ទី​ក្រុង​បាងកក៖ បុរស​ជន​ជាតិ​ថៃ​ម្នាក់​និយាយ​រម្លឹក​អំពី​ព្រឹត្តិការណ៍​រន្ធត់​នៅ​ប្រទេស​អ៊ីស្រាអែល។ គាត់​ប្រាប់​​​ថា​​គាត់​សឹង​តែ​នឹង​អស់​ជីវិត​ក្រោម​ស្នា​ដៃ​របស់​ក្រុម​ហាម៉ាស់​។ ប៉ុន្តែ​សំណាង​ល្អ​​ដោយ​សារ​​ជីវិត​ថ្លៃ គាត់​អាច​វិល​ទៅ​ប្រទេស​ថៃ​វិញ​ដោយ​សុវត្ថិ​ភាព​កាល​ពី​ថ្ងៃ​ទី​១៩ ខែ​តុលា​ និង​ជួប​ជុំ​ប្រពន្ធ​-កូន​ដែល​រង់​ចាំ​​ផ្លូវ​គាត់​​យ៉ាង​អន្ទះ​សា ​បន្ទាប់​ពី​រស់​នៅ​បែក​គ្នា​អស់​រយៈ​​ពេល​បួន​ឆ្នាំ​ក្នុងនាម​ជា​ពល​ករ​ចំណាក​ស្រុក​ដែល​ទៅ​ធ្វើ​ការ​នៅ​ប្រទេស​អ៊ីស្រាអែល​។​

​កង​ទ័ព​អាកាស​ថៃ​បាន​ដឹក​ជន​ជាតិថៃ​១៣៦​នាក់​ពី​ប្រទេស​អ៊ីស្រាអែល​​ទៅ​ដល់​អាកាស​យាន​ដ្ឋាន​អន្ត​រជាតិ​ដនមឿងនៅ​វេលា​ម៉ោង​២​រសៀល​។ ​អាជ្ញាធរ​ត្រៀម​ផ្ទះ​​​​​៤​កន្លែង​សម្រាប់​ស្នាក់​នៅ​មួយ​សំណើ​សិន ​មុន​នឹង​បន្ត​ដំណើរ​ទៅ​ស្រុក​កំណើត​របស់​ពួកគេ​វិញ​ដែល​​ភាគ​ច្រើន​ជា​អ្នក​រស់​នៅ​​ខេត្ត​ភាគ​ឦសាន​​។​

អ្នក​​​ចាក​ចេញ​ពី​ព្រលាន​យន្ត​ហោះ​ចុង​ក្រោយ​គេ​​​គឺ​​បុរស​វ័យ​៣៤​ឆ្នាំ​ ឈ្មោះ​វីតថា​វ៉ាត់ ជេក ឃុនឡាវង្ស (Wittawat “Jack” Kunlawong)។ នៅ​លើ​​​កញ្ចឹង​ក​របស់​គាត់​មាន​ស្នាម​មុត​កាំបិត​យ៉ាង​ជ្រៅ​។ ដូច​នេះ គាត់​ត្រូវ​ពិនិត្យ​សុខ​ភាព​​ក្រោយ​ពេល​ចុះ​ពី​លើ​យន្ត​​ហោះ​។ ​ភរិយា​របស់​គាត់​​វ័យ​២៧​ឆ្នាំ​ អ្នក​ស្រី​វ៉ាស់សាណា ភីមស៊ុវណ្ណ (Wassana Pimsuwan) និង​កូន​ស្រី​អាយុ​៥​ឆ្នាំ​រង់​ចាំ​ទទួល​គាត់​នៅ​ព្រលាន​យន្ត​ហោះ​។

គាត់​​និយាយ​រម្លឹក​ទៅ​ដល់​ព្រឹត្តិ​ការណ៍​កាល​ពី​ថ្ងៃ​ទី​៧ ខែ​តុលា​។ គាត់​​​​​​​ជា​ពល​ករ​​ធ្វើ​ការ​នៅ​ក្នុង​កសិដ្ឋាន​ចិញ្ចឹម​មាន់​ដែល​ស្ថិត​នៅ​ចម្ងាយ​​ត្រឹម​តែ​២​គីឡូ​ម៉ែត្រ​ពី​តំបន់​​ហ្កា​ហ្សា​។ នៅ​ពេល​គាត់​កំពុង​ធ្វើ​ការ​សុខ​ៗ​ស្រាប់​តែ​ក្រុម​ហាម៉ាស់​លើក​គ្នា​សម្រុក​ចូល​ទី​នោះ​ និង​​ដើរ​រក​មនុស្ស​។​ ពេល​នោះ គាត់​រក​វិធី​រត់​គេច​ខ្លួន​។ ប៉ុន្តែ​គួរ​​ឱ្យ​ស្ដាយ រត់​ចុះ​រត់​ឡើង​ក៏​​​វាក់​អើ​ជា​មួយ​សមាជិក​ក្រុម​ហាម៉ាស់​ម្នាក់​ដែល​កាន់​កាំបិត​នៅ​ក្នុង​ដៃ​​។ ​សមាជិក​ហា​ម៉ាស់​​ម្នាក់​នោះ​​​ប្រុង​ស្ទុះ​ទៅ​ចាប់​គាត់​ និង​​​យារ​ដៃ​​​​​​ចាក់​គាត់​ជា​ច្រើន​កាំបិត​ ប៉ុន្តែ​ចាក់​ខុស​ៗ​។ ​​បុរស​​​នោះក៏​​គ្រវាស​កាំបិត​ត្រូវ​​​កញ្ចឹង​ក​របស់​គាត់​ និង​លួច​យក​​ឥវ៉ាន់​របស់​​គាត់​អស់​រលីង​។​

​​ជេក​ប្រាប់​ថា​គាត់​សន្លប់​បាត់​មាត់​បាត់​ក​។ ដល់​ពេល​ដឹង​ខ្លួន​ពី​សន្លប់​មក​វិញ​ស្រាប់​តែ​ទទួល​អារម្មណ៍​ថា​មាន​របួស​ធ្ងន់​នៅ​​កញ្ចឹង​​​ក​។ ពេល​នោះ គាត់​ដឹង​ថា​ពួក​ហាម៉ាស់​បាន​ចាក​ចេញពី​ទី​នោះ​អស់​ហើយ​។ បើ​តាម​ការ​គិត​របស់​គាត់​ មូល​ហេតុ​ដែល​ជន​ដៃ​ដល់​ហាម៉ាស់​ម្នាក់​​​នោះ​មិន​​វាយ​ប្រហារ​គាត់​បន្ថែម​ទៀត​ព្រោះ​បុរស​នោះ​ប្រហែល​ជា​គិត​ថា​គាត់​​បាន​ស្លាប់​បាត់​ទៅ​ហើយ​។​

ស្ថិត​នៅ​ក្នុង​ស្ថាន​ភាព​ឈាម​ហូរ​ដាប​ខ្លួន​ លោក​ជេក​ក៏​ប្រញាប់​រត់​ចេញ​ពី​កន្លែង​នោះ​ដើម្បី​ឱ្យ​មិត្ត​ភក្ដិ​របស់​គាត់​ម្នាក់​ជួយ​។ មិត្ត​ភក្ដិនោះ​ស្ថិត​នៅ​ចម្ងាយ​១​គីឡូម៉ែត្រ​ពី​ទី​នោះ​។ មិត្ត​ភក្តិ​នោះ​ក៏​ផ្ដល់​ការ​សង្គ្រោះ​បន្ទាន់​ និង​ដឹក​គាត់​ទៅ​មន្ទីរ​ពេទ្យ​។ គាត់​សម្រាក​នៅ​ពេទ្យ​រយៈពេល​៣​ថ្ងៃ​ ហើយក៏​មាន​ឱកាស​ឡើង​យន្ត​ហោះ​ត្រឡប់​ទៅ​ប្រទេស​ថៃ​វិញ​។​​

ក្រោយ​ដឹង​ហេតុ​ការណ៍​រន្ធត់​នេះ ប្រពន្ធ​លែង​ឱ្យ​ប្ដី​ត្រឡប់​ទៅ​ធ្វើ​ការ​នៅ​អ៊ីស្រាអែល​ត​ទៅ​ទៀត​ហើយ​ ​ហើយ​សុខ​ចិត្ត​ធ្វើ​ការ​​នៅ​ក្នុង​ចម្ការ​​​ជាមួយ​គ្នា​​នៅ​​ខេត្ត​ឧត្ដរ​ធានី (Udon Thani)។ អាជ្ញាធរ​ឱ្យ​ដឹង​ថា​​ជន​ជាតិ​ថៃ​១៨២១​នាក់​បាន​​ចាក​ចេញ​ពី​​ប្រទេស​អ៊ីស្រាអែល​ទៅ​ដល់​​មាតុភូមិ​វិញ​ហើយ​​​។ ជន​ជាតិ​ថៃ​៣០​នាក់​ស្លាប់​​, ១៨​នាក់​​រង​របួស​​​ និង​១៩​នាក់​​​​ក្លាយ​ជា​ចំណាប់​ខ្មាំង​ និង​កំពុង​ស្ថិត​នៅ​ក្នុង​ដៃ​របស់​ក្រុម​ហាម៉ាស់​៕​

ប្រភព៖ The Thaiger, Bangkok Post និង​ប្រភព​ដទៃ​ទៀត​
https://thethaiger.com/news/national/thai-man-survives-throat-slitting-in-hamas-attack-in-israel
https://www.bangkokpost.com/thailand/general/2669199/thai-injury-toll-in-israel-rises-to-18
https://newsbeezer.com/thailandeng/a-young-man-from-udon-thani-talks-about-an-exciting-moment-fight-hamas-with-your-bare-hands-until-you-die-pptvhd36/
https://thailand.postsen.com/live-style/197029/A-young-man-from-Udon-Thani-tells-of-a-thrilling-moment-Fight-Hamas-with-your-bare-hands-until-you-die–PPTVHD36.html