ADផ្ទាំងផ្សព្វផ្សាយពាណិជ្ជកម្ម

អ៊ីរ៉ង់ប្រកាសគាំទ្រក្រុមហាម៉ាស់ដើម្បីទុកជាសារព្រ.មា.នប្រទេសដែលចង់ត្រូវគ្នាជាមួយអ៊ីស្រាអែល

1 ឆ្នាំ មុន

០៨ ខែ តុលា ឆ្នាំ ២០២៣ ម៉ោង ០៣:៤២

ក្រោយពេលក្រុមហាម៉ាស់វាយប្រហារដោយគ្រាប់រ៉ុកកែតយ៉ាងខ្លាំងក្លាទៅលើប្រទេសអ៊ីស្រាអែលកាលពីថ្ងៃសៅរ៍ ទីប្រឹក្សាជាន់ខ្ពស់របស់អគ្គមគ្គុទ្ទេសក៍អ៊ីរ៉ង់ប្រកាសថាខ្លួននឹងបន្តគាំទ្រក្រុមហាម៉ាស់ដោយឥតងាករេរហូតដល់ក្រុមនេះរំដោះបានទាំងស្រុងនូវដែនដីប៉ាឡេស្ទីន និងទីក្រុងយេរូសាឡឹមពីកណ្ដាប់ដៃរបស់អ៊ីស្រាអែល។ ពាក្យសម្ដីរបស់ទីប្រឹក្សាឈ្មោះរ៉ាហ៊ីម សាហ្វាវី (Rahim Safavi) រឹតតែធ្វើឱ្យអស់ការសង្ស័យតទៅទៀតថាអ៊ីរ៉ង់នេះតែម្ដងជាអ្នកនៅពីក្រោយខ្នងក្រុមហាម៉ាស់។ ពួកគេជាសម្ព័ន្ធមិត្តចាស់វស្សាតាំងពីយូរមកហើយ។

គេមិនត្រូវភ្លេចទេថាអ៊ីរ៉ង់ និងអារ៉ាប៊ីសាអូឌីតជាគូប្រជែងឥទ្ធិពលគ្នានៅក្នុងតំបន់មជ្ឈិមបូព៌ា។ ដូច្នេះ នៅក្នុងក្រសែភ្នែករបស់អារ៉ាប៊ីសាអូឌីត សារនយោបាយរបស់ទីប្រឹក្សាអ៊ីរ៉ង់ ឬមន្ត្រីជាន់ខ្ពស់អ៊ីរ៉ង់ដែលប្រកាសគាំទ្រក្រុមហាម៉ាស់ប្រៀបបាននឹងសារគំរាមកំហែងមួយថា «អ៊ីរ៉ង់ចង់ធ្វើឱ្យស្ថានការណ៍ក្រឡាប់ចាក់ដើម្បីកុំឱ្យអារ៉ាប៊ីសាអូឌីត និងអ៊ីស្រាអែលដាក់ទំនាក់ទំនងជាប្រក្រតីជាមួយគ្នា»។

ការវាយប្រហាររបស់ក្រុមហាម៉ាស់ធ្វើឡើងក្រោយពេលអគ្គមគ្គុទ្ទេសក៍អ៊ីរ៉ង់បង្ហោះសារនៅលើបណ្ដាញសង្គមបាន៤ថ្ងៃ។ ព្រះអង្គបង្ហោះថា «ប្រទេសដែលឆក់ប្លន់ទឹកដីរបស់គេ (អ៊ីស្រាអែល) នឹងរលាយឆាប់ៗនេះ។ ថ្ងៃនេះ ក្រុមយុវជនប៉ាឡេស្ទីន និងក្រុមប្រឆាំងនឹងការគាបសង្កត់, ប្រឆាំងនឹងការទន្ទានទឹកដីប៉ាឡេស្ទីន កាន់តែមានទឹកចិត្តក្លៀវក្លា កាន់តែមានចលនារស់រវើក និងកាន់តែត្រៀមខ្លួនខ្លាំងជាងពេលណាៗទាំងអស់នៅក្នុងរយៈពេល៧០ទៅ៨០ឆ្នាំចុងក្រោយនេះ»។

ការវាយប្រហារនេះកើតឡើងនៅក្នុងកាលៈទេសៈសំខាន់ផ្នែកការទូត។ អារ៉ាប៊ីសាអូឌីតអាចនឹងដាក់ទំនាក់ទំនងជាប្រក្រតីជាមួយអ៊ីស្រាអែល។ បើដូច្នេះមែន, ទំនាក់ទំនងអារ៉ាប៊ីសាអូឌីត និងអ៊ីស្រាអែលអាចនឹងធ្វើឱ្យបះកូនជញ្ជីងនៃឥទ្ធិពលរបស់អ៊ីរ៉ង់។ មានន័យថាអ៊ីរ៉ង់នឹងចាញ់ប្រៀបទាំងអ៊ីស្រាអែល និងអារ៉ាប៊ីសាអូឌីត។ អ៊ីរ៉ង់ចង់ឱ្យមានមុំបីហ្នឹងនៅដដែល៖ អ៊ីរ៉ង់, អារ៉ាប៊ីសាអូឌីត និងអ៊ីស្រាអែល។ ធ្វើបែបនេះដើម្បីអ៊ីរ៉ង់ងាយស្រួលក្រឡុកកញ្ឆា។ ស្ដេចអារ៉ាប៊ីសាអូឌីត ព្រះអង្គម្ចាស់រាជទាយាទប៊ីនសាល់ម៉ាន់ (bin Salman) ធ្លាប់មានបន្ទូលនៅក្នុងបទសម្ភាសជាមួយសារព័ត៌មានកាលពីខែកញ្ញាថា «យើងទាំង២ អារ៉ាប៊ីសាអូឌីត និងអ៊ីស្រាអែល កាន់តែខិតជិតគ្នា។ ចំណុចហ្នឹងហើយដែលអ្នកវិភាគយល់ថាអ៊ីរ៉ង់ដេកមិនលក់ បក់មិនល្ហើយ។

កាលពីប៉ុន្មានអាទិត្យមុន, ថ្នាក់ដឹកនាំអ៊ីរ៉ង់ចេញមុខប្រឆាំងជំទាស់នឹងគម្រោងរៀបចំកិច្ចព្រមព្រៀងរវាងអ៊ីស្រាអែល និងអារ៉ាប៊ីសាអូឌីត ដែលផ្ដួចផ្ដើមដោយអាមេរិក។ ថ្ងៃទី៣ ខែតុលា អគ្គមគ្គុទ្ទេសក៍អ៊ីរ៉ង់ថ្លែងថាបើនរណាចង់មានទំនាក់ទំនងប្រក្រតីជាមួយអ៊ីស្រាអែលនឹងប្រឈមនឹងការខាតបង់ដ៏ធំ។ អ៊ីរ៉ង់មានគោលជំហរ១ «ប្រទេសណាចង់ត្រូវរ៉ូវគ្នាជាមួយអ៊ីស្រាអែលនឹងទទួលរងការខាតបង់»។ បើនិយាយនៅក្នុងការលេងល្បែងភ្នាល់វិញមានន័យថាពួកគេកំពុងចាក់ខាងក្រុមចាញ់។

ក្រុមប្រដាប់អាវុធហេស្បូឡា (Hezbollah) ដែលមានទំនាក់ទំនងជាមួយអ៊ីរ៉ង់ក៏ហាក់ដូចជាគិតថាការវាយប្រហារកាលពីថ្ងៃសៅរ៍នោះមានជាប់ពាក់ព័ន្ធនឹងការដែលអារ៉ាប៊ីសាអូឌីតចង់ខិតទៅរកអ៊ីស្រាអែល។ ហេស្បូឡាថ្លែងថាការវាយប្រហារនោះជាការឆ្លើយតបទៅនឹងទី១- ការដែលអ៊ីស្រាអែលចេះតែរុករានទន្ទ្រានទីចូលក្នុងតំបន់កាន់កាប់របស់ប៉ាឡេស្ទីន និងទី ២- ជាសារនយោបាយផ្ដាំទៅអ្នកដែលចង់មានទំនាក់ទំនងជាប្រក្រតីជាមួយអ៊ីស្រាអែល៕

ប្រភព៖ Politico
https://www.politico.eu/article/iran-hamas-attacks-against-israel-palestine-jerusalem/