ក្រុមហ៊ុនប្រេងធំបំផុតរបស់អារ៉ាប៊ីសាអូឌីត ស្វែងរកការបង្កើតរោងចក្រចម្រាញ់នៅវៀតណាម
វៀតណាម-អារ៉ាប៊ីសាអូឌីត ៖ ក្រុមហ៊ុនប្រេង និងឧស្ម័នរដ្ឋរបស់អារ៉ាប៊ីសាអូឌីត ដែលមានឈ្មោះថា
វៀតណាម-អារ៉ាប៊ីសាអូឌីត ៖ ក្រុមហ៊ុនប្រេង និងឧស្ម័នរដ្ឋរបស់អារ៉ាប៊ីសាអូឌីត ដែលមានឈ្មោះថា «Aramco» កំពុងស្វែងរកឱកាស ដើម្បីសាងសង់រោងចក្រចម្រាញ់ប្រេងនៅប្រទេសវៀតណាម។ នេះបើយោងតាមប្រភពពីសារព័ត៌មាន VnExpress ចេញផ្សាយនៅថ្ងៃទី២០ ខែតុលា ឆ្នាំ២០២៣។
ក្រុមហ៊ុនប្រេង និងឧស្ម័នដ៏ធំបំផុតរបស់អារ៉ាប៊ីសាអូឌីតមួយនេះ មានសកម្មភាពនៅក្នុងអាស៊ីប៉ាស៊ីហ្វិក ប៉ុន្តែមិនទាន់មានគម្រោងផ្ទាល់ក្នុងប្រទេសវៀតណាមនៅឡើយទេ បើទោះបីជាអ្នកផ្គត់ផ្គង់ប្រេងសម្រាប់អាជីវកម្មរបស់ប្រទេសវៀតណាមយ៉ាងណាក៏ដោយ។ លោក Yasser M. Mufti អនុប្រធានក្រុមហ៊ុន Aramco បានប្រាប់នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) កាលពីថ្ងៃទី១៩ ខែតុលា កន្លងទៅ អំឡុងពេលទស្សនកិច្ចថ្ងៃចុងក្រោយនៅអារ៉ាប៊ីសាអូឌីត ហើយលោកបានស្នើរដ្ឋាភិបាលវៀតណាម ដើម្បីអនុញ្ញាតឱ្យក្រុមហ៊ុនសិក្សាអំពីលទ្ធភាពនៃការបង្កើតគម្រោងចម្រាញ់ប្រេង។ នាយករដ្ឋមន្ត្រីវៀតណាមថ្លែងថា វៀតណាមស្វាគមន៍ Aramco ជានិច្ចក្នុងការបណ្តាក់ទុន និងផ្តល់ការគាំទ្រក្នុងការបណ្តុះបណ្តាលធនធានមនុស្សផងដែរ។
«Aramco» គឺជាក្រុមហ៊ុនប្រេង និងឧស្ម័នដ៏ធំបំផុតរបស់អារ៉ាប៊ីសាអូឌីត ដោយបានប្រកាសពីការកើនឡើង ៤៦% នៃប្រាក់ចំណេញរហូតដល់ ១៦១ពាន់លានដុល្លារ កាលពីឆ្នាំមុន។ ងាកមកកាន់ប្រទេសវៀតណាមវិញ មានរោងចក្រចម្រាញ់ប្រេងចំនួន ២ ដែលបំពេញតម្រូវការប្រេងក្នុងស្រុកបានប្រមាណ ៧០%។
នៅក្នុងថ្ងៃជាមួយគ្នានោះ នាយករដ្ឋមន្ត្រីវៀតណាម ក៏បានជួបជាមួយលោក Faisal Al-Ibrahi រដ្ឋមន្ត្រីក្រសួងសេដ្ឋកិច្ច និងផែនការអារ៉ាប៊ីសាអូឌីត ហើយបានសម្តែងក្តីសង្ឃឹមសម្រាប់ភាពជាដៃគូទ្វេភាគីក្នុងវិស័យថាមពល និងហិរញ្ញវត្ថុ-ធនាគារ។ លោកបានស្នើបន្ថែមទៀតនូវសកម្មភាពពាណិជ្ជកម្ម និងការវិនិយោគរវាងប្រទេសទាំង២ជាមួយនឹងវិស័យអាទិភាពសម្រាប់ថាមពល ហិរញ្ញវត្ថុ-ធនាគារ ការផ្លាស់ប្តូរឌីជីថល និងផលិតកម្មអាហារហាឡាល់របស់ឥស្លាម។
នៅក្នុងកិច្ចប្រជុំមួយដាច់ដោយឡែកផ្សេងទៀត លោក Ahmad Alrajhi រដ្ឋមន្ត្រីក្រសួងធនធានមនុស្ស និងអភិវឌ្ឍន៍សង្គមអារ៉ាប៊ីសាអូឌីត បានថ្លែងថា លោកបានវាយតម្លៃខ្ពស់ចំពោះគុណភាពពលករវៀតណាម ដែលចំនួនសរុបប្រមាណ៥.០០០នាក់នៅអារ៉ាប៊ីសាអូឌីត ហើយប្រទេសអាស៊ីខាងលិចមួយនេះ គ្រោងនឹងជួលកម្មករបរទេសចំនួន១០លាននាក់បន្ថែមទៀត នៅក្នុងវិស័យផលិតកម្ម ថាមពល ការថែទាំសុខភាព និងទេសចរណ៍ ដោយក្នុងនោះរួមទាំងវៀតណាមផងដែរ៕
ចែករំលែកព័តមាននេះ