អណ្ដាតភ្លើងឆាបឆេះរថយន្តដឹកឈើមួយគ្រឿងយ៉ាងសន្ធោសន្ធៅ (វីដេអូ)
- បន្ទាយមានជ័យ
រថយន្តហាឡែនឌ័រដឹកឈើមួយគ្រឿង បានឆ្លងចរន្តបង្កឱ្យក្លាយជាអណ្ដាតភ្លើងឆាបឆេះយ៉ាងសន្ធោសន្ធៅស្ទើរអស់ទាំងស្រុង ហើយត្រូវរថយន្ត
ខេត្តបន្ទាយមានជ័យ ៖ រថយន្តហាឡែនឌ័រដឹកឈើមួយគ្រឿង បានឆ្លងចរន្តបង្កឱ្យក្លាយជាអណ្ដាតភ្លើងឆាបឆេះយ៉ាងសន្ធោសន្ធៅស្ទើរអស់ទាំងស្រុង ហើយត្រូវរថយន្តពន្លត់អគ្គិភ័យជួយអន្តរាគមន៍ភ្លាម បង្កឱ្យមានការភ្ញាក់ផ្អើលកាលពីយប់ថ្ងៃទី០៨ ខែតុលា ឆ្នាំ២០២៣ នៅចំណុចព្រំប្រទល់ខេត្តបន្ទាយមានជ័យ និងឧត្តរមានជ័យ។
បើតាមអ្នកឃើញហេតុការណ៍នៅកន្លែងកើតហេតុ បានប្រាប់ឱ្យដឹងថា «នៅមុនពេលកើតហេតុ មានរថយន្តហាឡែនឌ័រ១គ្រឿង បានបើកបរក្នុងទិសដៅពីខេត្តឧត្តរមានជ័យ មកកាន់ខេត្តបន្ទាយមានជ័យ លុះពេលតែបើកបរសុខៗ ក៏ស្រាប់តែមានអណ្តាតភ្លើងឆាបឆេះយ៉ាងសន្ធោសន្ធៅតែម្ដង រហូតខូចខាតស្ទើរអស់ទាំងស្រុង ទើបឃើញរថយន្តពន្លត់អគ្គិភ័យ១គ្រឿង បានមកជួយអន្តរាគមន៍បាញ់ទឹកពន្លត់»។
អ្នកឃើញហេតុការណ៍រូបនោះ បានបញ្ជាក់ថា «រថយន្តដែលត្រូវអគ្គិភ័យឆាបឆេះខូចខាតអស់ស្ទើរតែទាំងស្រុងនេះ គេឃើញមានឈើប្រណីតជិត១០ដុំនៅក្នុងរថយន្តដែលត្រូវភ្លើងឆេះផ្នែកខាងក្រៅនេះផងដែរ។ នេះអាចនិយាយបានថា រថយន្តហាយឡែនឌ័រដែលឆាបឆេះនៅសល់តែឈើនេះ ទំនងជារថយន្តដឹកឈើប្រណីតចេញពីខេត្តឧត្តរមានជ័យចូលមកខេត្តបន្ទាយមានជ័យ ឬក៏អាចឆ្លងកាត់ខេត្តបន្ទាយមានជ័យក៏ថាបានដែរ»។
បើតាមសម្ដីម្ចាស់រថយន្ត ក៏បានបញ្ជាក់ដែរថា «នៅពេលដែលអគ្គិភ័យឆាបឆេះរថយន្ត គឺគាត់កំពុងតែបើកបរសុខៗ ក៏ស្រាប់តែឆ្លងចរន្តបង្កឱ្យក្លាយជាអណ្ដាភ្លើងឆាបឆេះរថយន្តតែម្ដង ហើយត្រូវបានរថយន្តពន្លត់អគ្គិភ័យមកជួយអន្តរាគមន៍ ប៉ុន្តែរថយន្តត្រូវភ្លើងឆាបឆេះអស់ស្ទើរទាំងស្រុងទៅហើយ»៕
ចែករំលែកព័តមាននេះ