កម្ពុជាយើងតូច មានប្រជាពលរដ្ឋតិច ប៉ុន្តែតើបងប្អូនដឹងទេថា នៅក្នុងមួយថ្ងៃយើងចោល សំរាមប្លាស្ទិកប៉ុន្មានទេ? ចម្លើយ គឺពិតជាច្រើនណាស់។ ដូច្នេះគួរគិតឡើងវិញ រឿងប្រើប្រាស់ប្លាស្ទិក ប្រសិនបើយើងចង់ជួយបញ្ហាបរិស្ថាន ហើយអោយប្រទេសយើងស្អាត
កម្ពុជាយើងតូច មានប្រជាពលរដ្ឋតិច ប៉ុន្តែតើបងប្អូនដឹងទេថា នៅក្នុងមួយថ្ងៃយើងចោល សំរាមប្លាស្ទិកប៉ុន្មានទេ? ចម្លើយ គឺពិតជាច្រើនណាស់។ ដូច្នេះគួរគិតឡើងវិញ រឿងប្រើប្រាស់ប្លាស្ទិក ប្រសិនបើយើងចង់ជួយបញ្ហាបរិស្ថាន ហើយអោយប្រទេសយើងស្អាត មានអនាម័យ និងមានសោភ័ណ្ឌភាព។
តាមរបាយការណ៍របស់ក្រសួងបរិស្ថាន ដែលបានផ្សព្វផ្សាយកាលពីពេលថ្មីៗនេះ បានឲ្យដឹងថា សម្រាប់តែប្រជាពលរដ្ឋនៅរាជធានីភ្នំពេញ ម្នាក់អាចប្រើប្រាស់ថង់ប្លាស្ទិក៥ថង់ ក្នុងមួយថ្ងៃ ឬអាចបង្កើតសំណល់ប្លាស្ទិកប្រមាណ៥៧តោនក្នុងមួយថ្ងៃ។ ដូច្នេះ បើសរុបចំនួនថង់ប្លាស្ទិកប្រើប្រាស់នៅក្នុងប្រទេសកម្ពុជា មានប្រមាណជា៥៦លានថង់ ក្នុងមួយថ្ងៃ គឺស្មើនឹង២៧៩តោនក្នុងមួយថ្ងៃ។
បរិមាណនេះ ច្រើនខ្លាំងណាស់ ហើយកម្ពុជាក៏មិនអន់ដែរនៅក្នុងការចូលរួមចំណែកបំពុលបរិស្ថាន ដោយសារតែសំរាម ឬសំណល់ប្លាស្ទិក ស្របពេលដែលរបាយការណ៍កាលពីឆ្នាំ២០២១ បានប៉ាន់ប្រមាណថា សំរាមប្លាស្ទិកនៅលើពិភពលោកមានប្រមាណជា១៣៩លានតោន ក្នុងមួយថ្ងៃ ហើយនិន្នាការកំណើននៅក្នុងរង្វង់២ឆ្នាំ គឺមានការកើនឡើងប្រមាណជា៦លានតោន ។
ពាក់ព័ន្ធនឹងបញ្ហានេះ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានថ្លែងថា សំណល់សំរាម និងប្លាស្ទិកមិនមែនជាបញ្ហារបស់កម្ពុជាទេ គឺជាបញ្ហាសកល ប៉ុន្តែកុំភ្លេចថា សំណល់ទាំងនេះ បានបំពុលទៅដល់មិនត្រឹមតែមនុស្សយើងទេ ប៉ុន្តែបំពុលទាំងធនធានធម្មជាតិ និងជីវចម្រុះនៅលើគោក និងក្នុងទឹកផងដែរ។
លោកបានអះអាងថា ភាពស្អាត និងសុខភាពប្រជាពលរដ្ឋជាការងារអាទិភាព ដែលរាជរដ្ឋាភិបាលកម្ពុជា នៅក្នុងអាណត្តិទី៧ បាននិងកំពុងយកចិត្តទុកដាក់។ ការគ្រប់គ្រងសំណល់ គឺការកាត់បន្ថយសំណល់ប្លាស្ទិក ដែលឈានទៅបញ្ឈប់ការប្រើប្រាស់ប្លាស្ទិក ក្នុងចំណោមយុវជនជំនាន់ក្រោយ ដើម្បីឲ្យសង្គមយើង គ្មានសំណល់ប្លាស្ទិក សហគមន៍ស្អាត មិនមានការបំពុលពីសំណល់ ជាភារៈកិច្ចរបស់យើងទាំងអស់គ្នា ។ ទន្ទឹមនឹងនេះ ដើម្បីដោះស្រាយការបំពុលដោយប្លាស្ទិក លោករដ្ឋមន្ត្រី ស្នើឱ្យប្រជាពលរដ្ឋទាំងអស់ចូលរួមរៀបចំទុកដាក់សំណល់ និងញែកអោយបានត្រឹមត្រូវ គិតគូរដល់សំរាមដែលអាចកែច្នៃប្រើប្រាស់ឡើងវិញ និងសំរាមដែលចាក់ចោល គួរទុកដាក់នៅទីលានអោយបានត្រឹមត្រូវ។
លោករដ្ឋមន្ត្រីក្រសួងបរិស្ថាន បានអំពាវនាវបន្ថែមទៀត ឲ្យប្រជាពលរដ្ឋទាំងអស់បញ្ឈប់ការចោលសំរាមតាមទីសាធារណៈ ហើយបែរមកទុកដាក់ឱ្យបានត្រឹមត្រូវ ជាពិសេសអនុវត្តន៍វិធាន 4Rs គឺការបដិសេធ ការកាត់បន្ថយ ការប្រើប្រាស់ឡើងវិញ និងការកែច្នៃឡើ វិញ។
សូមយកចិត្តទុកដាក់បងប្អូនតាមតួរលេខ រាជធានីភ្នំពេញ ក៏ដូចជានៅតាមទីក្រុងធំៗ បានផលិតសំរាមជាមធ្យម៣០០០តោនក្នុងមួយថ្ងៃ ប៉ុន្តែរហូតមកដល់ពេលមានតែសំរាមជាង២០ភាគរយប៉ុណ្ណោះដែលត្រូវបានកែច្នៃឡើងវិញ ដូច្នេះបរិមាណសំរាម គឺកង្វល់មួយដ៏ធំរបស់យើង ។
ដើម្បីចូលរួម និងលើកកំពស់ការទទួលខុសត្រូវចំពោះបរិស្ថាន សូមចូលរួមកាត់បន្ថយការប្រើប្រាស់ប្លាស្ទិក ហើយក៏ត្រូវទុកដាក់សំរាមឲ្យបានត្រឹមត្រូវ ។ ការទុកដាក់សំរាមត្រឹមត្រូវ ក៏ផ្នែកមួយនៃការស្តែងឡើងនូវអាកប្បកិរិយា និងឥរិយាបទ និងការប្រតិបត្តិរបស់មនុស្ស ដែលបាននិងកំពុងប្រព្រឹត្តនៅក្នុងសង្គម។
កុំលេងសើចឲ្យសោះរឿងសំណល់ ជាពិសេសគឺប្លាស្ទិកនេះ ។ នៅពេលនេះ សំរាមប្លាស្ទិក មាននៅគ្រប់កន្លែង ដូចជានៅតាមដងផ្លូវ និងតាមប្រព័ន្ធលូបង្ហូទឹក ដូច្នេះការកាត់បន្ថយផលប៉ះពាលពីសំរាមនេះ គឺទាមទារមនៈសិកាដែលនាំដល់ការជួយសំអាតអនាម័យ ប្រមូលវេចខ្ចប់ទុកដាក់ រួមទាំងការញែកសំរាម និងចូលរួមក្នុងយុទ្ធនាការកាត់បន្ថយការប្រើប្រាស់ប្លាស្ទិកឲ្យកាន់តែច្រើន និងផុសផុលឡើងៗ។
សរុបមកវិញ យើងទាំងអស់គ្នាគួររិះគិតឡើងវិញ ហើយនាំគ្នាចូលរួមយុទ្ធនាការកាត់បន្ថយសំរាមនេះទាំងអស់គ្នា ។ គ្មានការចូលរួមពីយើងទាំងអស់គ្នា សំរាមនៅសង្គមយើង នឹងគ្មាន នរណាអាចដោះស្រាយក្រៅពីយើងនោះទេ ហើយនៅពេលដែលយើងចូលរួមបំពុល គឺគ្មាន អ្នកណាពុលក្រៅពីយើងដែរ ដូច្នេះសូមចូលរួម ។
កុំភ្លេច សំរាមប្លាស្ទិកមិនមែនមានត្រឹមតែថង់ទេ គឺមានតាំងពីដបទឹកសុទ្ធ កែវច្រកកាហ្វេ បំពង់បឺត ប្រអប់ខ្ចប់បាយ ឡើងទៅ ដូច្នេះប្រសិនបើអាចគួរតែកុំខ្ចប់ ហើយបើខ្ចប់យើងគួរមានប្រអប់របស់យើង ឬក៏កំប៉ុងកាហ្វេផ្ទាល់ខ្លួនរបស់យើង ៕
ដោយ ៖ ហេង ចេស្តារ
ចែករំលែកព័តមាននេះ