រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការដាក់ចេញឲ្យអនុវត្ត នូវយុទ្ធសាស្ត្រជាតិ ចំពោះបងប្អូននៅក្នុងសេដ្ឋកិច្ចក្រៅប្រព័ន្ធ គឺជាគោលនយោបាយ ឈ្នះ-ឈ្នះ ទាំងអស់គ្នា ពោលគឺរដ្ឋក៏ឈ្នះ អ្នកក្រៅប្រព័ន្ធក៏ឈ្នះ ជាតិយើងឈ្នះទាំងមូល ។
ការបញ្ជាក់របស់សម្តេចធិបតី នាយករដ្ឋមន្ត្រី នៅក្នុងពិធីប្រកាសដាក់ឱ្យអនុវត្តជាផ្លូវការ “យុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨” នាព្រឹកថ្ងៃទី១០ ខែតុលា ឆ្នាំ២០២៣នេះ នៅសណ្ឋាគារសុខាភ្នំពេញ ។
សម្តេចធិបតី ហ៊ុន ម៉ាណែត បានគូសបញ្ជាក់យ៉ាងដូច្នេះថា ៖ ការចុះបញ្ជីរបស់បងប្អូននៅក្នុងសេដ្ឋកិច្ចក្រៅប្រព័ន្ធ រដ្ឋបានអ្វី ? រដ្ឋបានព័ត៌មាន ដើម្បីរៀបចំផែនការជួយ ឲ្យបានចំគោលដៅ ជួយឲ្យចំតម្រូវការ និងទាន់ពេលវេលា នឹងរដ្ឋបានមកវិញបែបនឹង រដ្ឋក៏បានមួយទៀត នូវធនធានមនុស្ស និងកម្លាំងសេដ្ឋកិច្ច កាន់តែមានសក្កានុពលចូលរួម នៅក្នុងការលើកស្ទួយសេដ្ឋកិច្ចជាតិ នេះជាអ្វីដែលរដ្ឋបានអ្វីទៅ ដែលប្រជាពលរដ្ឋ នៅក្នុងក្រៅប្រព័ន្ធបាន គឺការជួយអនុគ្រោះ ការគាំទ្រ និងការថែបំប៉ន នៅក្នុងគោលការណ៍ទាំងប៉ុន្មាន ដើម្បីឲ្យគាត់កាន់តែរឹងមាំ ។
សម្តេចគូសបញ្ជាក់ថា ៖ “អ៊ីចឹង គោលនយោបាយនេះ គឺគោលនយោបាយ ឈ្នះឈ្នះ រដ្ឋក៏ឈ្នះ ប្រជាពលរដ្ឋ ជាពិសេសអ្នកក្រៅប្រព័ន្ធ ក៏ឈ្នះ ជាតិយើងឈ្នះទាំងមូល” ។
ទាក់ទិននឹងយុទ្ធសាស្ត្រនេះ សម្តេចនាយករដ្ឋមន្ត្រី បានលើកឡើងថា ៖ “នេះហើយ គឺជាគោលគំនិត នៃយុទ្ធសាស្ត្រជាតិ នៅក្នុងការដាក់ឲ្យអនុវត្ត ហើយយើងនឹងឈានជាជំហ៊ាន វិសាលភាពរបស់យើង នឹងខិតខំដើម្បីបង្រីកឲ្យបានច្រើនជាជំហ៊ាន នេះហើយ គឺជាអ្វី ដែលរាជរដ្ឋាភិបាលបានយកចិត្តទុកដាក់ ដែលខ្ញុំទៅថ្ងៃមុនរឿងម៉ែកូនពៅ ប៉ុន្តែត្រូវយល់ថា ទោះក្នុងកាលៈទេសៈ ណាក៏ដោយ ទោះជាលទ្ធភាពរដ្ឋយើងមានប៉ុន្មាន មិនអាចមានធំដំ ដូចប្រទេសជាច្រើនលើពិភពលោក ដែលមានលទ្ធភាពធំ តែរដ្ឋយើងមិនបាននៅស្ងៀម នៅក្នុងការជួយដល់ប្រជាពលរដ្ឋយើង នៅគ្រប់បែបយ៉ាង គ្រប់ពេលវេលា គ្រប់លទ្ធភាព ដែលធ្វើទៅបាន និងគ្រប់មធ្យោបាយ ជាពិសេស ប្រជាពលរដ្ឋ ដែលមានជីវភាពក្រីក្រ និងងាយរងគ្រោះនោះទេ នេះគឺជាការប្តេជ្ញាចិត្តរបស់យើង” ។
សូមជម្រាបថា យុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ នឹងជួយលើកកម្ពស់ការគាំពារ និងការពង្រឹងសមត្ថភាព ផលិតភាព និងភាពធន់ នៃសេដ្ឋកិច្ចក្រៅប្រព័ន្ធ ព្រមទាំងជំរុញ និងពន្លឿនការចូលរួម ទៅក្នុងសេដ្ឋកិច្ចក្នុងប្រព័ន្ធ ដើម្បីធានាភាពធន់ ភាពប៉ាន់ប្រមាណបាន ភាពរីកចម្រើនទៅមុខ នៃការធ្វើធុរកិច្ច ពាណិជ្ជកម្ម ការវិនិយោគ និងការប្រកបអាជីវកម្ម មុខរបរ ព្រមទាំងការងារចិញ្ចឹមជីវិត៕
ចែករំលែកព័តមាននេះ