ប្រធានាធិបតីបេឡារុស លោកអាឡិច សាន់ដ្រ៏លូកាឆេនកូ គូសបញ្ជាក់កាលពីថ្ងៃទី១៧ ឧសភា ថា ប្រទេសរុស្ស៊ីត្រៀមផ្តល់ប្រាក់ជាង៦ពាន់លានដុល្លារក្រោមរូបភាពជាប្រាក់កម្ចីដល់ប្រទេសរបស់លោកដែលប្រឈមមុខនឹងវិបត្តិហិរញ្ញវត្ថុចំបងមួយ។ លោកលូកាឆេនកូ ថ្លែងថា ខ្ញុំទើបនឹងពិភាក្សាជាមួយប្រធានាធីបតីរុស្ស៊ី លោកឌីមីទ្រីម៉េដវេដេវ។ យើងចរចាគ្នាជាមួយរុស្ស៊ីស្តីពីឥណទានសំរាប់ទ្រទ្រង់ឱ្យមានស្ថេរភាពហិរញ្ញវត្ថុសំដៅទ្រទ្រង់ដល់តម្លៃប្រាក់រូប្លិ៍បេឡារុស។ ក្រុងម៉ូស្គូត្រៀមផ្តល់ប្រាក់ប្រមាណជា៣,១ពាន់លានដុល្លារ ប្រសិនបើយើងចុះហត្ថលេខាជាមួយគ្នាលើកិច្ចព្រមព្រៀងសមស្របមួយ។
ម្យ៉ាងវិញទៀតប្រទេសរុស្ស៊ីត្រៀមផ្តល់ប្រាក់៣ពាន់លានដុល្លារជាការបង់ប្រាក់ឱ្យមុនសំរាប់ការទិញផលិតផលទាំងឡាយរបស់បេឡារុស។ ដូច្នេះទឹកប្រាក់សរុប៦ពាន់លានដុល្លារអាចគ្រប់គ្រាន់សំរាប់ឆ្នាំនេះដែលពុំត្រឹមតែជួយធ្វើឱ្យមានស្ថេរភាពដល់សភាពការណ៍ប៉ុណ្ណោះទេ ក៏ប៉ុន្តែក៏សំដៅពង្រឹងការស្តុកមាស និងរូបិយប័ណ្ណទុកផងដែរ។
មុននេះនាយករដ្ឋមន្ត្រីបេឡារុស លោកមីខាអ៊ីល មីយ៉ាស្នីកូវីត អះអាងថា ការចរចាជិតបញ្ចប់ហើយស្តីពីឥណទានទាំង២នោះដែលមានទឹកប្រាក់សរុបរវាងពី ៦ទៅ៦,៥ពាន់លានដុល្លារ។
ចំណែកនាយករដ្ឋមន្ត្រីរុស្ស៊ី លោកវ្ល៉ាឌីមៀរ ពូទីនវិញត្រូវមកកាន់ទីក្រុងមីនស្ក៍នាថ្ងៃទី១៩ ឧសភា ដើម្បីពិភាក្សាពីភាពលំអិតចុងក្រោយទាំងឡាយនៃការចរចា ៕
ចែករំលែកព័តមាននេះ