បាតុករសម្រុកចូលវិមានកាពីតូលអំពាវនាវឱ្យមានបទឈប់បា.ញ់គ្នានៅហ្គាហ្សា
ប្រទេសអ៊ីស្រាអែល-ប៉ាឡេស្ទីន ៖ ពួកបាតុករក្នុងនោះមានបណ្ដាសមាជិកសហគមន៍ជ្វីហ្វផង បាន
ប្រទេសអ៊ីស្រាអែល-ប៉ាឡេស្ទីន ៖ ពួកបាតុករក្នុងនោះមានបណ្ដាសមាជិកសហគមន៍ជ្វីហ្វផង បានលើកគ្នាធ្វើបាតុកម្មលុកចូលក្នុងវិមានកាពីតូលក្រុងវ៉ាស៊ីនតោន ដើម្បីទាមទារឲ្យមានបទឈប់បាញ់គ្នា ក្នុងជម្លោះរវាងអីុស្រាអែលនិងក្រុមហាម៉ាស់ប៉ាឡេស្ទីន។
ការប្រមូលផ្ដុំគ្នាធ្វើបាតុកម្មនោះកើតមានកាលពីថ្ងៃទី១៨តុលា ក្នុងបរិវេណវិមានកាពីតូលក្រុងវ៉ាស៊ីនតោន ដើម្បីទាមទារឲ្យមានបទឈប់បាញ់គ្នានៅហ្កាហ្សានិងមជ្ឈឹមបូព៌ាជាង១០ថ្ងៃក្រោយការវាយប្រហាររបស់ក្រុមហាម៉ាស់ប៉ាឡេស្ទីនប្រឆាំងអីុស្រាអែល។ បាតុកម្មនោះរៀបចំធ្វើឡើងជាពិសេស ដោយអង្គការJEWI SH VOICE FOR PEACE ជាអង្គការមួយប្រមូលផ្ដុំដោយពួកជ្វីហ្វអាមេរិក ដែលប្រឆាំងនយោបាយរបស់រដ្ឋាភិបាលអ៊ីស្រាអែល ប្រឆាំងប្រជាជនប៉ាឡេស្ទីន និងការវាយប្រហារប្រឆាំងជ្រោយហ្គាហ្សា។ ពួកបាតុករបានលើកប៉ង់កាតនានាដែលសរសេរថា ជាង៧៥ឆ្នាំហើយដែលរដ្ឋាភិបាលអ៊ីស្រាអែល កាន់កាប់ដោយខុសច្បាប់ដែនដីប៉ាឡេស្ទីន ។ ពេលនេះហ្គាហ្សាកំពុងរងអំពើប្រល័យពូជសាសន៍ ជាមួយការគាំទ្រពេញទំហឹងរបស់សហរដ្ឋអាមេរិក។
សហរដ្ឋអាមេរិកកាលពីថ្ងៃទី១៨តុលា បានប្រើវេតូប្រឆាំងដំណោះស្រាយមួយរបស់ក្រុមប្រឹក្សាសន្តិសុខអ.ស.ប ដែលអំពាវនាវជាពិសេសឲ្យមានបទឈប់បាញ់គ្នាមនុស្សធម៌ ក្នុងសង្គ្រាមរវាងក្រុមហាម៉ាស់និងអ៊ីស្រាអែល ដោយក្រុងវ៉ាស៊ីនតោនលើកឡើងថា ដំណោះស្រាយនោះមិនបានចែងពីសិទ្ធិរបស់អ៊ីស្រាអែលក្នុងការការពារខ្លួនឡើយ។ ក្នុងចំណោមរដ្ឋទាំង១៥ជាសមាជិកក្រុមប្រឹក្សាសន្តិសុខ ១២ប្រទេសបោះឆ្នោតគាំទ្រគម្រោងដំណោះស្រាយនោះដែលដាក់ដោយប្រេស៊ីល២ប្រទេសអនុប្បវាទក្នុងនោះមានរុស្ស៊ី តែសហរដ្ឋអាមេរិកជាសមាជិកមួយក្នុងចំណោមសមាជិកអចិន្ត្រៃយ៍ទាំង៥របស់ក្រុមប្រឹក្សានោះ បានបោះឆ្នោតប្រឆាំងនាំឲ្យការអនុម័តដំណោះស្រាយនេះស្ទះ។ ដំណោះស្រាយនោះតាមពិតក៏បរិហារដែរចំពោះការវាយប្រហារភេរវកម្មរបស់ក្រុមហាម៉ាស់ បណ្ដាលឲ្យមនុស្សស្លាប់ជាង១៤០០នាក់នៅអ៊ីស្រាអែលហើយមនុស្សជិត២០០នាក់ត្រូវចាប់ជាចំណាប់ខ្មាំង៕
ចែករំលែកព័តមាននេះ