នាវាចម្បាំងធំបំផុតលើលោក តម្លៃជិត១៨ពាន់លានដុល្លារ រំកិលខ្លួនទៅគាំទ្រអ៊ីស្រាអែល
សហរដ្ឋអាមេរិក ៖ សហរដ្ឋអាមេរិក បានដាក់ពង្រាយក្រុមវាយប្រហារនាវាដឹកយន្តហោះ ដែលដឹកនាំ
សហរដ្ឋអាមេរិក ៖ សហរដ្ឋអាមេរិក បានដាក់ពង្រាយក្រុមវាយប្រហារនាវាដឹកយន្តហោះ ដែលដឹកនាំ
សហរដ្ឋអាមេរិក ៖ សហរដ្ឋអាមេរិក បានដាក់ពង្រាយក្រុមវាយប្រហារនាវាដឹកយន្តហោះ ដែលដឹកនាំដោយនាវាផ្ទុកយន្តហោះ USS Gerald R. Ford ដែលជានាវាចម្បាំងដ៏ធំបំផុតរបស់ពិភពលោក ទៅកាន់សមុទ្រមេឌីទែរ៉ាណេភាគខាងកើត ដើម្បីឆ្លើយតបទៅនឹងការវាយប្រហារដែលមិនធ្លាប់មានពីមុនមក ដោយក្រុមសកម្មប្រយុទ្ធហាម៉ាសប៉ាឡេស្ទីនលើប្រទេសអ៊ីស្រាអែល។
នាវាចម្បាំង USS Gerald R. Ford ដែលជានាវាផ្ទុកយន្តហោះដ៏ធំបំផុតរបស់ពិភពលោក និងទំនើបបំផុតរបស់កងទ័ពជើងទឹកសហរដ្ឋអាមេរិក បានធ្វើដំណើរទៅកាន់សមុទ្រមេឌីទែរ៉ាណេភាគខាងកើត ដែលជាផ្នែកមួយ នៃក្រុមនាវាផ្ទុកយន្តហោះ ដែលរួមមានទាំងកងនាវាពិឃាត នាវាចម្បាំងកាំជ្រួចមីសីល និងយន្តហោះចម្បាំងជាច្រើនគ្រឿងផងដែរ។
លោក Lloyd Austin រដ្ឋមន្ត្រីការពារជាតិអាមេរិក កាលពីថ្ងៃទី៨ ខែតុលា កន្លងទៅ បានប្រកាសពីការដាក់ពង្រាយទ្រង់ទ្រាយធំនេះ ពោលប៉ុន្មានម៉ោងបន្ទាប់ពីក្រុមសកម្មប្រយុទ្ធហាម៉ាស បានបើកការវាយប្រហារដ៏គួរឱ្យភ្ញាក់ផ្អើលមួយលើអ៊ីស្រាអែល ដែលបានសម្លាប់មនុស្សរាប់រយនាក់។ ជាការឆ្លើយតប ប្រទេសអ៊ីស្រាអែលបានប្រកាសធ្វើសង្គ្រាមលើក្រុមហាម៉ាស ហើយត្រៀមខ្លួនវាយលុកតំបន់ហ្គាហ្សា ជាមួយការចល័តទ័ពទ្រង់ទ្រាយធំបំផុតមិនធ្លាប់មាន។
ការដាក់ពង្រាយយោធាដ៏ទំនើប និងថ្លៃបំផុតរបស់អាមេរិកនេះ គឺជាការបង្ហាញកម្លាំងដ៏សំខាន់មួយ ហើយភ្ជាប់មកជាមួយការសន្យាផ្តល់អាវុធ និងឧបករណ៍យោធាដល់កងកម្លាំងការពារអ៊ីស្រាអែល។ ក្រុមនាវាផ្ទុកយន្តហោះវាយប្រហារ គឺជាកម្លាំងទ័ពជើងទឹក ដែលរួមមាន នាវាផ្ទុកយន្តហោះ រួមនឹងកងនាវាជំនួយ ហើយជារឿយៗ តែងតែវាយប្រហារលើនាវាមុជទឹក។ អាមេរិកមានក្រុមប្រយុទ្ធចំនួន១១ក្រុម ដែលក្រុមនីមួយៗ មានកម្លាំងបាញ់គ្រប់គ្រាន់ ដើម្បីផ្គូផ្គងនឹងកម្លាំងនៃប្រទេសតូចៗ និងមធ្យមជាច្រើន។
នាវាចម្បាំង USS Gerald R. Ford ដែលមានទទឹង ៧៨ម៉ែត្រ កម្ពស់ ៧៦.២ម៉ែត្រ និងប្រវែង ៣៣៧ម៉ែត្រ ដែលចំណាយប្រហែល ១៨ពាន់លានដុល្លារ ដោយក្នុងនោះ ៤.៧ពាន់លានដុល្លារសម្រាប់ការស្រាវជ្រាវ និងការអភិវឌ្ឍន៍ និង ១២.៨ពាន់លានដុល្លារក្នុងការសាងសង់ អាចផ្ទុកយន្តហោះបានរហូតដល់៩០គ្រឿង រួមទាំងយន្តហោះចម្បាំងទំនើបបំផុតរបស់យោធាអាមេរិកផងដែរ។
នាវាផ្ទុកយន្តហោះ ដែលត្រូវបានបំពាក់ដោយម៉ាស៊ីននុយក្លេអ៊ែរចំនួនពីរ ដែលអាចដំណើរការបាន២៥ឆ្នាំ ដោយគ្មានប្រេង ត្រូវបានអមដំណើរទៅសមុទ្រមេឌីទែរ៉ាណេភាគខាងកើត ដោយកងនាវារួមមាននាវាចម្បាំង USS Normandy និងនាវាពិឃាតមីស៊ីល USS Thomas Hudner ។ យន្តហោះនៅលើនាវាចម្បាំង USS Gerald R. Ford រួមមានយន្តហោះចម្បាំងបំបាំងកាយ F-35 ដែលមានតម្លៃប្រហែល ១០០លានដុល្លារក្នុង១គ្រឿង ហើយនិងការដឹកកាំជ្រួចរ៉ាដា និងគ្រាប់បែកដឹកនាំដោយប្រព័ន្ធឡាស៊ែរ រួមជាមួយនឹងឧទ្ធម្ភាគចក្រវាយប្រហារ និងយន្តហោះស៊ើបការណ៍យុទ្ធសាស្ត្រផងដែរ។ សរុបមក ក្រុមការងារប្រហែល ៧,៥០០នាក់ធ្វើការនៅទូទាំងក្រុមនៃក្រុមដឹកជញ្ជូននេះ៕ (ប្រភពពី CBS News និង Daily Mail)
ចែករំលែកព័តមាននេះ