ខេត្តកំពត ៖ មនុស្សគ្រប់រូប ទោះឋានៈណាក៏ដោយក៏មានចំណេះដឹងកើតចេញពីគ្រូបង្រៀនដែរ គ្រូជាពុម្ពផលិតធនធានមនុស្សដ៏សំខាន់ ។ នេះជាប្រសាសន៍របស់លោកម៉ៅ ធនិន អភិបាលខេត្តកំពត បានថ្លែងក្នុងពិធីសំណេះសំណាលជាមួយគ្រូបង្រៀនក្របខណ្ឌថ្មី…
ខេត្តកំពត ៖ មនុស្សគ្រប់រូប ទោះឋានៈណាក៏ដោយក៏មានចំណេះដឹងកើតចេញពីគ្រូបង្រៀនដែរ គ្រូជាពុម្ពផលិតធនធានមនុស្សដ៏សំខាន់ ។ នេះជាប្រសាសន៍របស់លោកម៉ៅ ធនិន អភិបាលខេត្តកំពត បានថ្លែងក្នុងពិធីសំណេះសំណាលជាមួយគ្រូបង្រៀនក្របខណ្ឌថ្មី ដែលត្រូវចេញបំរើការងារសំរាប់ឆ្នាំ២០២៣ នៅមន្ទីរអប់រំយុវជន និងកីឡាខេត្តកំពត កាលពីព្រឹកថ្ងៃទី២៤ តុលា ឆ្នាំ២០២៣ នេះ ។
ក្រោយប្រទេសមានសុខសន្តិភាពពេញលេញ ការបណ្តុះបណ្តាលធនធានមនុស្ស ត្រូវបានចាត់ទុកជាវិស័យអាទិភាពមុនគេរហូតមកដល់បច្ចុប្បន្ន ហើយអ្វីដែលមិនអាចខ្វះបាននោះ គឺគ្រូបង្រៀនដែលជាអ្នកផ្តល់ចំណេះដឹង ។ ដូច្នេះ គ្រូត្រូវតែធ្វើជាគំរូល្អ ជាពុម្ពមួយដ៏ល្អសម្រាប់បង្កើតឱ្យបាននូវធនធានមនុស្សដែលមានសក្តានុពល ។
អភិបាលខេត្តកំពត លោក ម៉ៅ ធនិន បានលើកឡើងថា កម្ពុជាក្រោយពីទទួលបាននូវសុខសន្តិភាពពេញលេញក្រោមនយោបាយ ឈ្នះ=ឈ្នះរបស់សម្តេចតេជោ ហ៊ុន សែន ប្រទេសជាតិ មានការរីកចម្រើនលើគ្រប់វិស័យ ពិសេស គឺវិស័យអប់រំដែលវិស័យនេះ ត្រូវបានរាជរដ្ឋាភិបាលគិតគូរមុនគេ និងជាវិស័យអាទិភាពមួយ ក្រោយមានការបំផ្លិចបំផ្លាញក្នុងរបបបីឆ្នាំ ប្រាំបីខែ និងម្ភៃថ្ងៃ។
លោកអភិបាលខេត្តបានបន្តថា ប្រទេសមួយដែលមានការអភិវឌ្ឍន៍រីកចម្រើនទៅបាន គឺអាស្រ័យទៅលើធនធានមនុស្សដែលមានចំណេះវិជ្ជា និងការយល់ដឹងខ្ពង់ខ្ពស់ច្រើន ដូច្នេះហើយ គ្រូបង្រៀនគឺមានតួនាទីសំខាន់ក្នុងការបណ្តុះបណ្តាលនូវចំណេះវិជ្ជា ចំណេះដឹងដល់ប្រជាពលរដ្ឋក្នុងប្រទេស ។ លោកអភិបាលខេត្តក៏បានសង្កត់ធ្ងន់ដែរថា គ្រូគឺជាអ្នកសាងសង់ស្ថាបនានូវគ្រឹះសង្គមរបស់ជនជាតិមួយ គ្រូគឺជាអ្នកបណ្តុះនូវពូជពង្សវង្សត្រកូលប្រកបដោយសមត្ថភាព និងមនសិកា ដូច្នេះ គ្រូបង្រៀនគឺជាពុម្ភមួយដែលមានតួនាទីផលិតនូវធនធានមនុស្សសម្រាប់បន្តវេន ។ លោកអភិបាលខេត្តក៏បានបន្ថែមថា នៅក្នុងលោកនេះ អ្នកណាក៏ដោយ មិនថា អ្នកនោះមានឋានៈណានោះទេ ឱ្យតែមានជីវិតរស់នៅ គឺត្រូវការគ្រូទាំងអស់ ព្រោះការចេះការដឹង ការយល់គឺប្រសូត្រចេញពីគ្រូទាំងអស់គ្រូគឺជាមាតាបិតាទី២ ។
ក្នុងឱកាសនោះដែរ លោកអភិបាលខេត្តក៏បានលើកឡើងបន្ថែមថា រាជរដ្ឋាភិបាលកម្ពុជាបច្ចុប្បន្ន ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានចាត់ទុកធនធានមនុស្សជាកត្តាសំខាន់សម្រាប់អភិវឌ្ឍប្រទេសជាតិ បើគ្មានធនធានមនុស្សដំណើរការអ្វីក៏មិនអាចរីកចម្រើនបានដែរ។ ដូច្នេះហើយ សូមប្អូនៗដែលត្រូវចេញទៅបំពេញការងារជាគ្រូបង្រៀននាពេលនេះ ត្រូវធ្វើយ៉ាងណាខិតខំបណ្តុះបណ្តាលធនធានមនុស្សឱ្យមានគុណភាព និងមានសក្តានុពល ។
បើយោងតាមរបាយការណ៍របស់លោកតាក ហាប់ ប្រធានមន្ទីរអប់រំ យុវជន និងកីឡាខេត្តកំពតបានឱ្យដឹងថា គ្រូបង្រៀនក្របខណ្ឌថ្មីដែលត្រូវចេញទៅបំរើការងារក្នុងឆ្នាំ២០២៣នេះមានចំនួន៦៨នាក់ ក្នុងនោះ ស្រីចំនួន៥៣នាក់ ដែលមានគ្រូកម្រិតឧត្តមបរិញ្ញាបត្រ+២ ចំនួន៤នាក់ ស្រី៣នាក់, គ្រូបង្រៀនកម្រិតមូលដ្ឋាន១២+៤ ចំនួន៤នាក់ស្រី, គ្រូបង្រៀនកម្រិតមូលដ្ឋាន ១២+២ មានចំនួន១១នាក់ ស្រី៦នាក់, គ្រូបឋមសិក្សា ១២+៤ មានចំនួន ១នាក់ប្រុស, គ្រូបឋមសិក្សា ១២+២ ចំនួន ៤០នាក់ ស្រី ៣២នាក់, គ្រូមត្តេយ្យសិក្សា ១២+២ មានចំនួន៨នាក់ស្រី ៕
ចែករំលែកព័តមាននេះ