ភ្នំពេញ៖ អគ្គនាយកដ្ឋានពន្ធនាគាររបស់​ក្រសួងមហាផ្ទៃ បានចេញលិខិតបំភ្លឺ ចំពោះ​ករណីទណ្ឌិត សុខ សុវណ្ណវឌ្ឍនាសាប៊ុង ហៅ William Guang ( វីលៀម គ័ង ) ដែលបាន​បញ្ចេញសារសំឡេងពី​ក្នុង​មណ្ឌលអប់រំកែប្រែទី១ ( ពន្ធនាគារព្រៃស ) និងត្រូវបានបង្ហោះជាសាធារណៈ នៅតាម​បណ្តាញ​សង្គម។ ក្នុងនោះ អគ្គនាយកដ្ឋា​នពន្ធនាគារ បានប្រកាសប្តឹង​ទណ្ឌិត វីលៀម គ័ង និងប្រធានស្តីទីគណបក្សខ្មែរក្រោក ឈ្មោះ មាស សុភ័ក្ត្រ។

អគ្គនាយកដ្ឋាន​ពន្ធនាគារ ក៏បានចាត់វិធានការ ដោយដាក់ពិន័យ​ទណ្ឌិត វីលៀម គ័ង ឱ្យ​នៅក្នុងបន្ទប់ដាក់វិន័យ ហាមប្រើប្រាស់ប្រព័ន្ធទូរសព្ទអចល័ត និងមិនអនុញ្ញាត​ឱ្យជួប​សួរសុខទុក្ខជាមួយ​ញាតិមិត្តខាងក្រៅ រយៈពេល ២សប្តាហ៍ ចុះកំណត់​ហេតុល្មើសបទបញ្ជាផ្ទៃក្នុង និងបង្កើន​ចំណាត់​ថ្នាក់សន្តិសុខ​។

អគ្គនាយកដ្ឋានពន្ធនាគារ ក៏បានប្រកាសថា សារសំឡេងរបស់​អតីត​ប្រធានគណបក្ស​ខ្មែរក្រោក លោក វីលៀម គ័ង នៅលើបណ្តាញសង្គម Tik Tok កាលពីថ្ងៃទី១៦ ខែតុលា ឆ្នាំ២០២៣ គឺ​បញ្ចេញតាមប្រព័ន្ធទូរស័ព្ទ​អចល័ត ( ជាប់ជញ្ជាំង ) សម្រាប់ជនជាប់ឃុំ​ប្រើប្រាស់ស្របច្បាប់ កាលពីវេលាម៉ោង ១៥:៤៧នាទី រសៀល ថ្ងៃព្រហស្បតិ៍ ទី១២ ខែតុលា ឆ្នាំ២០២៣ ពីអគារ «ក» នៃមណ្ឌលអប់រំកែប្រែ ទី១ ទៅកាន់ឈ្មោះ មាស សុភ័ក្ត្រ ដែលជាប្រធានស្តី​ទី គណបក្ស​ខ្មែរក្រោក ទូរស័ព្ទលេខ 087 333 362 និងត្រូវបានឈ្មោះនេះ ថតសំឡេងទុក​ក្នុងពេលសន្ទនា និងយកទៅបង្ហោះចែកចាយ​លើគណនីបណ្តាញសង្គម Tik Tok កាលពីថ្ងៃទី១៦ ខែតុលា ឆ្នាំ២០២៣​។

អគ្គនាយកដ្ឋា​នពន្ធនាគារ បន្ថែមថា ទង្វើនេះ ជាសកម្មភាពល្មើសច្បាប់ ដូចមានចែង​ក្នុងចំណុចទី៦ មាត្រា៦ ថ្មី ( ពីរ ) នៃច្បាប់ស្តីពី វិសោធនកម្ម​ច្បាប់ស្តីពីគណបក្សនយោបាយ ( ឆ្នាំ២០១៧ ) និងជាសកម្មភាព​ល្មើសបទបញ្ជាផ្ទៃក្នុងពន្ធនាគារ។ ដូច្នេះ​អគ្គនាយកដ្ឋា​នពន្ធនាគារ ក្រសួងមហាផ្ទៃ បានចាត់វិធានការ​ចាំចាប់ ដោយដាក់ពាក្យបណ្តឹង​ទៅកាន់អយ្យការ​អមសាលាដំបូងរាជធានីភ្នំពេញ លើបុគ្គលឈ្មោះ សុខ សុវណ្ណវឌ្ឍនាសាប៊ុង ហៅ William Guang និងឈ្មោះ មាស សុភ័ក្ត្រ ប្រធានស្តីទី គណបក្សខ្មែរក្រោក ករណី ប្រើប្រាស់សារសំឡេង និងរូបភាពទណ្ឌិតជាប់ទោសពីបទឧក្រិដ្ឋ ឬមជ្ឈឹមឱ្យធ្វើ​សកម្មភាព​ ដើម្បីជាប្រយោជន៍នយោបាយ សម្រាប់គណបក្ស​នយោបាយ​ខ្លួន​។

សូមរម្លឹកថា កាលពីថ្ងៃទី២ ខែសីហា ឆ្នាំ២០២២ តុលាការសាលាដំបូងរាជធានីភ្នំពេញ បានសម្រេចផ្ដន្ទាទោស​ប្រធានគណបក្សខ្មែរក្រោក លោក សុខ សុវណ្ណវឌ្ឍនាសាប៊ុង ហៅ William Guang ( វីលៀម គ័ង ) អាយុ ៤៤ឆ្នាំ ដាក់ពន្ធនាគា​រកំណត់ ៩ឆ្នាំ ពាក់​ព័ន្ធនឹ​ងអំពើ​ប្លន់ទ្រព្យឧកញ៉ា​​លក់ឡេ តាមអន​ឡាញ អ៊ាន សៀវម៉ី ដល់ក្នុងផ្ទះ​ នៅ​ក្នុង​​បុរី​ Moon Town នៅភូមិគោកចំបក់ សង្កាត់​ចោមចៅទី១ ខណ្ឌពោធិ៍សែនជ័យ កាលពីថ្ងៃទី១៩ ខែធ្នូ ឆ្នាំ២០២១​។

ជាមួយគ្នានេះ ​តុលា​ការ ក៏បានសម្រេចផ្ដន្ទាទោស​បក្សពួករបស់​ វីលៀម គ័ង ​៧​នាក់ទៀត​ ដាក់ពន្ធនា​គារ ក្នុងម្នាក់ៗ ​ពី ៦ឆ្នាំ ដ​ល់ ៨ឆ្នាំ និងបង្គាប់ឱ្យរួម​គ្នា​ សងសំ​ណងដ​ល់ដើមបណ្ដឹង​ជាប្រាក់ចំនួន ៥០​ម៉ឺ​នដុល្លារ ​និងជំងឺចិ​ត្តចំនួន ២​០០លានរៀល។

ទណ្ឌិត វីលៀម គ័ង និងបក្សពួក ៧នាក់ទៀត ត្រូវបាន​តុលា​ការ ចោ​ទប្រកាន់ជនដៃដល់ទាំង ៨នាក់ ៣ បទល្មើស រួមមាន​៖ ១–បទ​លួចមានស្ថាន​ទម្ងន់ទោស ២–បទកាន់​កាប់អាវុធដោយ​គ្មានការអនុញ្ញាត និង៣–បទក្លែងឯក​សារសាធារណៈ តាម​មាត្រា​២៩ មាត្រា៣៥៣ មាត្រា៣៥៧ មាត្រា៤៩០ និង​មាត្រា​៦​២៩ នៃ​ក្រម​ព្រហ្ម​ទណ្ឌ​៕