ភ្នំពេញ៖ ស្ពានកោះពេជ្រ-កោះនរា នឹងដាក់អោយធ្វើដំណើរជាបណ្តោះអាសន្ន ចាប់ពីថ្ងៃ​ទី២០ ខែតុលា ឆ្នាំ២០២៣ វេលាម៉ោង ៦:០០ព្រឹកតទៅ។ ការបើកឱ្យដំណើរការស្ពានថ្មីនេះ ដើម្បីកាត់​បន្ថយការកកស្ទះចរាចរណ៍ នៅការដ្ឋានសាងសង់ស្ពានអាកាសព្រះមុនីវង្ស ក្បាលថ្នល់​។

ស្ពានថ្មីនេះ ត្រូវបានបើកឱ្យធ្វើចរាចរណ៍ឆ្លងកាត់ ស្ពានខាងត្បូង រយៈពេល ៣ថ្ងៃ កាលពីអំឡុងពេលឈប់សម្រាកបុណ្យភ្ជុំបិណ្ឌ ចាប់ពីថ្ងៃទី១៣-១៦ ខែតុលា ឆ្នាំ២០២៣​។

សូមរម្លឹកថា ស្ពានថ្មខ្សែកាប តភ្ជាប់ពីទីក្រុងរណបកោះពេជ្រ ទៅកាន់គម្រោងអភិវឌ្ឍន៍កោះនរា មាន​ប្រវែងសរុប ៨២៤ម ទទឹង ២៤.៥ម​ ​ជាស្ពានចរាចរទ្វេរទិស មានគន្លង សម្រាប់រថយន្តចំនួន ២ទៅ និងគន្លងចំនួន ២មក ដែល ១គន្លងមានទទឹង ​៣,២៥ម៉ែត្រ​ និងមានគន្លង សម្រាប់​ទោចក្រយានយន្តចំនួន ១ទៅ និងគន្លងចំនួន ១មក ដែលមានទទឹង ១,២៥ម៉ែត្រ​សងខាង​។ ការសាងសង់ស្ពាននេះ ចំណាយ ៣៨.០០០.០០០ដុល្លារអាមេរិក រយៈពេលសាងសង់ ៣៥ខែ​ គិតចាប់ពីថ្ងៃបើកការដ្ឋាន កាលពីថ្ងៃទី២៦ ខែតុលា ឆ្នាំ២០២០។ ស្ពាននេះ សាងសង់​ដោយក្រុមហ៊ុនវិនិយោគទុនអណិកជនកម្ពុជា OCIC​។ ​

​ស្ពានថ្មីនេះ ត្រូវបានសាងសង់ឡើង ដើម្បីបម្រើសេចក្តីត្រូវការរបស់ប្រជាពលរដ្ឋ ក្នុងការធ្វើដំណើរ​កាត់បន្ថយការកកស្ទះចរាចរណ៍​ដ៏មមាញឹក ក្នុងរាជធានីភ្នំពេញ ជាពិសេសបន្ថយបន្ទុក​លំហូរចរាចរ នៅស្ពានព្រះមុនីវង្ស ច្បារអំពៅ ក៏ដូចមហាវិថីព្រះនរោត្តម ផងដែរ៕