តារាសម្តែងនាង សារី ស្រីពេជ្រ បានរំលឹកហេតុការណ៍ភ័យខ្លាចរហូតព្រលឹងចុងសក់មួយ ដែលនាងបានពើបប្រទះ បន្ទាប់ពីនាងចេញពីកន្លែងថតកុនមួយអំឡុងវេលាទៀបភ្លឺ ខណៈពេលហេតុនេះនៅតែបន្តដក់ជាប់នៅក្នុងចិត្តរបស់នាង រហូតមកទល់នាពេលនេះ
រាជធានីភ្នំពេញ ៖ តារាសម្តែងនាង សារី ស្រីពេជ្រ បានរំលឹកហេតុការណ៍ភ័យខ្លាចរហូតព្រលឹងចុងសក់មួយ ដែលនាងបានពើបប្រទះ បន្ទាប់ពីនាងចេញពីកន្លែងថតកុនមួយអំឡុងវេលាទៀបភ្លឺ ខណៈពេលហេតុនេះនៅតែបន្តដក់ជាប់នៅក្នុងចិត្តរបស់នាង រហូតមកទល់នាពេលនេះ ។
យ៉ាងណា ម្ចាស់មកុដ Miss Petite Global 2022 រូបនេះ បានបញ្ជាក់ថា «អ្វីដែលនាងសម្រេចរំលឹករឿងរ៉ាវមួយនេះសារជាថ្មី និងសាធារណៈ គឺក្នុងគោលបំណងផ្តល់បទពិសោធន៍ និងដាស់តឿនឲ្យមានការប្រុងប្រយ័ត្នសម្រាប់នារីៗ ជាពិសេសអ្នកសិល្បៈដែលធ្វើដំណើរនាពេលយប់ស្ងាត់តែម្នាក់ឯង»។
តាមរយៈវីដេអូដែលបង្ហោះនៅលើបណ្តាញសង្គម ស្រីស្អាត សារី ស្រីពេជ្រ បានរៀបរាប់ពីហេតុការណ៍ដែលនាងបានជួបប្រទះថា «តាមពិតរឿងហេតុមួយនេះ នាងមិនចង់លើកមកនិយាយឡើយ ប៉ុន្តែដោយសារមានគេមកនិយាយឲ្យនាងបានលឺនូវហេតុការណ៍ដែលកើតមានឡើងស្រដៀងគ្នា ដូចនេះនាងក៏សម្រេចនិយាយរឿងនេះចេញមក ដើម្បីទុកជាបទពិសោធន៍សម្រាប់នារីៗ ជាពិសេសអ្នកធ្វើការនៅក្នុងវិស័យកុនដូចជារូបនាង»។
ស្រីស្អាត សារី ស្រីពេជ្រ បានបន្ថែមថា «អំឡុងពេល២ទៅ៣ខែមុន នាងបានទៅថតនៅទីកន្លែងមួយ ដែលជាអគារគេកំពុងសាងសង់ ដោយនាងបានថតតាំងពីព្រឹករហូតដល់ម៉ោង៣ទៀបភ្លឺ ។ នៅពេលនោះ នាងថតចប់មុនគេ ប៉ុន្តែនាងមិនអាចសុំម៉ូតូ ឬឡានរបស់ក្រុមការងារ និងតួដូចគ្នាត្រឡប់មកផ្ទះបានឡើយ ដោយសារការងារថតមិនទាន់ចប់»។
នាងបន្តថា «អំឡុងពេលនោះ នាងបានគិតរកវិធីណាបានមកផ្ទះ ដោយពេលនោះនាងបានខលមកអ្នកផ្ទះដែរ តែដោយសារម៉ោងនេះ ពួកគាត់កំពុងសម្រាន្តមិនមានអ្នកណាអាចមកទទួលនាងបានឡើយ ។ ពេលនោះ នាងក៏សម្រេចធ្វើការកក់ (Booking) រកម៉ូតូកង់បីឥណ្ឌា ដើម្បីជិះ ប៉ុន្តែការកក់៣ទៅ៤លើក គឺមិនទទួលបានផលឡើយ ពោលគឺមិនមានអ្នកណាទទួលយកការកក់របស់នាងនាពេលនេះឡើយ»។
នាងបន្តទៀតថា «ប៉ុន្តែស្របពេលនឹងក៏មាន ម៉ូតូកង់បីឥណ្ឌា មួយ ដែលគាត់ឈប់នៅខាងមុខជិតកន្លែងដែលនាងថតដែរ អញ្ចឹងនាងត្រូវសម្រេចចិត្តជិះ ម៉ូតូកង់បីឥណ្ឌា នឹង ដើម្បីបានទៅផ្ទះ ព្រោះបើនាងនៅចាំក្រុមការងារថតចប់ គឺនៅយូរទៀត ហើយដោយសារព្រឹកឡើងនាងត្រូវថតបន្តទៀត»។
តារាសម្តែងនាង សារី ស្រីពេជ្រ បានលើកឡើងបន្ថែមទៀតថា «នាងក៏បានឡើងជិះម៉ូតូកង់បីឥណ្ឌានោះមកតាមផ្លូវមកផ្ទះ ហើយពេលជិតដល់ផ្ទះរបស់នាង ក៏មានភ្លើងស្តុបមួយ ហើយពេលឈប់ស្តុបនោះ នាងបានប្រាប់ម្ចាស់ម៉ូតូកង់បីឥណ្ឌា ឱ្យទៅផ្លូវត្រង់ មិនចាំបាច់បត់ឆ្វេងឡើយ ដោយសារពេលដែលនាងឡើងជិះនោះ នាងបានប្រាប់ផ្លូវមកផ្ទះដល់ពូម្ចាស់ម៉ូតូកង់បីឥណ្ឌា មុនដែរ ហើយណាមួយផ្លូវបត់ឆ្វេងនោះ គឺអាចបត់មកផ្ទះនាងបាន»។
នាងបញ្ជាក់ថា «ផ្លូវនោះស្ងាត់ខ្លាំង និងមិនមានអំពូលសម្រាប់បំភ្លឺផ្លូវឡើយ ខណៈពេលដែលពូម្ចាស់ម៉ូតូកង់បីឥណ្ឌា នោះ មិនបានស្តាប់អ្វីដែលនាងបានប្រាប់ឡើយ ពោលគឺគាត់បានបត់ទៅឆ្វេង ជាផ្លូវមួយដ៏ស្ងាត់មិនមានមនុស្សឡើយ ។ ពេលនោះនាងគិតថា ដូចជាមិនស្រួល រួចនាងក៏ចាប់កាបូបដាក់អីវ៉ាន់របស់នាងយកមកស្ពាយនៅជាប់នឹងខ្លួន ដោយមានតុកត្តាមួយឱបជាប់ខ្លួននាងផងដែរ ។ អំឡុងពេលនោះពូម៉ូតូកង់បីឥណ្ឌា នោះ បានជិះបត់ឆ្វេងប្រហែលជា២០០ម៉ែត្រ គាត់ក៏បានឈប់ ហើយពេលនោះនាងក៏កាន់តែមានអារម្មណ៍កាន់តែមិនស្រួល ហើយចាប់ផ្តើមភ័យ» ។
នាងបញ្ជាក់ទៀតថា «ក្រោយមក នាងក៏សម្រេចចិត្តលោ.តចុះពីលើម៉ូតូកង់បីឥណ្ឌា នោះភ្លាមៗ ដោយមិននិយាយអ្វីទាំងអស់ជាមួយម្ចាស់ម៉ូតូកង់បីឥណ្ឌា នោះ ដោយនាងបានរត់បណ្តើរងាកក្រោយបណ្តើរ ដោយសារខ្លាចម្ចាស់ម៉ូតូកង់បីឥណ្ឌា នោះរត់តាម ហើយជាការពិតគាត់ពិតជារត់តាមនាងប្រាកដមែន»។
បើតាមស្រីស្អាត សារី ស្រីពេជ្រ បញ្ជាក់ទៀតថា «កាលដែលម្ចាស់ម៉ូតូកង់បីឥណ្ឌា រត់តាមនាងនាពេលនោះ ក្នុងករណីនាងមិនបានឲ្យលុយគាត់ នោះគាត់ប្រាកដជាស្រែកប្រាប់យើងឲ្យលុយទៅគាត់ ប៉ុន្តែពេលនោះគាត់មិនបានស្រែកអ្វីទាំងអស់ គឺគិតតែពីរត់តាមនាងមិនឈប់។ ដោយសារឃើញហេតុការណ៍នេះ នាងក៏សម្រេចចិត្តរត់ដោយមិនងាកក្រោយ ហើយនាងក៏រត់ចូលទីតាំងចន្លោះតូចមួយនៅក្នុងបុរីដែលនាងរស់នៅ ដោយសារទ្វារធំជាធម្មតា គឺត្រូវបានគេបិទហើយនៅក្នុងអំឡុងម៉ោងនេះ»។
នាងបន្តថា «នៅចន្លោះចូលតូចនោះ ក៏មានសន្តិសុខយាមដែរ ប៉ុន្តែអំឡុងពេលដែលនាងកំពុងរត់ដោយសារការភ័យខ្លាចនោះ នាងក៏មិនបាននិយាយអ្វីជាមួយសន្តិសុខនោះឡើយ បើទោះបីជាមានការសួរនាំពីសន្តិសុខយ៉ាងណាក៏ដោយ»។
នាងបញ្ជាក់ថា «ពេលទៅដល់ផ្ទះនាងមានការតក់ស្លត់យ៉ាងខ្លាំង និងអង្គុយយំតែម្នាក់ឯង មិនឲ្យអ្នកណាដឹងឡើយ ដោយសារបានជួបហេតុការណ៍អាក្រក់មួយនេះ ដោយមិននឹកស្មានដល់។
ស្រីស្អាត សារី ស្រីពេជ្រ បានបញ្ជាក់ថា «សម្រាប់ហេតុការណ៍នេះ អ្នកទាំងអស់គ្នាហាក់ស្រមៃមើល យប់ម៉ោង៣ទៅ៤ទៀបភ្លឺ ជិះម៉ូតូកង់បីឥណ្ឌាតែម្នាក់ឯង ហើយជួបរឿងមួយនេះ តើយើងនឹងជួបអ្វីទៀត? ប្រសិនបើយើងនៅតតាំងជាមួយម្ចាស់ម៉ូតូកង់បីឥណ្ឌាម្នាក់នឹង។ ទោះជាយ៉ាងណា នេះគ្រាន់តែជាបទពិសោធន៍ដែលនាងបានជួប ហើយចង់ឲ្យនារីៗដែលធ្វើដំណើរតែម្នាក់ឯងពេលយប់ សូមឱ្យមានការប្រុងប្រយ័ត្ន ព្រោះយើងមិនអាចទុកចិត្តអ្នកណាម្នាក់បានឡើយ»។
នាងបញ្ជាក់ថា «ប្រសិនបើមានអ្វីកើតឡើងចំពោះយើងនោះ យើងមិនអាចរកអ្នកណាម្នាក់មកជួយយើង ឬរកជនបង្កនោះមកដោះស្រាយភ្លាមៗឡើយ ព្រោះជាពេលយប់ ដូច្នេះបើសិនជាអាច យើងគួរតែមានអ្វីដាក់តាមខ្លួនសម្រាប់ការពារខ្លួនឯង»។
ទោះជាយ៉ាងណា បើតាម សារី ស្រីពេជ្រ ថា «រឿងដែលនាងបានជួបនេះ បានក្លាយជាបទពិសោធន៍ដែលបានធ្វើឲ្យនាងចេះប្រុងប្រយ័ត្ន ចេះដាក់អ្វីដើម្បីការពារខ្លួន ដោយសារកន្លងមក នាងមិនដែលមានអ្វីដាក់តាមខ្លួនសម្រាប់ការពារឡើយ»៕
ចែករំលែកព័តមាននេះ