងឆ្វេង និងពកក្បាលផ្នែកខាងស្តាំ។ អ្នកទាំង២នាក់រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។ ចំណែកជនដៃដល់វិញ មានឈ្មោះ ឈួន ឆែប ភេទប្រុស អាយុ៣៣ឆ្នាំ មុខរបរមិនពិតប្រាកដ រស់នៅក្នុងភូមិ សង្កាត់ខាងលើ មានផ្ទុកសារធាតុញៀ.ន។
ប្រភពដដែលបន្តថា កាលពីរសៀលថ្ងៃកើតហេតុ ជនសង្ស័យបានដើរចេញពីចំណុចក្រោយអាហារដ្ឋានយីហោ «ពេញចិត្ត» សំដៅទៅផ្ទះរបស់ជនរងគ្រោះ ដែលនៅក្រោយកន្លែងលក់គ្រឿងសំណង់យីហោ «យន់ កប»។ លុះពេលទៅដល់មុខផ្ទះរបស់ជនរងគ្រោះ ជនសង្ស័យរូបនេះក៏បានធាក់រថយន្តជនរងគ្រោះដែលចតទុកនៅខាងមុខផ្ទះមួយជើងពេញទំហឹងតែម្ដង ដោយមិនដឹងថា តើមានរឿងហេតុអ្វីនោះទេ?។
ប្រភពដដែលបន្តថា ពេលនោះជនរងគ្រោះបានសួរនាំទៅកាន់ជនសង្ស័យថា «ហេតុអ្វីបានជាធាក់ឡានខ្ញុំអញ្ចឹង?» ចំណែកជនសង្ស័យវិញក៏បានឆ្លើយតបទៅវិញថា «ឡានអាអែ.ង មានតម្លៃប៉ុន្មាន? រឿងអីអ.ញធាក់មិនបាន?» បន្ទាប់មកជនរងគ្រោះក៏បានប្រាប់ឱ្យជនសង្ស័យរូបនោះដើរទៅផ្ទះវិញ។ លុះមួយសន្ទុះក្រោយមក ជនសង្ស័យក៏ដើរត្រឡប់មកវិញ រួចនិយាយថា «អាអ្ហែ.ង ស្គាល់អ.ញឬអត់?» ស្រាប់តែភ្លាមៗនោះ ជនសង្ស័យក៏ទាញយកកំប៉ុងភេសជ្ជៈគ.ប់ទៅលើជនរងគ្រោះតែម្ដង ប៉ុន្តែជនរងគ្រោះគេចទាន់។
ប្រភពដដែលបន្តទៀតថា ក្រោយមក ជនសង្ស័យក៏ស្ទុះទៅវា.យជនរងគ្រោះ និងប្រពន្ធរបស់ជនរងគ្រោះ បណ្តាលឱ្យរងរបួស បន្ទាប់មកទៀតជនសង្ស័យរូបនេះក៏ទៅវា.យបំបែកសម្ភារៈប្រើប្រាស់អស់មួយចំនួនទៀត ហើយក៏រត់គេចខ្លួនបាត់។ ក្រោយពេលកើតហេតុ ជនរងគ្រោះបានទៅដាក់ពាក្យបណ្ដឹងនៅអធិការដ្ឋាននគរបាលក្រុងប៉ៃលិន និងស្នើសុំឱ្យសមត្ថកិច្ចអនុវត្តតាមនីតិវិធី។
ក្រោយពីទទួលបានពាក្យបណ្ដឹងពីជនរងគ្រោះ កម្លាំងផ្នែកនគរបាលយុត្តិធម៌ក្រុងប៉ៃលិន សហការជាមួយកម្លាំងប៉ុស្ដិ៍រដ្ឋបាលសង្កាត់ប៉ៃលិន នៅវេលាម៉ោងប្រហែល២និង៣០នាទីរសៀលថ្ងៃដដែល ក៏បានកំណត់មុខសញ្ញា និងនាំខ្លួនជនសង្ស័យខាងលើទៅកាន់អធិការដ្ឋាននគរបាលក្រុងប៉ៃលិន។
បន្ទាប់ពីសាកសួរ ជនសង្ស័យរូបនេះបានឆ្លើយសារភាពថា «ខ្លួនពិតជាបានប្រើអំពើហិ.ង្សាទៅលើជនរងគ្រោះទាំង២នាក់ប្តីប្រពន្ធ និងបានធាក់ឡានរបស់ជនរងគ្រោះ ព្រមទាំងវា.យបំផ្លិចបំផ្លាញទ្រព្យសម្បត្តិរបស់គេអស់មួយចំនួនពិតប្រាកដមែន»។
សូមបញ្ជាក់ផងដែរថា ជនសង្ស័យខាងលើនេះ គឺជាមុខសញ្ញា ទើបតែចេញពីពន្ធនាគារខេត្តប៉ៃលិន កាលពីថ្ងៃទី២០ ខែមីនា ឆ្នាំ២០២៣ ពាក់ព័ន្ធនឹងករណីធ្វើឱ្យខូចខាតដោយចេតនា និងប្រើប្រាស់គ្រឿ.ងញៀ.ន ហើយមិនទាន់បានប៉ុន្មានខែផង ស្រាប់តែពេលនេះជនសង្ស័យបង្កហិ.ង្សាលើ២នាក់ប្តីប្រពន្ធ ថែមទាំងបំផ្លាញទ្រព្យសម្បត្តិរបស់គេទៀត។
ពាក់ព័ន្ធករណីខាងលើនេះ នគរបាលបានឃាត់ខ្លួនជនសង្ស័យនៅកាន់អធិការដ្ឋាននគរបាលក្រុងប៉ៃលិនហើយ ដើម្បីអនុវត្តតាមនីតិវិធីនៃច្បាប់៕
ចែករំលែកព័តមាននេះ